افغان دستوں کی تعداد میں کمی نہ کی جائے، سی این اے

ورجینیا میں قائم "نیول انیلیسزسینٹر" ’سی این اے‘ کی جانب سے کرائے جانے والے اس جائزے میں افغان سلامتی کے دستوں کی تعداد کوکم کرنے کے عمل سے خبردار کیا گیا ہے۔ افغانستان میں سکیورٹی فورسز کے اہلکاروں کی موجودہ تعداد تین لاکھ اسی ہزار کے لگ بھگ ہے اور کابل حکومت اسے کم کر کے تقریباً دو لاکھ اٹھائیس ہزار کرنا چاہتی ہے۔ اس امریکی ادارے کے جائزے کے مطابق اگر ایسا کیا گیا تو افغانستان ایک مرتبہ پھر دہشت گردوں کی آماجگاہ بن سکتا ہے۔ امریکا کسی بھی صورت یہ نہیں چاہتا کہ 2014ء کے بعد دنیا بھر کے دہشت گرد افغانستان کا رخ کریں۔

اس رپورٹ میں ماہرین نے تجویز دی ہے کہ بین الاقوامی برادری کو افغان نیشنل سکیورٹی فورس ’ اے این ایس ایف‘ کے لیے ایک منصوبہ بنانا چاہیے تاکہ غیر ملکی فوجوں کے نکلنے کے بعد 2018ء تک ان کی تعداد میں کوئی کمی نہ آئے۔

اس جائزے میں امریکی کانگریس سے درخواست کی گئی کہ وہ افغان فوج کے لیے اضافی امداد پر غور کرے کیونکہ پینٹاگون کو بھی بجٹ میں شدید کمی کا سامنا ہے۔ اس دوران امریکا اور مغربی دفاعی اتحاد نیٹوایک ایسے فوجی مشن پر صلاح و مشورے کر رہے ہیں، جو 2014ء کے بعد افغان دستوں کو تربیت فراہم کر سکے۔ افغان صدر حامد کرزئی کی جانب سے امریکا کے ساتھ سلامتی کے معاہدے پر دستخط نہ کرنے کی وجہ سے یہ معاملہ بھی کھٹائی میں پڑ گیا ہے۔ تاہم امریکا کا کہنا ہے کہ اگر معاہدے پر دستخط نہ ہوئے تو وہ اپنے تمام فوجی افغانستان سے واپس بلا لے گا۔

پینٹاگون کے ترجمان ریئر ایڈمرل جان کربی نے اس بات کو تسلیم کیا کہ طالبان عسکریت پسندی افغانستان کی سلامتی کے لیے ابھی بھی ایک بہت بڑا خطرہ ہے۔ انہوں نے کہا کہ بات درست ہے کہ افغان دستوں کو غیر ملکی تعاون کی ضرورت ہے اور اسی وجہ سے اتحادی افواج چاہتی ہیں کہ 2014ء کے بعد بھی تربیتی مقاصد کے لیے افغانستان میں ایک مشن تعینات کیا جائے۔

نیول انیلیسزسینٹر’سی این اے‘ کے اس جائزے میں یہ امر بھی واضح کیا گیا ہے کہ مشکل اور پیچیدہ کارروائیوں کے دوران افغان فورسزکو ابھی بھی مشکلات کا سامنا کرنا پڑتا ہے اور اس حوالے سے ابھی انہیں مزید تربیت کی ضرورت ہے۔ اسی وجہ سے زور دیا گیا ہے کہ کم از کم 2018ء تک عسکری شعبے کے ماہرین کو تربیتی مقاصد کے لیے افغانستان میں تعینات کیا جائے۔ سی این اے کے مطابق القاعدہ کا ایک گروپ افغانستان میں موجود ہے۔ اس میں زیادہ تر وہ لوگ شامل ہیں، جنہوں نے مقامی گھرانوں میں شادیاں کی ہوئی ہیں یا ان کے افغانی اور پاکستانی شدت پسندوں کے ساتھ قریبی روابط ہیں۔