وولفس برگ نے فرائی برگ کو مات دے دی

وولفس برگ اور فرائی برگ کے درمیان یہ مقابلہ بنڈس لیگا کے پندرہویں میچ ڈے کے آخری روز اتوار کو ہوا جس میں وولفس برگ نے صفر کے مقابلے میں تین گول سے کامیابی پائی۔ فاتح ٹیم کو کھیل کے گیارہ منٹ بعد ہی دو صفر کی برتری حاصل ہو گئی تھی۔

خبر رساں ادارے اے ایف پی کے مطابق فرائی برگ کی ٹیم نے گول کرنے کے چند واضح مواقع ضائع کیے جس کا خمیازہ اسے بدترین شکست کی صورت میں بھگتنا پڑا۔ اس ٹیم کی یہ مسلسل تیسری ہار ہے، جس کے نتیجے میں یہ بنڈس لیگا کے پوائنٹس ٹیبل پر نیچے سے تیسرے نمبر (سولہویں) پر جا گری ہے۔

پندرہویں میچ ڈے کے آخری روز اتوار کو ہی ہیرتھا برلن نے آئنتراخٹ براؤن شوائیگ کو صفر کے مقابلے میں دو گول سے مات دی۔ یہ میچ ڈے حسبِ معمول جمعے کو شروع ہوا تھا۔ پہلا میچ نیورمبرگ اور مائنز کے درمیان کھیلا گیا جو ایک ایک گول سے برابر رہا تھا۔

ہفتے کو میچ ڈے کے دوسرے روز چھ مقابلے ہوئے۔ مؤنشن گلاڈ باخ نے شالکے کو ایک کے مقابلے میں دو گول سے شکست دی۔ اشٹٹ گارٹ نے ہینوور کو چار دو سے شکست دی۔ ٹاپ ٹیم بائرن میونخ نے بریمن کو صفر کے مقابلے میں سات گول سے دھو ڈالا۔ آؤگس برگ نے ہیمبرگ کو صفر ایک سے شکست دی۔ لیور کوزن نے بھی ڈورٹمنڈ کو صفر ایک سے ہی مات دی۔ ہوفن ہائم نے آئنتراخٹ فرینکفرٹ کو ایک کے مقابلے میں دو گول سے ہرایا۔

پوائنٹس ٹیبل

پندرہویں میچ ڈے کے اختتام پر بائرن میونخ بدستور سرفہرست ٹیم ہے۔ اس ہفتے بریمن کے خلاف شاندار جیت کے نتیجے میں اس کے پوائنٹس اکتالیس ہو گئے۔ سینتیس پوائنٹس کے ساتھ لیورکوزن دوسرے نمبر پر ہے جبکہ اکتیس پوائنٹس کے ساتھ ڈورٹمنڈ تیسرے نمبر پر ہے۔

مؤنشن گلاڈ باخ، وولفس برگ، شالکے، ہیرتھا برلن، مائنز، آؤگس برگ اور اشٹٹ گارٹ بالترتیب چوتھے، پانچویں، چھٹے، ساتویں، آٹھویں، نویں اور دسویں نمبر پر ہیں۔ ہوفن ہائم گیارہویں، ہینوور بارہویں، ہیمبرگ تیرہویں، بریمن چودہویں، آئنتراخٹ فرینکفرٹ پندرہویں، فرائی برگ سولہویں، نیورمبرگ سترہویں اور آئنتراخٹ براؤن شوائیگ اٹھارہویں نمبر پر ہے۔

اس ہفتے چار ٹیموں (وولفس برگ، آؤگس برگ، اشٹٹ گارٹ اور ہوفن ہائم) نے پوائنٹس ٹیبل پر اپنی پوزیشنیں بہتر بنائی ہیں۔ چار ہی ٹیموں (شالکے، ہینوور، ہیمبرگ اور بریمن) نے اپنی گزشتہ پوزیشنیں کھو دی ہیں۔ باقی ٹیمیں بدستور اپنی گزشتہ ہفتے کی پوزیشنوں پر ہیں۔