ہملٹن ہنگری گراں پری میں کامیاب

لوئیس ہملٹن نے ہنگری گراں پری کا آغاز سبقت سے کیا اور انجام تک ان کو کسی اور ڈرائیور کی جانب سے چیلنج کا سامنا نہیں رہا۔ آخری لیپ میں لوٹس ٹیم کے رائیک کنن اور گروژاں نے ان کو ضرور پریشان کیا لیکن وہ آگے نکلنے سے قاصر رہے۔ خاص طور پر رائیکنن ان کے بہت قریب پہنچ گئے تھے۔

ہملٹن نے ریس کے دوران مسلسل اپنی برتری کو بقیہ ڈرائیوروں پر قائم رکھا۔ اس دوران چند مرتبہ کچھ اور ڈرائیوروں نے بھی آگے نکلنے کی ضرور کوشش کی لیکن ہملٹن نے کوئی ایسی کوشش کامیاب نہیں ہونے دی اور آخرکار وہ ریس جیت کر ڈرائیور چیمپئن شپ کے ٹیبل پر چوتھی پوزیشن پر پہنچ گئے ہیں۔

لوئیس ہملٹن کے پروفیشنل کیریئر میں یہ سولہویں کامیابی تھی۔ ہنگری گراں پری کے ٹریک کے لیے مقرر راؤنڈز کو انہوں نے ایک گھنٹے اور 41 منٹوں میں مکمل کیا۔ وہ اب تک تین مرتبہ ہنگری گراں پری جیتنے کا اعزاز حاصل کر چکے ہیں۔ رواں سیزن میں وہ دوسری ریس جیتنے میں کامیاب رہے۔ وہ چند سال قبل ڈرائیور چیمپئن شپ بھی جیت چکے ہیں۔ ابھی رواں برس کے فارمولا ون سیزن کی نو مزید ریسز باقی ہیں اور اگر ہملٹن مزید کچھ مقابلے جیت گئے تو وہ چیمپئن شپ کے ٹیبل پر پہلی پوزیشن کے حامل فرنانڈو الونسو کو مات دینے کی پوزیشن میں آ سکتے ہیں۔

ہنگری گراں پری میں دوسری پوزیشن لوٹس ٹیم کے فن لینڈ کے ڈرائیور کِمی رائیکنن (Kimi Räikkönen) کو حاصل ہوئی۔ تیسری پوزیشن فرانسیسی ڈرائیور روماں گروژاں (Romain Grosjean)  نے حاصل کی۔ رائیک کنن اور گروژاں لوٹس ٹیم کے پارٹنر ہیں۔  ہنگری میں مکمل ہونے والے فارمولا ون کار ریسنگ مقابلے میں چوتھے مقام پر دفاعی چیمپئن سیباستیان فیٹل رہے۔ ہنگری گراں پری میں الونسو کو پانچویں اور جینسن بٹن کو چھٹی پوزیشن ملی۔

جرمنی کے تاریخ ساز فارمولا ون ڈرائیور میشائل شوماخر کی ریٹائرمنٹ کے بعد واپسی میں ابھی تک کامیابی کا عنصر ناپید ہے۔ وہ اپنے تمام تر دعووں کے ساتھ مرسیڈیز گاڑی کو کوئی بڑی پوزیشن دلوانے میں ناکام رہنے کے علاوہ خود کو کسی گراں پری میں ٹاپ فائیو کی فہرست میں بھی داخل کروانے میں کامیاب نہیں ہو سکے ہیں۔اس طرح واپسی کے سفر میں مایوسی کے سوا ان کو کچھ حاصل نہیں ہو سکا۔ ہنگری گراں پری میں انہوں نے اس احساس کے ساتھ مرسیڈیز کا انجن بند کر دیا کہ وہ بہت گرم ہو گیا ہے۔ انجام کار ان کو پنالٹی کا سامنا کرنا پڑا۔ بعد میں وہ دوران ریس ریٹائر ہو گئے۔ ان کو اٹھارہویں پوزیشن حاصل ہوئی ہے۔

فارمولا ون کار ریسنگ کی ڈرائیور چیمپئن شپ میں اس وقت ہسپانوی ڈرائیور فرنانڈو الونسو کو پہلا مقام حاصل ہے۔ ان کے کل پوائنٹس کی تعداد 164 ہے۔ دوسرے مقام پر 124 پوائنٹس کے ساتھ برطانوی ڈرائیور جینسن بٹن ہیں۔ تیسری پوزیشن 122 پوائنٹس کے ساتھ موجودہ دفاعی چیمپئن سیباستیان فیٹل کے پاس ہے۔ ہنگری گراں پری کو جیتنے والے لوئیس ہملٹن کے پوائنٹس 117 ہیں اور انہیں چوتھا مقام حاصل ہے۔ پوائنٹس ٹیبل پر پانچویں پوزیشن کمی رائیکنن کو حاصل ہے اور ان کے پوائنٹس کی تعداد 116 ہے۔ اس طرح یہ خیال کیا جا رہا ہے کہ سال کے آخر تک ڈرائیور چیمپئن شپ کے حصول کا مقابلہ سخت ہو سکتا ہے۔

ah/ng (AP)