بلااجازت لبنانی حدود میں داخل ہونے والے بیس اسرائیلی گرفتار

اسرائیلی میڈیا کے ذریعے آج بروز اتوار موصولہ اطلاعات کے مطابق بیس کے قریب الٹرا آرتھوڈوکس اسرائیلیوں کے ایک گروپ کو قانونی اجازت کے بغیر لبنانی  حدود میں داخل ہونے پر حراست میں لے لیا گیا ہے۔

اسرائیلی پولیس کے مطابق فوج کی جانب سے شکایت کے بعد 20 اسرائیلی شہریوں کو حراست میں لے کر انہیں اسرائیلی سرحدی قصبے کریات شمونہ کے ایک پولیس اسٹیشن لے جایا گیا۔

اسرائیلی میڈیا کے مطابق یہودی شہریوں کا یہ گروہ چوتھی صدی عیسوی کے ایک یہودی عالم کی قبر پر جانا چاہتا تھا، جو لبنان کے ساتھ اسرائیلی سرحد پر منارا کے قریب پہاڑیوں میں واقع ہے۔

پولیس نے اس بات کا اعادہ کیا کہ شہریوں کو سرحدی علاقے میں داخل ہونے یا لبنان کے ساتھ اسرائیلی سرحد عبور کرنے سے سختی سے منع کیا گیا ہے اور اس حکم کی خلاف ورزی پر چار سال تک قید کی سزا ہو سکتی ہے۔

گزشتہ نومبر میں ایک مشہور اسرائیلی تاریخ دان بغیر اجازت کے جنوبی لبنان کے جنگی زون میں فیلڈ ریسرچ کے دوران گولی لگنے سے ہلاک ہو گئے تھے۔ اسرائیل اور ایرانی حمایت یافتہ لبنانی ملیشیا حزب اللہ  کے درمیان جنگ بندی کے موجودہ معاہدے کے باوجود اس نوعیت کے تشدد کے مختلف واقعات رونما ہوتے رہتے ہیں۔

ش ر⁄ م م (ڈی پی اے)