بنڈس لیگا، لیورکوزن شکست سے دوچار

بنڈس لیگا یعنی فیڈرل جرمن فٹ بال لیگ کے گیارہویں میچ ڈےکے تیسرے اور آخری دن کھیلے گئے اس میچ میں لیور کوزن کی شکست کو ایک 'اپ سیٹ' قرار دیا جا رہا ہے۔ اس 'اپ سیٹ' کے نتیجے میں لیور کوزن پوائنٹس ٹیبل پر اپنی تیسری پوزیشن سے محروم ہو گئی۔

وولفس برگ کی ٹیم نے اپنے ہوم گراؤنڈ پر انتہائی عمدہ کھیل پیش کیا اور صرف 33 منٹوں میں تین گول کر دیے۔ لیور کوزن کی طرف سے واحد گول جرمن ٹیم کے سابق اسٹرائیکر اشٹیفان کیسلنگ نے 91 ویں منٹ میں کیا۔ رواں سیزن میں انہوں نے گیارہ میچوں میں سات گول کیے ہیں۔

میچ کے بعد لیور کوزن کے کھلاڑی Philipp Wollscheid نے اپنے غصے کا اظہار کرتے ہوئے کہا کہ یہ کہنا پڑے گا کہ پہلے ہاف میں لیور کوزن کا کھیل انتہائی برا تھا، ''ہم سب سو رہے تھے۔ آپ اس طرح کوئی میچ نہیں جیت سکتے۔''

رواں سیزن میں پندرہ ستمبر کو دفاعی چیمپئن ڈورٹمنڈ سے ہارنے کے بعد لیور کوزن کی یہ پہلی شکست تھی۔ اس شکست کے باوجود لیور کوزن پوائنٹس ٹیبل پر پانچویں پوزیشن پر براجمان ہے جبکہ وولفس برگ 16 ویں نمبر پر ہے۔ اس نے رواں سیزن میں صرف تین میچوں میں کامیابی حاصل کی ہے۔

اتوار کے دن کھیلے گئے ایک اور میچ میں ہینوور نے سولہ منٹوں میں چار گول کر کے اشٹٹ گارٹ کی ٹیم کو پریشان کر دیا۔ یہ میچ ہینوور نے دو کے مقابلے میں چار گول سے جیتا۔ اس جیت کے ساتھ ہینوور نے گیارہویں میچ ڈے کے اختتام پر لیگ ٹیبل پر اپنی چھٹی پوزیشن قائم رکھی۔

گیارہویں میچ ڈے کے آخری دن مؤنشن گلاڈ باخ اور Greuther Fuerth کی ٹیمیں بھی ایک دوسرے کے مد مقابل آئیں۔ مؤنشن گلاڈ باخ نے دو چار سے کامیابی حاصل کر کے پوائنٹس ٹیبل پر اب آٹھویں پوزیشن حاصل کر لی ہے۔

گیارہویں میچ ڈے کے اختتام پر پہلا نمبر ابھی تک تاریخ ساز جرمن کلب بائرن میونخ کے پاس ہے۔ اس کے پوائنٹس تیس ہیں۔ دوسرے نمبر پر 23 پوائنٹس کے ساتھ شالکے ہے جبکہ فرینکفرٹ کی ٹیم بیس پوائنٹس کے ساتھ تیسری پوزیشن سنبھالے ہوئے ہے۔ دفاعی چیمپئن ڈورٹمنڈ انیس پوائنٹس کے ساتھ اب چوتھے نمبر پر ہے۔

( ab /mm (dpa,AFP