بھارتی ایئر لائن بیسیوں مسافروں کو رن وے پر ہی بھول گئی

بھارتی دارالحکومت نئی دہلی سے موصولہ رپورٹوں کے مطابق یہ واقعہ جنوبی بھارتی شہر بنگلور کے ہوائی اڈے پر پیر نو جنوری کی صبح پیش آیا، جہاں 'گو فرسٹ‘ نامی ایئر لائن کی ایک مسافر پرواز کو دہلی کے لیے روانہ ہونا تھا۔

ہوائی جہاز سے دنیا کا چکر مکمل کرنے والا کم عمر ترین پائلٹ

اس پرواز کے 55 مسافر ابھی ٹرمینل سے ہوائی جہاز کے دروازے تک پہنچنے کے لیے رن وے پر بس میں ہی تھے کہ ان کی فلائٹ G8 116 اپنی منزل کی طرف روانہ بھی ہو گئی۔ بھارتی نشریاتی دارے این ڈی ٹی وی کے مطابق یہ واقعہ اس ہوائی جہاز کے عملے اور ہوائی اڈے کے گراؤنڈ سٹاف کے مابین غلط فہمی کی وجہ سے پیش آیا۔

دلچسپ بات یہ بھی ہے کہ ان تمام مسافروں کا سامان بھی جہاز پر لادا جا چکا تھا اور وہ اپنا اپنا دستی سامان اور بورڈنگ کارڈز لیے ابھی بس میں ہی تھے کہ انہیں لے جانے والا طیارہ تو نئی دہلی کے لیے روانہ ہو گیا مگر وہ رن وے پر ہی رہ گئے۔

دوران پرواز سو جانے والے دونوں پائلٹ نوکری سے معطل

ایوی ایشن حکام  نے وضاحت طلب کر لی

اس واقعے کے بعد شہری ہوا بازی کے بھارتی محکمے کے حکام نے 'گو فرسٹ‘ سے اس بارے میں وضاحت طلب کر لی ہے کہ وہ اپنے 55 مسافروں کو رن وے پر ہی بھول کیسے گئی۔'گو فرسٹ‘ بھارت کی کم کرائے والی ایک بجٹ ایئر لائن ہے، جو پہلے 'گو ایئر‘ کہلاتی تھی۔ پھر اس کا نام بدل کر 'گو فرسٹ‘ رکھ دیا گیا تھا۔ اس کمپنی نے اس واقعے سے متاثرہ مسافروں سے معذرت کرتے ہوئے کہا ہے کہ وہ چھان بین کر رہی ہے۔

اسپين ميں غير قانونی داخلے کی کوشش، طبيعت ناساز بتا کر جہاز ہی اتروا ليا

جو پچپن مسافر اس واقعے کے باعث وقت پر نئی دہلی کے لیے روانہ نہ ہو سکے، ان میں سے 53 کو چار گھنٹے بعد ایک دوسری فضائی کمپنی کی ایک پرواز کے ذریعے بھارتی دارالحکومت بھیجا گیا۔ دو مسافروں نے سفر کرنے سے انکار کر دیا تھا اور انہیں ان کی ادا کردہ ٹکٹ کی رقوم واپس کر دی گئیں۔

جن 53 مسافروں کو ایک دوسری فضائی کمپنی کی پرواز کے ذریعے نئی دہلی بھیجا گیا، بھارتی اخبار ٹائمز آف انڈیا کے مطابق انہیں پہلے رن وے سے واپس ٹرمینل میں لایا گیا، نئے بورڈنگ کارڈ جاری کیے گئے اور نئے سرے سے سکیورٹی اسکریننگ کے بعد ہی وہ اپنی منزل کی طرف روانہ ہو سکے۔

بھارتی فضائی کمپنیوں کے خلاف حالیہ شکایات

بھارت میں مختلف فضائی کمپنیوں کی سروس کے بارے میں حال ہی میں کئی طرح کی شکایات سامنے آئی ہیں۔ ان میں ایسے واقعے میں تو ایک ایئر لائن کے فضائی عملے نے نشے میں دھت ایک مسافر کو ساتھ مبینہ طور پر ایسا سلوک کیا کہ اس نے بزنس کلاس میں پاس ہی بیٹھی ایک خاتون مسافر پر پیشاب کر دیا تھا۔

یہ واقعہ بھارتی کمپنی ایئر انڈیا کی ایک ایسی فلائٹ میں پیش آیا، جو نئی دہلی سے نیو یارک جا رہی تھی۔ متاثرہ خاتون کے مطابق اس نے جہاز کے عملے سے ایک مسافر کی طرف سے اپنے ساتھ بدتمیزی اور پھر پیشاب کر دیے جانے کی شکایت بھی کی تھی تاہم عملے نے کوئی فوری کارروائی نہیں کی تھی۔

بعد ازاں ایسی خبریں بھی سامنے آئی تھیں کہ خاتون مسافر پر پیشاب کر دینے والے بھارتی باشندے کے فضائی سفر کرنے پر ایک ماہ کی پابندی لگا دی گئی تھی۔

م م / ع ا (ڈی پی اے، این ڈی ٹی وی)