پاکستانی معیشت میں بہتری کی امید

پاکستانی معیشت میں بہتری کی امید کے بارے میں متعدد حلقوں کا کہنا ہے کہ سیاسی صورتحال کا اس میں اہم کردار ہے۔ ماہرین کہتے ہیں کہ سینیٹ کے حالیہ انتخابات کے بعد ملک کی سیاسی صورتحال میں تناﺅ کی کیفیت کم ہوئی ہے اورمعیشت پر بھی اس کا مثبت اثر پڑا ہے۔ وفاقی وزیرِ خزانہ عبدالحفیظ شیخ کے اس بیان کوبھی بہت اہمیت دی جا رہی ہے، جس میں انہوں نے کہا کہ اس سال شرح نمو مہنگائی کے باوجود 4 فیصد رہے گی۔ اور ہر چند کہ یہ ہمسایہ ممالک کے 6 سے 9 فیصد کے مقابلے میں کچھ خاص نہیں ہے۔ تاہم ماہرین کہتے ہیں کہ جو گزشتہ برسوں کے دوران یہ ملک جن حالات سے گزرا ہے اس سامنے رکھتے ہوئے 4 فیصد کم نہیں سمجھنا چاہیے۔

اقتصادی ماہر ڈاکٹر شاہد حسن صدیقی اگلے بجٹ میں بھی ساڑھے چھ سے سات فیصد تک خسارہ کی توقع کر رہے ہیں۔ وہ کہتے ہیں کہ تجارتی خسارہ 20 ارب ڈالر تک پہنچ چکا ہے اور پھر 7.9 ارب ڈالر کے بیرونی قرضوں کی ادائیگی پاکستانی معیشت کی کمر توڑنے کے لیے کافی ہے۔ انہیں سیاسی استحکام بھی کوئی خاص نظر نہیں آتا۔ خاص طور پر جب ملک میں تواتر سے بد عنوانی کے الزامات بھی سامنے آرہے ہیں۔ وہ کہتے ہیں کہ اصل بات تو تب ہوتی جب اس استحکام کے ثمرات عوام تک منتقل ہوتے۔

اقتصادی تجزیہ نگارمحمد سہیل کا کہنا ہے کہ یہ سب اپنی جگہ لیکن حالات بہتر ہی ہو رہے ہیں۔ ان کا اشارہ کپاس کی بہت اچھی فصل کی طرف ہے، جس کے بارے میں کہا جارہا ہے کہ اس مرتبہ ڈیڑھ کروڑ گانٹھیں متوقع ہیں۔ وہ کہتے ہیں ’’دیکھئے پچھلے چھ مہینے سے جائیداد اور بازارحصص میں قیمتیں بڑھ رہی ہیں اور کاروبار میں یوں استحکام بھی صاف واضع ہے‘‘۔

شاہد حسن صدیقی کا کہنا ہے کہ 4 فیصد شرح نموخطے کے دوسرے ممالک کے مقابلے میں کچھ بھی نہیں ہے، لیکن محمد سہیل کا کہنا ہے کہ اگر پچھلے چند سالوں کا مقابلہ کیا جائے تو ہم ڈھائی تین فیصد پر کھڑے تھے۔ اس کے مقابلے میں تو4 فیصد بہتر نظر آتے ہیں۔ لیکن محمد سہیل بھی اس بہتری کا تمغہ موجودہ حکومت کے سینے پر نہیں سجانا چاہیں گے۔ ان کا کہنا ہے کہ بہتری اس لیے ہے کہ آنے والی حکومت سے بہت امیدیں ہیں۔ وہ چاہے نواز شریف ہوں یا عمران خان۔ سہیل کا کہنا ہے کہ موجودہ حکومت سے بہتر رہے گا۔

کامیابی کا سہرا کوئی بھی اپنے سر باندھے، یہ بات سب مانتے ہیں کہ پاکستان کی معیشت ایک نہایت تکلیف دہ صورتحال سے اب نکلتی ہوئی نظر آرہی ہے۔

رپورٹ: رفعت سعید

ادارت : عدنان اسحاق