اٹلی میں نئی حکومت اقتدار میں آ گئی

مرکز سے بائیں بازو کی طرف جھکاؤ رکھنے والے ڈیموکریٹک پارٹی کے سیاستدان اینریکو لیٹا کی سربراہی میں روم میں نئی حکومت کے اقتدار میں آنے سے وہ طویل سیاسی جمود ختم ہو گیا ہے، جو دو ماہ قبل ہونے والے عام انتخابات کے بعد سے آج تک کوئی حکومت قائم نہ ہو سکنے کی وجہ سے پیدا ہوا تھا۔

وزیر اعظم کے دفتر کے سامنے فائرنگ

آج وزیر اعظم کے دفتر کے سامنے فائرنگ کرنے والا شخص ایک ایسا 49 سالہ شہری بتایا گیا ہے جو پہلے کسی جرم کا مرتکب نہیں ہوا تھا۔ اس ملزم نے وزیر اعظم کے سرکاری دفتر کے سامنے فائرنگ کر کے جن دو افراد کو زخمی کر دیا، وہ دونوں پولیس اہلکار ہیں۔ حکام یہ پتہ چلانے کی کوشش کر رہے ہیں کہ بظاہر اس بے روزگار ملزم نے فائرنگ کیوں کی۔

یہ فائرنگ اس وقت کی گئی جب نئے وزیر اعظم لیٹا اپنی کابینہ کے ارکان کے ہمراہ قریب ایک کلو میٹر دور وسطی روم ہی میں واقع صدارتی محل میں صدر ناپولیتانو کی موجودگی میں اپنے عہدوں کا حلف اٹھا رہے تھے۔ اس فائرنگ کے فوری بعد موقع پر موجود اہلکاروں نے ملزم پر قابو پا لیا، جو اس وقت پولیس کی حراست میں ہے۔

فائرنگ کے اس واقعے کے بعد روم کے میئر جیانی آلیمانو نے کہا کہ وزیر اعظم کے دفتر کے باہر فائرنگ ایک افسوسناک واقعہ ہے لیکن یہ ایک فرد کا انفرادی فعل ہے جس کا دہشت گردی سے کوئی تعلق نہیں ہے۔

کابینہ میں خواتین کی ریکارڈ تعداد

اٹلی میں وزیر اعظم لیٹا کی جس کابینہ نے آج حلف اٹھایا، اس میں 21 وزراء شامل ہیں۔ نئے وزیر اعظم نے اپنی کابینہ اور اس میں شامل کی گئی شخصیات کے بارے میں اپنے اطمینان کا اظہار کرتے ہوئے کہا کہ وہ نہ صرف اپنی کابینہ میں وزراء کے انتخاب سے مطمئن ہیں بلکہ پہلی مرتبہ اطالوی حکومت میں خواتین کو ریکارڈ حد تک زیادہ نمائندگی ملی ہے۔

اینریکو لیٹا کی کابینہ میں سات وزراء کو شامل کیا گیا ہے، جس کا مطلب یہ ہے کہ کُل وزارتی عہدوں میں سے ٹھیک ایک تہائی پر خواتین کی تقرری عمل میں آئی ہے۔ نئی اطالوی کابینہ میں پہلی مرتبہ ایک ایسی سیاسی شخصیت کو بھی وزیر بنایا گیا ہے، جس کا تعلق پیدائشی طور پر افریقہ سے ہے۔ یہ خاتون سیاستدان پیشے کے اعتبار سے آنکھوں کی ڈاکٹر ہیں، وہ ڈیموکریٹک ریپبلک کانگو میں پیدا ہوئی تھیں اور انہیں سماجی انضمام کی نئی وزیر بنایا گیا ہے۔

روم میں یہ مخلوط حکومت لیٹا کی بائیں بازو کی ڈیموکریٹک پارٹی کے لیے دائیں بازو کی قدامت پسند سیاسی جماعت پیپلز آف فریڈم پارٹی کی طرف سے حمایت کے بعد قائم ہو سکی۔ لیٹا حکومت میں نائب وزیر اعظم کا عہدہ پیپلز آف فریڈم پارٹی کے انجلینو الفانو کو دیا گیا ہے۔ الفانو وزارت داخلہ کا قلمدان بھی سنبھالیں گے۔ مالیات اور اقتصادیات کی بہت اہم لیکن چیلنج سمجھی جانے والی وزارت فابریزیو ساکومانی کو دی گئی ہے۔ انسانی حقوق کی سرگرم کارکن اور یورپی یونین کی سابقہ کمشنر ایما بونینو کو وزیر خارجہ کا عہدہ دیا گیا ہے۔

mm / ij (dpa)