یورپی یونین میں توسیع فی الوقت ممکن نہیں، جرمن پارلیمان کے اسپیکر

جرمن ایوان زیریں کے اسپیکر نوربرٹ لامرٹ نے ہفتے کے دن کہا کہ ستائیس رکن ممالک کے اس بلاک میں شامل ریاستوں کو ابھی بہت سا کام کرنا ہے۔ خبر رساں ادارے روئٹرز نے لامرٹ کے حوالے سے بتایا ہے کہ یورپی یونین میں فی الحال مزید توسیع ممکن نہیں ہے۔

اتوار کے دن جرمن اخبار ’ویلٹ ام زونٹاگ‘ میں شائع ہونے والے ایک انٹرویو میں لامرٹ نے کہا، ’’میں نہیں سمجھتا کہ یورپی یونین فوری طور پر توسیع کی متحمل ہو سکتی ہے۔‘‘ انہوں نے کہا کہ یورپی یونین کو ابھی متعدد اہم کام کرنا ہیں تاکہ اس بلاک کو مزید مضبوط بنایا جا سکے۔

جرمن پارلیمان کے اسپیکر کے اس تازہ بیان پر یورپی ملک کروشیا کو مایوسی ہو سکتی ہے کیوں کہ وہ 2013ء میں یورپی یونین کا حصہ بننے کی امید رکھتا ہے۔ اسی طرح بلقان کی کئی ریاستیں بھی یورپی یونین میں شامل ہونے کی کوشش میں ہیں تاہم وہ ابھی تک ایسے معیارات کو پورا نہیں کرتیں جو یورپی یونین کے رکن بننے کے لیے ناگزیر ہیں۔

لامرٹ نے کروشیا کو فوری طور پر یورپی یونین کا حصہ بنانے کے فیصلے پر خبردار کرتے ہوئے کہا، ’’ہمیں کسی فیصلے سے قبل یورپی کمیشن کی تازہ ترین پراگریس رپورٹ کا مطالعہ سنجیدگی سے کرنا چاہیے، بالخصوص بلغاریہ اور رومانیہ کے تجربات کے حوالے سے۔ کروشیا اب تک یورپی یونین کا رکن ملک بننے کے لیے مکمل طور پر تیار نہیں ہوا ہے۔‘‘

قدامت پسند حکمران سیاسی جماعت کرسچن ڈیموکریٹک یونین یا سی ڈی یو سے تعلق رکھنے والے سیاستدان لامرٹ نے مزید کہا کہ سابق یوگوسلاویہ کی ریاستیں بھی یورپی یونین کا حصہ بن سکتی ہیں تاہم اس کے لیے انہیں مطلوبہ معیارات پر پورا اترنا ہو گا۔

یہ امر اہم ہے کہ اس وقت یورو بحران کے نتیجے میں یورپی یونین کی رکن ریاستیں اقتصادی مسائل کا شکار ہیں۔ ناقدین کے بقول اس صورت حال میں یورپی یونین میں مزید توسیع کے منصوبوں پر کوئی خاص گرم جوشی کا مظاہرہ نہیں کیا جا رہا ہے۔

( ab /shs (Reuters,dpa, AFP