ہوفن ہائم لیگ میں رہنےکی تگ و دو میں

اپنے نئے کوچ مارکوس گِزڈول کے ساتھ پہلی بار میدان میں اترنے والی ہوفن ہائم کی ٹیم نے میچ کے آغاز ہی سے ڈسلڈورف کے خلاف متحد اور منظم کھیل کا مظاہرہ کرتے ہوئے شاندار کارکردگی کا مظاہرہ کیا۔ کھیل کے 11ویں منٹ میں روبرٹو فرمینو نے گول کر کے ہوفن ہائم کو برتری دلائی۔

ڈسلڈورف نے اس برتری کو ختم کرنے کی بھرپور کوشش کی، تاہم وہ فٹ بال کو ہوفن ہائم کے گول میں پہنچانے میں ناکام رہی۔ ڈسلڈورف میں کھیلنے والی ہوفن ہائم کو دوسری کامیابی کھیل کے اختتام سے 15 منٹ قبل تب ملی جب سیجد سالیہووچ کی طرف سے کارنر کک ڈسلڈورف کے کھلاڑی آندریاس لامبرٹس کے سر سے ٹکراتی ہوئی اپنے ہی گول میں چلی گئی۔

ہوفن ہائم کی جانب سے کھیل کے اختتام سے کچھ لمحے قبل ایک جوابی حملے میں سالیہووچ نے ایک اور گول کر کے اس برتری کو تین صفر کر دیا۔

ڈسلڈورف کے مِڈ فیلڈر ایکسل بیلِنگ ہاؤزن نے میچ کے بعد اپنے ایک انٹرویو میں کہا، ’میں اپنی ٹیم میں سے کسی کو یہ الزام نہیں دے سکتا کہ اس نے گول کرنے کی پوری کوشش نہیں کی۔ تاہم ہمیں کامیابی نہیں ملی‘‘۔

ہوفن ہائم کی جانب سے منگل کے روز مینیجر آندریاس میولر اور کوچ مارکو کورز کو برطرف کیا گیا تھا۔ اس وقت ہوفن ہائم کی ٹیم 23 پوائنٹس کے ساتھ لیگ میں 17 ویں پوزیشن پر ہے۔ لیگ میں شامل 18 ٹیموں میں سے آخری دو ٹیموں کو تنزلی کے ساتھ بنڈس لیگا 2 میں بھیج دیا جاتا ہے، جب کہ 16 نمبر پر موجود ٹیم کو پلے آف کھیلنا پڑتا ہے۔ اسی طرح بنڈس لیگا 2 میں شامل ٹیموں میں سے پہلی دو پوزیشن پر آنے والی ٹیموں کو بنڈس لیگا میں داخل کر لیا جاتا ہے اور 16ویں نمبر پر آنے والی ٹیم کو بنڈس لیگا 2 میں تیسرے نمبر پر آنے والی ٹیم کے خلاف دو پلے آف میچز کھیلنے پڑتے ہیں، جس کے ذریعے یہ طے ہوتا ہے کہ آیا 16 ویں پوزیشن پر آنے والی ٹیم لیگ میں موجود رہے گی، یا بنڈس لیگا 2 میں تیسرے نمبر پر آنے والی ٹیم کو جرمنی کی قومی فٹ بال لیگ میں شامل کیا جائے گا۔

بنڈس لیگا پوائنٹس ٹیبل:

28 ویں میچ ڈے کے آغاز پر بائرن میونخ پوائنٹس ٹیبل پر 72 پوائنٹس کے ساتھ سرفہرست ہے اور لیگ میں اس کی کامیابی یقینی ہے۔ دوسرے نمبر پر موجود دفاعی چیمپئن ڈورٹمنڈ کے 52 پوائنٹس ہیں۔ اس طرح ان دونوں ٹیموں کے درمیان 20 پوائنٹس کا فرق ہے۔ لیگ میں تیسری پوزیشن پر لیورکوزن کی ٹیم ہے، جس کے 48 پوائنٹس ہیں جب کہ شالکے اور فرینکفرٹ 42،42 پوائنٹس کے ساتھ چوتھی اور پانچویں پوزیشنوں پر ہیں۔

(at/ab (dpa