ہیملٹن نے اطالوی گراں پری جیت لی

ستائیس سالہ لوئس ہیملٹن نے اپنی مکلارن ٹیم کے لیے ہفتے کو پول پوزیشن حاصل کی تھی اور انہوں نے اتوار کو یہ ریس اسی پوزیشن سے شروع کی۔

2008ء کے اس عالمی چیمپئن ڈرائیور کے لیے رواں سیزن میں پول پوزیشن کے حصول کا یہ چوتھا موقع تھا۔ دوسرے نمبر پر انہی کی ٹیم کے جینسن بٹن رہے تھے جو گزشتہ ویک اینڈ کی بیلجیئن گراں پری میں فاتح رہے تھے۔

اتوار کی ریس میں میکسیکو کے سیرگیو پیریز دوسرے نمبر پر جبکہ فیراری ٹیم کے الونسو فرنانڈو تیسرے نمبر پر رہے ہیں۔

الونسو نے گرِڈ پر دسویں پوزیشن سے ریس کا آغاز کیا تھا جبکہ پیریز نے بارہویں پوزیشن سے آغاز کیا تھا اور وہ ہیملٹن سے چار اعشاریہ تین سیکنڈز پیچھے رہے۔

برازیل کے فیلپے میسا چوتھے نمبر پر رہے جبکہ فن لینڈ کی کِمی رائیکونن پانچویں نمبر پر رہے۔

ریڈ بُل کے ورلڈ چیمپئن جرمن ڈرائیور سباستیان فیٹل ریس کے آغاز پر الونسو کے قریب ترین حریف تھے تاہم وہ اپنی گاڑی میں تکنیکی خرابی کے باعث ریس ختم سے کچھ دیر پہلے ریٹائر ہو گئے۔

مکلارن کے جینسن بٹن بھی ریس مکمل کرنے میں ناکام رہے۔ بٹن کے ریس سے نکلنے کا فائدہ پیریز کو پہنچا۔ ان کے لیے رواں سیزن میں ٹاپ تھری میں آنے کا یہ تیسرا موقع تھا۔ خبر رساں ادارے اے ایف پی نے مبصرین کے حوالے سے بتایا ہے کہ پیریز اب آگے بڑھ رہے ہیں اور آئندہ برس وہ فیراری میں ماسا کی جگہ لے سکتے ہیں۔

لوئس ہیملٹن کی جانب سے آئندہ سیزن میں مکلارن ٹیم چھوڑتے ہوئے مرسڈیز میں جانے کی قیاس آرائیاں پائی جاتی ہیں۔ اس حوالے سے تین مرتبہ فارمولا وَن ورلڈ چیمپیئن بننے والے جیکی اسٹیورٹ نے ہیملٹن کو مشورہ دیا ہے کہ وہ مکلارن ٹیم نہ چھوڑیں۔

ریٹائرڈ چیمپیئن اسٹیورٹ نے یہ بیان ہفتے کو اطالوی گراں پری کے لیے ہیملٹن کے پول پوزیشن تک پہنچنے کے بعد دیا۔ انہوں نے صحافیوں سے بات چیت میں کہا کہ ہیملٹن کتنا خوش قسمت ہے، شاید اسے اس بات کا اندازہ نہیں ہے۔

اسٹیورٹ نے یہ بھی کہا کہ مکلارن کے بغیر ہیملٹن آج اس مقام پر نہ ہوتا اور اسے وفاداری کا مظاہرہ کرنا چاہیے۔

ng / aba (AP, Reuters, AFP)