ایران اسرائیل کشیدگی: بلوچستان میں ایندھن کی قلت

ایرانی ایندھن جو کبھی بلوچستان کو طاقت دیتا تھا، اب وہاں نہیں پہنچ رہا۔ بلوچستان میں ایران سے ایندھن کی ترسیل اکثر غیر رسمی ذرائع سے کی جاتی ہے۔ احد آغا کہتے ہیں، ’’مگر حالیہ سکیورٹی خدشات اور ایران-اسرائیل تنازعے کے باعث بارڈر پر سخت نگرانی اور بندش نے ان ذرائع کو یکسر مسدود کر دیا ہے۔‘‘

بلوچستان کے چیمبر آف کامرس اینڈ انڈسٹری کے سابق صدر بدرالدین خان نے ڈی ڈبلیو کو بتایا کہ صوبے کی معیشت کے ایک بڑے حصے کا انحصار ایران کے ساتھ رسمی اور غیر رسمی تجارتی روابط پر ہے۔ ان کے بقول، ’’پیٹرولیم مصنوعات کی عدم دستیابی کے باعث صوبے میں ٹرانسپورٹ، زراعت اور مقامی صنعتوں کو بھی اربوں روپے کا نقصان ہو رہا ہے۔‘‘

پاکستان آئل مارکیٹنگ ایسوسی ایشن کے ڈائریکٹر عبدالحق اعوان کے مطابق بلوچستان میں 90 فیصد سے زائد پیٹرول پمپوں میں ایران سے اسمگل شدہ ڈیزل اور پیٹرول فروخت ہو رہا تھا۔ ان کے بقول، ایرانی سرحد بند ہونے کے باعث پاکستان کا یہ صوبہ پیٹرولیم مصنوعات کے شدید بحران کی لپیٹ میں ہے۔

پیٹرول اور ڈیزل کی قلت سے روزمرہ کی زندگی متاثر ہونے کے ساتھ ساتھ اشیاء خور و نوش کی قیمتیں بھی تیزی سے بڑھ رہی ہیں۔ یہ بات اقتصادی امور کے تجزیہ کار سید احد آغا نے ڈی ڈبلیو کو بتائی۔ ان کے الفاظ میں، ’’یہ صرف سرحد بند ہونے کا مسئلہ نہیں، بلکہ بلوچستان میں اقتصادی نقل و حرکت کو مکمل طور پر منجمد کر دینے والا بحران ہے۔‘‘

پاکستانی صوبہ بلوچستان میں ایرانی ڈیزل اور پیٹرول نہ صرف گھریلو صارفین بلکہ تجارتی اور زرعی شعبوں میں بھی بڑے پیمانے پر استعمال ہوتا ہے۔ ایرانی ایندھن کی ترسیل کی اچانک بندش کی وجہ سے صوبے میں معیشت بری طرح متاثر ہو رہی ہے۔

بلوچستان حکومت کے ترجمان شاہد رند کہتے ہیں کہ اس بحران پر قابو پانے کے لیے بھرپور اقدامات کیے جا رہے ہیں۔ ایک بیان میں انہوں نے کہا کہ حکومت کو صورتحال کی سنگینی کا اندازہ ہے۔ رند کے بقول، ’’تمام امور کا جائزہ لیا جا رہا ہے، تاکہ اس کشیدہ صورتحال سے عوام کم سے کم متاثر ہوں۔‘‘