بھارت جانے کے خواہشمند پاکستانی شائقین کو مشکلات کا سامنا

پاکستان کرکٹ بورڈ کے نامزد ٹریول ایجنٹ نے بھارت سے دہلی ون ڈے کے ایک ہزار ٹکٹ وصول ہونے کی تصدیق کی ہے۔
بھارتی حکومت نے اس سیریز کے لیے تین ہزار پاکستانی شائقین کرکٹ کو پانچ شہروں بنگلور احمدآباد، چنئی، کلکتہ اور دہلی کے ویزے جاری کرنے کا اعلان کیا تھا مگر سرحد کے دونوں اطراف حکام کی روایتی سستی سے اس معاملے میں اتنی سست پیش رفت ہوئی کہ بھارت جانے کے خواہشمندوں کی آخری آس اب دہلی میں چھ نومبر کو ہونیوالے ایک روزہ میچ سے ہی وابستہ رہ گئی ہے۔

بھارت جاکر کرکٹ دیکھنے کے متمنی لاہور کے ایک نوکری پیشہ نوجوان فاروق مجید نے شکوہ کرتے ہوئے ریڈیو ڈوئچے ویلے کو بتایا وہ تمام میچز بھارت جا کر دیکھنا چاہتے تھے مگر ٹکٹ بر وقت نہ پہنچنے کی وجہ سے اب وہ صرف دہلی ہی جا سکیں گے۔
فاروق کے مطابق انہیں پاکستان کرکٹ بورڈ کے ٹریول ایجنٹ نے بہت چکر لگوانے کے بعد اب دہلی بھجوائے جانے کی تصدیق کی ہے تاہم انہیں دیگر میچز نہ دیکھنے کا افسوس رہے گا۔

پہلی بار کرکٹ کے بہانے سرحد پار جانے کے لیے پرتول رہے ایک مقامی کمپنی میں کام کرنے والے ریحان پراچہ کہتے ہیں بھارتی ہائی کمیشن انہیں ویزہ تو سات روز کا جاری کر رہا ہے مگر ان کا قیام دہلی میں صرف تین دن کا ہوگا۔ دوسری طرف اخراجات پانچ دن کے وصول کیے جا رہے ہیں۔

ریحان کے بقول وہ بھارت جا کر امن کی آشا کا حصہ بننا چاہتے ہیں مگر پاکستان کرکٹ بورڈ کی عدم دلچسپی کے باعث وہ صرف ایک میچ ہی دیکھ پائیں گے۔ ہرکوئی دوستی بس سروس پر جانا چاہتا تھا مگر پہلے ویزے کی شرط کے باعث بر وقت بکنگ نہیں پائی اور اب ٹرین سے ہی جانا پڑے گا۔
پاکستان کرکٹ بورڈ کے ٹور آپریٹر شاہ نواز نے اس صورتحال کا ذمہ دار بھارتی حکام کو ٹھہراتے ہوئے کہا کہ اگر شائقین کو واہگہ سے پیدل بھارت جانے کی اجازت مل جاتی تو کوئی مسئلہ نہ ہوتا۔ بے شمار لوگ جانا چاہتے ہیں مگر بھارتی ہائی کمیشن کی جانب سے کاغذی کاروائی کے باعث پیش رفت بہت سست ہے۔
پاکستانی شائقین کے لیے انتطار کی گھڑیاں تین جنوری کی صبح ختم ہونگی جب سمجھوتہ ایکسپریس کے ذریعے انہیں براستہ اٹاری لاہور سے دہلی روانہ کیا جائے گا۔

رپورٹ: طارق سعید، لاہور
ادارت: افسر اعوان