بلوچستان میں گورنر راج: سابقہ حکومتی جماعتوں کا احتجاج

ان مظاہروں میں کچھ عرصہ پہلے تک کوئٹہ میں اقتدار میں رہنے والی ان اتحادی جماعتوں کے ہزاروں کارکنوں نے شرکت کی اور وفاقی حکومت کے خلاف نعرے بازی بھی کی۔ مظاہرین نے بلوچستان میں گورنر راج کے نفاذ کو تنقید کا نشانہ بناتے ہوئے اسے ایک ’غیر جمہوری اقدام‘ قرار دیا اور مطالبہ کیا کہ بلوچستان میں عوام کی نمائندہ حکومت کو بحال کر کے صوبائی اسمبلی کو با اختیار بنایا جائے۔

صوبے میں گورنر راج کے نفاذکے بعد ان سابقہ مخلوط حکومتی جماعتوں نے تین روز تک مسلسل مشاورت کے بعد ایک مشترکہ اعلامیے میں بلوچستان میں گورنر راج کے خلاف پورے صوبے میں احتجاجی تحریک شروع کرنے کا اعلان کیا تھا۔ اسلام آباد میں وفاقی حکومت کے فیصلے کے خلاف بننے والے اتحاد میں جمعیت علمائے اسلام، بی این پی عوامی، پاکستان پیپلز پارٹی اور دیگر اتحادی جماعتوں کے ارکان کے علاوہ بلوچستان اسمبلی کے مختلف حلقوں سے منتخب ہونے والے آزاد ارکان بھی شامل ہیں۔

احتجاجی تحریک کے پہلے مرحلے میں اتوار کوصوبائی دارالحکومت کوئٹہ سمیت مختلف شہروں میں احتجاجی مظاہرے کیے گئے اور حکومت مخالف ریلیاں نکالی گئیں۔ ان ریلیوں میں ہزاروں افراد نے شرکت کی۔ مظاہرین نے مرکزی حکومت کی جانب سے بلوچستان میں گورنر راج کے نفاذ کے فیصلے کو غیر جمہو ری عمل قرار دیتے ہوئے اسے تنقید کا نشانہ بنایا۔

بلوچستان کے سابق سینئر صوبائی وزیر مولانا عبدالواسع نے، جو کہ گورنر راج کے خلاف احتجاجی تحریک کے روح رواں ہیں، کہا کہ مرکزی حکومت نے بلوچستان میں غیر جمہوری انتظامیہ قائم کر کے قواعد وضوابط کی خلاف ورزی کی ہے، جسے کسی بھی طور تسلیم نہیں کیا جا سکتا۔ انہوں نے کہا، ’اسمبلی کو معطل کرنا کوئی دانشمندی نہیں۔ یہ جمہوریت کی علامت ہے۔ اس طرح اسے ختم کرنے سے مزید نفرتیں بڑھیں گی اور دوریاں پیدا ہوں گی۔ مرکزی حکومت کے اقدامات سے بلوچستان میں ہر دور میں حالات خراب ہوئے ہیں۔‘

مولانا عبدالواسع نے کہا، ’ہم نے جمہور کی حکمرانی قائم کرنے کے لیے احتجاجی تحریک شروع کی ہے، جو کہ مقصد کے حصول کے بغیر ختم نہیں ہو سکتی۔ کسی غیر جمہوری اقدام کو نہ ہم نے پہلے برداشت کیا ہے اور نہ اب کریں گے۔ ہماری تحریک اس وقت تک جاری رہے گی، جب تک صوبے میں عوام کی نمائندہ حکومت بحال نہیں ہو جاتی اور اسمبلی کو پھر سے بااختیار نہیں بنایا جاتا۔‘

دوسری طرف بلوچستان کی تحلیل شدہ اسمبلی میں پاکستان مسلم لیگ (ق) سے تعلق رکھنے والی خاتون رکن اور سابقہ وزیر ر قیعہ ہاشمی کہتی ہیں کہ حکومت نے اگرچہ حالات کی مجبوری کے باعث گورنر راج کے نفاذ کا فیصلہ کیا ہے تاہم یہ فیصلہ آئین کے مطابق نہیں تھا۔ انہوں نے کہا، ’ہم نے پیپلز پارٹی کی غیر مشروط طور پر صوبائی حکومت کی تشکیل کے وقت حمایت کی تھی۔ حالات بہت خراب ہو گئے تھے۔ اس لیے گورنر راج تو نافذ کر دیا گیا لیکن 18 ویں ترمیم کی رو سے یہ فیصلہ درست نہیں تھا۔ شاید اس حوالے سے مزید سنجیدگی کی ضرورت تھی۔‘

گورنر راج کے خلاف شروع کی گئی احتجاجی تحریک کے دوسرے مرحلے میں 25 جنوری کو بلوچستان بھر میں شٹر ڈاؤن ہڑتال جبکہ تیسرے مرحلے میں یکم فروری کو پورے صوبے میں پہیہ جام ہڑتال کی کال دی گئی ہے۔ احتجاجی تحریک میں شامل جماعتوں کے رہنماؤں کا کہنا ہے کہ اگر ان کے مطالبات منظور نہ کیے گئے، تو اس احتجا جی تحریک کو اور بھی شدید اور وسیع تر بنا دیا جائے گا۔

رپورٹ: عبدالغنی کاکڑ، کوئٹہ

ادارت: مقبول ملک