گاؤک کی پیریز سے ملاقات، ایرانی جوہری پروگرام پر تشویش

اس ملاقات میں دوطرفہ روابط کے علاوہ خطے کی موجودہ صورت حال اور ایران کے متنازعہ ایٹمی پروگرام کے بارے میں بھی تبادلہ خیال کیا گیا۔

وفاقی جرمن صدر کل پیر کی سہ پہر اسرائیل پہنچے تھے جہاں یروشلم میں آج منگل کو انہوں نے اسرائیلی صدر شمعون پیریز کے ساتھ باضابطہ مذاکرات کیے۔ اس ملاقات میں شمعون پیریز نے جرمنی اور اسرائیل کے درمیان دوستی پر زور دیتے ہوئے دونوں ریاستوں کے مابین قریبی روابط کا ذکر کیا جبکہ صدر گاؤک نے کہا کہ جرمنی اسرائیل کے ریاستی وجود کے حق کی مکمل حمایت کرتا ہے لیکن ساتھ ہی برلن کو یہ امید بھی ہے کہ اسرائیل اور فلسطینیوں کے مابین بالآخر امن قائم ہو جائے گا۔

ملاقات کے بعد دونوں رہنماؤں نے ایک مشترکہ پریس کانفرنس سے خطاب بھی کیا۔ اس موقع پر جرمن سربراہ مملکت نے کہا کہ اسرائیل اور فلسطینیوں کے درمیان حتمی امن براہ راست مکالمت کے نتیجے میں طے پانے والے دو ریاستی حل کے ذریعے ہی ممکن ہے۔

عرب دنیا میں آنے والی حالیہ تبدیلیوں کے بارے میں یوآخم گاؤک نے کہا کہ ان کا مؤقف بڑا واضح ہے اور وہ یہ کہ مصر اور پورے خطے میں جو تبدیلیاں آئی ہیں، ان کا لازمی طور پر نتیجہ زیادہ جمہوریت اور انسانی حقوق کے احترام کی صورت میں نکلنا چاہیے۔

اس موقع پر اسرائیلی صدر پیریز نے شام میں بحرانی حالات پر اظہار رائے کرتے ہوئے کہا کہ شامی صدر بشار الاسد اپنے ملک میں اپنے ہی لوگوں کے قتل کے مرتکب ہو رہے ہیں۔ شمعون پیریز کے بقول شامی عوام کو اسد انتظامیہ سے نجات حاصل کرنے کے لیے مدد کی ضرورت ہے۔

اس سے قبل صدر پیریز نے ایرانی ایٹمی پروگرام کا ذکر کرتے ہوئے کہا کہ ایران اسرائیل کو ایک نئے ہولوکاسٹ کی دھمکی دے رہا ہے جسے نظر انداز نہیں کیا جا سکتا۔ اسی بارے میں جرمن صدر گاؤک نے اپنی تشویش کا اظہار کرتے ہوئے کہا،

’ایرانی قیادت کے بیانات سے صرف اسرائیل ہی کے لیے ٹھوس خطرے کا اظہار نہیں ہوتا بلکہ یہ بیانات خطے اور یورپ تک کے لیے ایک ممکنہ خطرہ ہیں۔‘

جرمن اور اسرائیلی صدور نے آج یروشلم میں اپنی ملاقات کے بعد اسی شہر میں یاد واشیم کہلانے والے ہولوکاسٹ میوزیم کا دورہ بھی کیا۔

آج ہی بعد ازاں جرمن سربراہ مملکت کو یروشلم میں اسرائیلی وزیر خارجہ ایوگڈور لیبرمین اور اپوزیشن رہنما شیلی یاخیمووچ سے بھی علیحدہ علیحدہ ملاقاتیں کرنا تھیں۔ یوآخم گاؤک کل بدھ کے روز اسرائیلی وزیر اعظم بینجمن نیتن یاہو سے بھی ملاقات کریں گے۔

جمعرات کو صدر گاؤک کو مغربی اردن کے فلسطینی علاقے میں رملٰہ جانا ہے جہاں وہ فلسطینی صدر محمود عباس اور وزیر اعظم سلام فیاض سے ملیں گے۔

mm / hk / afp, ap, dpa