ایس سی او: چینی صدر کا سکیورٹی میکانزم بہتر بنانے پر زور
15 جولائی 2025
چین کے صدر شی جن پنگ نے آج منگل کو دارالحکومت بیجنگ میں شنگھائی تعاون تنظیم (ایس سی او) کے وزرائے خارجہ اور مندوبین کے سربراہوں کے اجلاس سے خطاب کرتے ہوئے کہا کہ موجودہ عالمی صورت حال میں سکیورٹی خطرات اور چیلنجز کا جواب دینے کے طریقہ کار کو بہتر بنانے کی اشد ضرورت ہے۔
چینی خبر رساں ایجنسی ژنہوا کے مطابق صدر شی جن پنگ نے مزید کہا کہ ایس سی او کو اپنے رکن ممالک کے ساتھ ترقیاتی حکمت عملیوں کو ہم آہنگ کرنا چاہیے اور بیلٹ اور روڈ انیشیٹو (بی آر آئی) جیسے اقدامات میں تعاون کرنا چاہیے۔
اس اجلاس کے دوران جن رہنماؤں نے شی جن پنگ سے براہ راست ملاقات کی ان میں روس کے وزیر خارجہ سرگئی لاوروف اور پاکستان کے نائب وزیر اعظم اور وزیر خارجہ محمد اسحٰق ڈار شامل تھے۔
ژنہوا کے مطابق صدر شی جن پنگ نے لاوروف سے کہا کہ دونوں ملکوں کو ایک دوسرے کا تعاون کرنا چاہیے اور ایس سی او کی ایک اسٹریٹیجک پلیٹ فارم کے طور پر پیش رفت کو مضبوط بنانے میں مدد کرنی چاہیے۔
اسحاق ڈار کی چینی صدر سے ملاقات
پاکستان کے نائب وزیر اعظم، وزیر خارجہ سینیٹر محمد اسحٰق ڈار نے شنگھائی تعاون تنظیم (ایس سی او) کے رکن ممالک کے وزرائے خارجہ کی چین کے صدر شی جن پنگ سے مشترکہ ملاقات میں پاکستان کی نمائندگی کی۔
بھارتی وزیر خارجہ ایس جے شنکر نے بھی چینی صدر شی جن پنگ سے ملاقات کی اور بھارتی صدر اور وزیر اعظم کا پیغام پہنچایا۔
ایک سوشل میڈیا پوسٹ میں، جے شنکر نے کہا کہ انہوں نے ملاقات کے دوران وزیر اعظم نریندر مودی اور صدر دروپدی مرمو کا پیغام پہنچایا۔ وزیر خارجہ نے کہا کہ اس سلسلے میں ہمارے لیڈروں کی رہنمائی کی قدر کریں۔
جون 2020 میں وادی گلوان جھڑپوں کے بعد دو طرفہ تعلقات میں کشیدگی کے بعد جے شنکر چین کے اپنے پہلے دورے پر ہیں۔
چینی صدر نے وفود کے سربراہان کا خیرمقدم کرتے ہوئے ایس سی او کے تحت علاقائی تعاون کی اہمیت کو اجاگر کیا، جو یوریشیائی خطے اور دنیا کی بڑی آبادی پر محیط ایک تنظیم ہے۔
شنگھائی تعاون تنظیم 2001 میں قائم کی گئی تھی اور اس کے رکن ممالک میں چین، روس، بھارت، پاکستان، ایران، قازقستان، کرغزستان، ازبکستان، تاجکستان اور بیلاروس شامل ہیں۔
پوٹن کا شی جن پنگ کے نام پیغام
روسی وزارت خارجہ نے اپنے ایک بیان میں کہا کہ سرگئی لاوروف نے چینی رہنما کو روسی فیڈریشن کے صدر ولادیمیر پوٹن کی طرف سے نیک خواہشات اور دوستانہ سلام پہنچایا۔
بیان میں مزید کہا گیا ہے کہ دونوں فریق نے دوطرفہ سیاسی رابطوں اور روسی صدر کا عوامی جمہوریہ چین کے آئندہ دورہ کی تیاریوں سمیت متعدد امور پر تبادلہ خیال کیا۔
روسی صدر پوٹن شنگھائی تعاون تنظیم کے سربراہی اجلاس میں شرکت کے لیے چین جائیں گے اور شی جن پنگ سے بات چیت کریں گے۔ وہ تین ستمبر کو دوسری عالمی جنگ میں جاپان کے خلاف فتح کی سالگرہ کے موقع پر تقریبات میں شرکت کریں گے۔
ادارت: صلاح الدین زین