بُنڈس لیگا: کولون کی 22 برس بعد کائزرز لاؤٹرن کو شکست
6 فروری 2012
کائزرز لاؤٹرن کے خلاف کولون نے 22 برس بعد کامیابی حاصل کی ہے۔ کولون نے کائزرز لاؤٹرن کو آخری مرتبہ 1989ء میں شکست دی تھی۔ دسمبر کے بعد اس پہلی فتح کے بعد کولون اب بنڈس لیگا پوائنٹس ٹیبل پر نویں نمبر پر آ گیا ہے۔ اتوار کا دوسرا میچ ویردر بریمن اور فرائی برگ کے درمیان کھیلا گیا۔ یہ میچ دو دو گول سے برابر رہا۔
بنڈس لیگا کا بیسواں میچ ڈے اتوار کے روز کھیلے گئے دو میچوں کے ساتھ ہی مکمل ہوگیا ہے۔ بیسویں میچ ڈے کے دوران بائرن میونخ اپنی پہلی پوزیشن سے محروم ہو گئی اور دفاعی چیمپیئن ڈورٹمنڈ کی ٹیم پوائنٹس ٹیبل پر پہلے نمبر پرپہنچ گئی ہے۔
بیسویں میچ ڈے کے سلسلے میں ہفتے کے روز کُل چھ میچ کھیلے گئے۔ ہفتے کے ایک میچ میں بائرن میونخ اور ہیمبرگ کا میچ ایک ایک گول سے برابر رہا۔ یوں بائرن کی ٹیم کو محض ایک پوائنٹ حاصل ہو سکا اور اس کے پوائنٹس اکتالیس ہو گئے۔
ہفتے ہی کو شالکے کا سامنا مائنز سے ہوا، یہ میچ بھی ایک ایک گول سے برابر رہا۔ یوں شالکے کو بھی ایک ہی پوائنٹ حاصل ہوا اور اس نے اپنی تیسری پوزیشن برقرار رکھی۔ ہفتے کے دیگر میچز میں وولفس برگ اور مؤنشن گلاڈباخ کا مقابلہ صفر صفر سے برابر رہا۔ ہوفن ہائیم اور آؤگس برگ کا میچ بھی دو دو گول سے برابر رہا۔ ہینوور نے ہیرتھا برلن کو صفر کے مقابلے میں ایک گول سے مات دی۔ لیور کوزن اور شٹٹ گارٹ کی ٹیمیں بھی دو دو گول ہی اسکور کرسکیں اور یوں ان کا میچ بھی برابری پر ختم ہوا۔
قبل ازیں اس میچ ڈے کے پہلے روز جمعے کو کھیلے گئے واحد میچ میں ڈورٹمنڈ نے نیوریمبرگ کو ہرا کر اپنے پوائنٹس تینتالیس کر لیے تھے۔ یوں اس وقت یہ پوائنٹس ٹیبل پر سر فہرست ٹیم ہے اور کم از کم آئندہ میچ ڈے تک یہ پوزیشن اسی ٹیم کو حاصل رہے گی۔
پوائنٹس ٹیبل:
اس وقت پوائنٹس ٹیبل پر سر فہرست دفاعی چیمپئن ڈورٹمنڈ کی ٹیم ہے اور اس کے پوائنٹس 43 ہیں۔ 41 پوائنٹس کے ساتھ بائرن میونخ کی ٹیم دوسرے نمبر پر ہے جبکہ تیسرا نمبر شالکے کی ٹیم کے پاس ہے۔ شالکے کے پوائنٹس بھی 41 ہی ہیں۔ مؤنشن گلاڈ باخ کی ٹیم نے 40 پوائنٹس کے ساتھ اپنی چوتھی پوزیشن برقرار رکھی ہے۔ بریمن کی ٹیم 32 پوائنٹس کے ساتھ اب واپس پانچویں نمبر پر آ گئی ہے جبکہ لیورکوزن یہ پوزیشن کھوتے ہوئے 31 پوائنٹس کے ساتھ نیچے یعنی چھٹے نمبر پر پہنچی ہے۔ تیس پوائنٹس کے ساتھ ساتویں نمبر پر ہینوور ہے۔ ہوفن ہائیم، کولون اور وولفس برگ 24، 24 پوائنٹس کے ساتھ بالترتیب آٹھویں نویں اور دسویں نمبر پر ہیں۔
رپورٹ: افسر اعوان
ادارت: ندیم گِل