امریکی یوم آزادی پر حب الوطنی کا عوامی اظہار

امریکا کا شمار دنیا کی قدیم ترین جمہوری ریاستوں میں ہوتا ہے۔ اس سال بھی موسم گرما کے عروج پر یہ قومی تعطیل سرکاری تقریبات، پریڈز، کنسرٹس، عوامی میلوں اور آتشبازی کے مظاہروں کے ساتھ منائی گئی۔ امریکی یوم آزادی کے موقع پر رنگا رنگ آتشبازی کی روایت تو اتنی پرانی ہے جتنی خود اس ملک کی آزادی کی تاریخ۔

امریکا کے اعلان آزادی کی دستاویز پر دستخط سن 1776 میں فلاڈلفیا میں کیے گئے تھے۔ اس تقریب کے اگلے ہی روز امریکا کے دوسرے صدر جان ایڈمز نے پہلی مرتبہ آتشبازی کا ذکر کرتے ہوئے اپنی بیوی کے نام ایک خط میں لکھا تھا، ‘اس براعظم کے ایک سرے سے دوسرے سرے تک چراغاں کیا جانا چاہیے، اب سے لے کر آنے والے تمام وقتوں میں، ہمیشہ زیادہ سے زیادہ۔‘

اس سال امریکی ریاست نیو یارک نے اعلان آزادی کا احترام کرنے کا طریقہ یہ نکالا کہ اس اعلان کی تاریخی دستاویز کو تین روز تک نیو یارک شہر کی پبلک لائبریری میں نمائش کے لیے رکھا گیا۔ عوامی نمائش کے لیے بہت کم ہی رکھی جانے والی اس منفرد دستاویز کی خاص بات یہ ہے کہ اس اعلان آزادی کو امریکا کے تیسرے صدر ٹامس جیفرسن نے اپنے ہاتھ سے لکھا تھا۔

خبر رساں ادارے ڈی پی اے کے مطابق اس ہفتے پیر سے لے کر بدھ کے دن تک نیو یارک میں اس اعلان آزادی کی دستاویز کے ساتھ جو دیگر تاریخی دستاویزات بھی نمائش کے لیے رکھی گئیں، ان میں بل آف رائٹس کی اصلی دستاویز بھی شامل تھی۔ یہ دستاویز سن 1789 میں لکھی گئی تھی اور اس میں امریکی آئین میں پہلی دس ترامیم کو یکجا کر دیا گیا تھا۔

نیو یارک شہر کی پبلک لائبریری کے صدر ٹونی مارکس نے اس نمائش کی جگہ کی علامتی اہمیت کی وضاحت کرتے ہوئے کہا کہ باخبر شہریوں پر مشتمل امریکی جمہوریت کو اس کی اصلی بنیادیں فراہم کرنے میں تعلیم اور معلومات کے حصول میں لائبریریوں کے کردار کا کوئی متبادل نہیں ہے۔

دارالحکومت واشنگٹن میں چار جولائی کا دن آتشبازی کے ایک بہت بڑے عوامی مظاہرے کے ساتھ منایا گیا۔ اس سے قبل وہاں نیشنل مال پر ایک بہت بڑا کنسرٹ بھی منعقد کیا گیا تھا جس میں Barry Manilow نے اپنی گلوکاری کا شاندار مظاہرہ کیا۔

اس کے علاوہ ریاستی، شہری اور بلدیاتی علاقوں کی سطح پر بھی امریکا کی تمام پچاس ریاستوں میں یوم آزادی کے موقع پر لاتعداد عوامی میلوں اور پریڈز کا اہتمام کیا گیا جن میں عام شہریوں نے قومی پرچم لہرا کر اور دیگر ذرائع سے اپنے وطن سے محبت کا اظہار کیا۔