یورپ میں سگریٹ اسمگلنگ تشویشناک حد تک

جرمن شہر ڈریسڈن میں کسٹم کی چھاپہ مار ٹیم کی بیانکا رشٹر نے بتایا کہ ابھی حال ہی میں انہوں نے اسمگل ہو کر جرمنی لائے جانے والے سگریٹ بڑی تعداد میں ضبط کیے ہیں۔ ان کا کہنا ہے کہ انہیں شک ہے کہ یہ تمباکو مشرقی جرمن صوبوں سیکسنی اور تھورنگیا کے لیے تھا۔ حکام کو اس کی خوشی تھی کہ اس چھاپے سے وہ کسی بڑے مجرم تک پہنچنے میں کامیاب ہو گئے ہیں تاہم بعد ازاں پتہ چلا کہ یہ گروپ بہت سے چھوٹے اسمگلر گروپوں میں سے ایک تھا۔ وہ بتاتی ہیں کہ پہلے سگریٹ بڑے بڑے کنٹینرز میں اسمگل کیے جاتے تھے تاہم اب چھوٹی چھوٹی گاڑیاں اس کام کے لیے استعمال کی جاتی ہیں۔ اس کے علاوہ ٹرین میں بڑے بڑے سفری بیگوں میں سگریٹ کے ڈبے بھرکر بھی اسمگلنگ کی جاتی ہے۔

27 رکنی یورپی یونین کو ہر سال سگریٹ کی اسمگلنگ کی وجہ سے تقریباً دس ارب یورو کا نقصان ہوتا ہے۔ یہ صرف ایک اندازہ ہے جبکہ کچھ ذرائع تو اس نقصان کا تخمینہ 15ارب یورو لگا رہے ہیں۔ اس سلسلے کو روکنے کے لیے یورپی کمیشن نے یورپی سطح پر پولیس کے تعاون کو بڑھانے اور موثر بنانے کے علاوہ سگریٹ بنانے والی کمپنیوں سے بھی رابطہ کیا ہے۔ کیونکہ سگریٹ بنانے والی کمپنیوں کو بھی اسمگلنگ کی وجہ سے نقصان اٹھانا پڑتا ہے۔

یورپی کمیشن نے گزشتہ تین برسوں سے سگریٹ بنانے والی کمپنیوں پر دباؤ بڑھایا ہوا ہے۔ اس تناظر میں یورپی کمیشن نے چار بڑی کمپینوں کے ساتھ معاہدے بھی کیے ہیں۔ ان کے تحت یہ کمپنیاں اسمگلنگ کو روکنے کے لیے برسلز حکام کا ساتھ دیں گی۔ اب ان کمینپوں پر یہ بتانا بھی لازم ہو گیا ہے کہ کتنی سگریٹیں کہاں بھیجی جا رہی ہیں۔

یورپ میں دھوکہ دہی کے خلاف ادارے اولاف کے اوسٹن رووان کہتے ہیں کہ اس سلسلے میں پہلا قدم اٹھا لیا گیا ہے تاہم ابھی مزید اقدامات کی ضرورت ہے۔ وہ کہتے ہیں کہ سگریٹ کی اسمگلنگ روکنے میں ایک بڑی رکاوٹ مختلف ممالک میں اس کی مختلف قیمتیں بھی ہیں۔ سفید روس میں ایک گاڑی کو ایک لاکھ سگریٹوں سے بھرنے کی قیمت 30 ہزار یورو ہوتی ہے۔ پولینڈ میں اس گاڑی کی قیمت ایک لاکھ یورو ہو جاتی ہے جبکہ جرمنی پہنچتے پہنچتے اس کی قیمت ڈھائی لاکھ یورو ہو چکی ہوتی ہے۔ اور اگر یہ گاڑی انگلینڈ یا اسکینڈی نیویائی ممالک تک پہنچ جائے تو اس کے پانچ لاکھ یورو ملتے ہیں۔

A.Berger / ai / km