بنڈس ليگا: بريمن اور وولفس برگ کی فتوحات

گزشتہ روز کھیلے گئے میچ میں بريمن کی ٹيم نے ڈسلڈورف کو دو کے مقابلے ميں ايک گول سے ہرايا۔ اس ميچ ميں ڈسلڈورف کے دفاعی کھلاڑی Jens Langeneke نے ايک پينلٹی کک پر ميچ کا پہلا گول اسکور کرتے ہوئے اپنی ٹيم کو برتری دلوا دی تاہم بريمن کے اسٹرائيکر Nils Petersen نے ميچ کے51 ويں منٹ ميں گول کر کے اسکور برابر کر ديا۔ ميچ کے 82 ويں منٹ ميں بريمن کے ليے Kevin de Bruyne کا گول فيصلہ کن ثابت ہوا اور اس طرح يہ ٹيم تين پوائنٹس حاصل کرنے ميں کامياب رہی۔ ميچ کے نتيجے کے بعد بريمن ليگ ميں ساتويں جبکہ ڈسلڈورف پندرہويں پوزيشن پر ہے۔

اتوار کو ہی کھيلے گئے دوسرے ميچ ميں سن 2009 کی بنڈس ليگا چيمپئن ٹيم وولفس برگ نے ہوفن ہائم کو تين ایک سے ہرايا۔ اس ميچ ميں وولفس برگ کے ليے ماکوٹو ہسيبے، باس دوست اور نالڈو نے گول اسکور کيے۔

اس سے قبل ہفتے کے روز کھیلے گئے ایک میچ میں بائرن میونخ اور نیورمبرگ کا میچ ایک ایک گول سے برابر رہا تاہم میونخ کی ٹيم لیگ میں آٹھ پوائنٹس کے فرق کے ساتھ اب بھی سر فہرست ہے۔ ہفتے ہی کو کھیلے گئے ایک اور میچ میں شالکے کی ٹیم لیورکوزن سے صفر کے مقابلے میں دو گول سے ہار گئی۔ دیگر میچوں میں فرینکفرٹ نے آؤگسبرگ کو دو صفر سے جبکہ دفاعی چیمپئن ڈورٹمنڈ نے فیورتھ کی ٹیم کو تین ایک سے ہرايا۔

جرمن قومی فٹ بال ليگ بنڈس ليگا ميں گزشتہ ہفتے اور اتوار کو کھيلے گئے بارہويں ميچ ڈے کے اختتام پر پوائنٹس ٹيبل پر اکتيس پوائنٹس کے ساتھ ميونخ کی ٹيم پہلی پوزيشن پر ہے۔ شالکے اور فرينکفرٹ دونوں کے ہی تئیس تيئس پوائنٹس ہیں تاہم اچھے گول اوسط کی بنیاد پر شالکے دوسرے نمبر پر ہے۔ دفاعی چيمپئن ڈورٹمنڈ بائيس پوائنٹس کے ساتھ چوتھے اور ليور کوزن اکيس پوائنٹس کے ساتھ پانچویں پوزيشن پر ہے۔

رواں ہفتے تين جرمن کلب ميونخ، شالکے اور ڈورٹمنڈ چيمپئنز ليگ ٹورنامنٹ ميں ميں اپنے اپنے ميچ کھيليں گے۔

as/ab (AFP)