بنڈس لیگا، مؤنشن گلاڈ باخ کو ایک اور شکست

گزشتہ سات میچز میں گلاڈ باخ کی ٹیم ممکنہ طور پر 21 پوائنٹس اپنے نام کر سکتی تھی، تاہم اس کے ہاتھ اب تک صرف چھ پوائنٹس ہی آئے ہیں۔ اس شکست کے بعد مؤنشن گلاڈ باخ اور لیگ کی ٹاپ ٹیم ڈورٹمنڈ کے درمیان پوائنٹس کا فرق اب 12 کا ہو گیا ہے جبکہ بنڈس لیگا کے اس سیزن کے اب صرف چھ ہی میچ باقی بچے ہیں۔

اس شکست کے باوجود مؤنشن گلاڈ باخ کی ٹیم لیگ میں چوتھی پوزیشن پر براجمان ہے۔ پانچویں نمبر پر ہینوور کی ٹیم ہے، جو گلاڈ باخ سے اب بھی دس پوائنٹس کی دوری پر ہے۔ میچ کے بعد اپنے ایک بیان میں گلاڈ باخ کے سوئس کوچ Lucien Favre نے کہا، ’ہم اس وقت صرف اپنا پانچ فیصد کھیل مِس کر رہے ہیں، ہمیں وہی واپس لانا ہے اور ہم اسے واپس لائیں گے۔‘

اس میچ کے پہلے ہاف میں کوئی بھی ٹیم گول کرنے میں کامیاب نہ ہو پائی تاہم کھیل کے 57 ویں منٹ میں ہینوور کے آئیوری کوسٹ سے تعلق رکھنے والے اسٹرائیکر Didier Ya Konan نے گول کر کے اپنے ٹیم کو برتری دلا دی۔ میچ کے 76 ویں منٹ میں مامی بیرام نے ہینوور کی جانب سے دوسرا گول کر کے میچ پر اپنی ٹیم کی گرفت کو مضبوط بنا دیا۔ میچ کے 78 ویں منٹ میں گلاڈ باخ کے کھلاڑی Havard Nordtveit نے گول کر کے ہینوور کی برتری کو کم کیا، تاہم یہ گول مؤنشن گلاڈباخ کو شکست سے بچا نہ سکا۔

گ‍زشتہ روز بائرن میونخ نے نیورمبرگ کے خلاف صفر کے مقابلے میں ایک گول سے فتح حاصل کر کے ٹاپ ٹیم ڈورٹمنڈ کے ساتھ پوائنٹس کے فرق کو کچھ کم کیا تھا۔ اس میچ ڈے میں ڈورٹمنڈ کی ٹیم اشٹٹ گارٹ کے خلاف ڈرامائی انداز میں اپنا میچ جیت نہ پائی اور کھیل چار چار گول سے برابر رہا۔

اگلے میچ ڈے میں یہی دونوں ٹیمیں ایک دوسرے کا سامنا کرنے والی ہیں۔ بائرن میونخ کے خلاف میچ کی میزبانی ڈورٹمنڈ کی ٹیم کرے گی۔ یہی دونوں ٹیمیں جرمن کپ کے فائنل میں 12 اپریل کو بھی آمنے سامنے ہوں گی۔ اس میچ ڈے کے اختتام پر ڈورٹمنڈ کے مجموعی پوائنٹس 63 جبکہ بائرن میونخ کے کل پوائنٹس اب 60 ہیں۔ اگر بائرن میونخ کی ٹیم اگلا میچ جیت گئی تو ڈورٹمنڈ کی برتری ختم ہو جائے گی۔

رپورٹ: عاطف توقیر

ادارت: حماد کیانی