ایئر انڈیا حادثہ: صرف تیس سیکنڈ میں طیارہ تباہ، رپورٹ جاری

بھارتی شہر احمد آباد میں گزشتہ ماہ گر کرتباہ ہونے والے ایئر انڈیا کے طیارے کے حادثے کی ابتدائی تحقیقاتی رپورٹ سامنے آ گئی ہے، جس کے مطابق طیارے کے دونوں انجنوں کے فیول کنٹرول سوئچز''رن ‘‘(Run) کی حالت سے ''کٹ آف‘‘(Cutoff) کی پوزیشن میں چلے گئے تھے، جس کے باعث انجنوں کو ایندھن کی فراہمی بند ہو گئی اور طیارہ گر کر تباہ ہو گیا۔

آج بارہ جولائی ہفتے کی صبح جاری کی گئی بھارت کے ''ایئرکرافٹ ایکسیڈنٹ انویسٹی گیشن بیورو‘‘ (AAIB) کی رپورٹ میں بتایا گیا ہے کہ یہ تبدیلی پرواز کے دوران اچانک ہوئی، جس کے فوراً بعد انجن کی طاقت ختم ہو گئی۔ رپورٹ کے مطابق حادثے کے وقت دونوں پائلٹس فیول کنٹرول سوئچ کی پوزیشن میں تبدیلی سے متعلق الجھن کا شکار تھے۔

ایئر انڈیا کی پرواز بوئنگ 787-8 ڈریم لائنر ، 12 جون کو حادثے کا شکار ہوئی تھی، جس میں کم از کم 260 افراد ہلاک ہوئے، جن میں 19 زمین پر موجود افراد بھی شامل ہیں۔ یہ بھارت کی تاریخ کے بدترین فضائی حادثات میں سے ایک تھا۔ طیارے کے 230 مسافروں میں 169 بھارتی، 53 برطانوی، سات پرتگالی، ایک کینیڈین اور 12 عملے کے ارکان شامل تھے۔ اس حادثے میں صرف ایک مسافر زندہ بچا۔

رپورٹ کے مطابق پرواز محض 30 سیکنڈز جاری رہی۔ طیارے کے اپنی بلند ترین ریکارڈ شدہ رفتار تک پہنچنے کے بعد، ''انجن ون اور انجن ٹو کے فیول سوئچ یکے بعد دیگرے کٹ آف پوزیشن پر چلے گئے،‘‘ رپورٹ میں یہ واضح نہیں کیا گیا کہ پرواز کے دوران یہ سوئچ کیسے خود بخود یا غلطی سے تبدیل ہوئے۔ تحقیقات میں یہ بات بھی سامنے آئی کہ اگرچہ سوئچ دوبارہ ''رن‘‘ پوزیشن میں کیے گئے، لیکن طیارہ دوبارہ طاقت حاصل نہیں کر سکا اور اس وقت تک نیچے گرنا شروع ہو چکا تھا۔

رپورٹ کے مطابق ایک پائلٹ نے ایمرجنسی سگنل ''مے ڈے، مے ڈے، مے ڈے‘‘ بھی نشر کیا۔ کاک پٹ وائس ریکارڈر میں حادثے سے چند لمحے قبل ایک پائلٹ دوسرے سے یہ پوچھتے ہوئے سنا گیا کہ اُس نے فیول کیوں بند کیا؟ جس پر دوسرے پائلٹ نے جواب دیا کہ اُس نے ایسا نہیں کیا۔ رپورٹ میں بوئنگ کمپنی کے خلاف کوئی فوری سفارش یا اقدام تجویز نہیں کیا گیا۔ ایئر انڈیا نے ایک بیان میں کہا ہے کہ وہ تحقیقات میں مکمل تعاون فراہم کر رہی ہے۔

ایئر لائن کے ترجمان کے مطابق، ''ایئر انڈیا تمام اسٹیک ہولڈرز اور ریگولیٹرز کے ساتھ قریبی رابطے میں ہے اور ہم AAIB اور دیگر متعلقہ اداروں کے ساتھ مکمل تعاون جاری رکھے ہوئے ہیں۔‘‘ حادثے کے بعد طیارے کا بلیک باکس، جس میں کاک پٹ کی آوازیں اور پرواز کے تکنیکی اعداد و شمار محفوظ ہوتے ہیں، بازیاب کر لیا گیا اور بھارت میں اس کا ڈیٹا حاصل کیا گیا۔ بھارتی حکام نے حادثے کے بعد ایئر انڈیا کے تمام بوئنگ 787 ڈریم لائنر طیاروں کی جامع جانچ کا حکم بھی دیا ہے۔ ایئر انڈیا کے بیڑے میں اس وقت 33 ڈریم لائنر طیارے شامل ہیں۔

ادارت: عاطف بلوچ