بنڈس ليگا: تيرہويں ميچ ڈے کے اختتام پر بھی بائرن ميونخ کی ٹيم سرفہرست

اتوار پچيس نومبر کو کھيلے جانے والے ايک ميچ ميں فرائی برگ کی ٹيم نے اپنے ہوم گراؤنڈ پر شاندار کھيل کا مظاہرہ کرتے ہوئے اشٹٹ گارٹ کو تين صفر سے شکست دی۔

قريب چوبيس ہزار شائقين کی موجودگی ميں فرائی برگ کے کھلاڑيوں نے ميچ کے پہلے ہاف ميں ايک اور دوسرے ہاف ميں دو گول کرتے ہوئے مخالف ٹيم کو ڈھير کر ديا۔ اس کاميابی کے ساتھ فرائی برگ کی ٹيم بنڈس ليگا ميں انيس پوائنٹس کے ساتھ چھٹی پوزيشن پر آ گئی ہے۔

ادھر ليور کوزن کے کلب نے ہوفن ہائم کی ٹیم کے خلاف کھيلے جانے والے ميچ ميں ایک کے مقابلے ميں دو گول سے کاميابی حاصل کرتے ہوئے ليگ ميں مجموعی طور پر چوبيس پوائنٹس حاصل کر ليے ہيں۔ اس طرح ہوفن ہائم اب پوائٹس کے اعتبار سے لیگ ٹیبل پر پانچويں پوزيشن پر ہے۔

آؤگس برگ اور مؤنشن گلاڈ باخ کے مابين کھيلا جانے والا ميچ ايک ايک گول سے برابر رہا۔ اس ميچ ميں آؤگس برگ کے ليے ان کے کھلاڑی ساشا موئيلڈرز نے ميچ کے پانچويں منٹ ميں گول اسکور کيا جبکہ ميچ کے 85ويں منٹ ميں گلاڈ باخ کے ليے پيٹرک ہرمان نے گول کرتے ہوئے اسکور برابر کر ديا۔

جرمنی کی قومی فٹ بال ليگ ميں تيرہويں ميچ ڈے ميں جمعے، ہفتے اور اتوار کو کھيلے گئے ميچوں کے بعد بائرن ميونخ کی ٹيم چونتيس پوائنٹس کے ساتھ سرفہرست ہے جبکہ دفاعی چيمپئن ڈورٹمنڈ کی ٹيم پچيس پوائنٹس کے ساتھ دوسری پوزيشن پر ہے۔

شالکے، فرينکفرٹ اور ليور کوزن کی ٹيموں کے چوبيس چوبيس پوائنٹس ہيں تاہم بہتر گول اوسط کی بنياد پر شالکے تيسری، فرينکفرٹ چوتھی اور ليور کوزن پانچويں پوزنشن پر براجمان ہے۔

(as/ab (Reuters, AFP