ماریو مونٹی کا اطالوی سیاست میں کردار ادا کرنے کا عندیہ

اٹلی کی وزارت عظمیٰ کو چھوڑنے کے بعد اتوار کے روز ماریو مونٹی نے اپنے مستقبل کے لائحہ عمل کا اعلان کیا۔ انہوں نے کہا کہ وہ اگلے برس فروری میں ہونے والے عام انتخابات کے بعد ایک مرتبہ پھر وزارت عظمیٰ سنبھالنے کے لیے دستیاب ہوں گے۔ تجزیہ کاروں کے مطابق یہ اسی صورت میں ممکن ہو گا اگر ان کی اصلاحات کے حامی الیکشن جیتنے کے بعد ان سے رابطہ کرتے ہیں۔ ماریو مونٹی کو اطالوی اقتصادیات کی ڈوبتی کشتی کو سنبھالنے کے لیے ایک سال قبل وزیر اعظم بنایا گیا تھا۔ ان کو مختلف اطالوی حلقے ایک بار پھر وزارت عظمیٰ کا منصب سنبھالنے کا مشورہ دے رہے ہیں۔

اتوار کے روز ماریو مونٹی کا کہنا تھا کہ اگر ایک قابل اعتماد سیاسی قوت نے انہیں منصبِ وزارت عظمیٰ سنبھالنے کی پیشکش کی تو وہ اس پر غور کرنے کے لیے تیار ہوں گے۔ مونٹی کا یہ بھی کہنا تھا کہ عملی سیاست میں رہنے کے ممکنہ خطرات سے وہ آگاہ ہیں اور وہ اس وقت کسی پارٹی کے ساتھ وابستہ نہیں ہیں۔ مونٹی کا یہ بھی کہنا ہے کہ وہ اس وقت کسی بھی سیاسی لیڈر کی حمایت کرنے کی پوزیشن میں نہیں ہیں کہ وہ ذمہ داریاں سنبھالنے کی اہلیت رکھتا ہے۔

اٹلی کی دونوں بڑی سیاسی جماعتوں پیپلز فریڈم پارٹی (PDL) اور ڈیموکریٹک پارٹی (PD) نے مونٹی کو مشورہ دیا ہے کہ وہ الیکشن کے عمل سے باہر رہیں۔ پیپلز فریڈم پارٹی کو سابق وزیراعظم سلویو برلسکونی کی قیادت حاصل ہے۔ رائے عامہ کے جائزوں کے مطابق سینٹر لیفٹ ڈیموکریٹک پارٹی کو پیئر لُوئی جی بیرسانی کی رہنمائی حاصل ہے۔ ڈیموکریٹک پارٹی نے مونٹی کے اقتصادی اصلاحاتی عمل کی پارلیمنٹ کے اندر اور باہر حمایت کی ہے۔ رائے عامہ کے جائزوں کے مطابق ڈیموکریٹک پارٹی کو برلسکونی کی سیاسی جماعت پر سبقت حاصل ہے۔ اسی طرح ایک اور رائے عامہ کے جائزے کے مطابق 61 فیصد عوام نے مونٹی کے انتخابی عمل میں شرکت کی حمایت نہیں کی تھی۔

اٹلی کو دنیا کی آٹھویں بڑی اقتصادی طاقت خیال کیا جاتا ہے۔ اٹلی کی اکانومی کو کسادبازاری کا سامنا ہے۔ محتاط اندازے کے مطابق اطالوی قرضوں کا حجم دو ٹریلین سے زائد ہے۔ اسی باعث غیر ملکی سرمایہ کار اٹلی میں اپنا سرمایہ لگانے کے عمل سے پیچھے ہٹ گئے تھے۔ وزیر اعظم بننے کے بعد ماریو مونٹی نے ٹیکس کی شرح کو بلند کرنے کے ساتھ ساتھ حکومتی اخراجات میں کمی کا سلسلہ جاری رکھا تا کہ علیل اطالوی اقتصادیات کو توانائی مل سکے۔

سابق یورپی کمشنر ماریو مونٹی اس وقت اطالوی ایوان بالا کے تاحیات رکن ہیں۔ اس کے علاوہ نئی حکومت کی تشکیل تک وہ قائم مقام وزیر اعظم بھی ہیں۔ بیرون اٹلی انہوں نے اپنے ملک کے وقار میں اضافہ کرنے کی جو کوششیں کی ہیں، ان میں وہ کامیاب دکھائی دیتے ہیں کیونکہ ان سے قبل سلویو برلسکونی کی اسکینڈل زدہ حکومت قائم تھی۔ مونٹی کو اٹلی کے کاروباری حلقوں کی حمایت بھی حاصل ہے۔ ان کو یورپی یونین کی تائید بھی ملتی رہی ہے۔ جرمن چانسلر انگیلا میرکل بھی ان کی پالیسیوں کو سراہتی رہی ہیں۔ اٹلی کے سیاسی میدان میں سینٹر گروپس ان کو سیاست میں دیکھنے کے متمنی ہیں۔

اٹلی میں جاری پالیسیوں کے تناظر میں فرانسیسی پارلیمنٹ نے مستعفی ہونے والے اطالوی ٹکینو کریٹ وزیراعظم ماریو مونٹی کو رواں برس کی سب سے اہم یورپی شخصیت قرار دیا تھا۔ اس کے علاوہ غیر ملکی سرمایہ کاروں کو ایک بار پھر اٹلی میں سرمایہ کاری کرنے کی ترغیب حاصل ہونا شروع ہوئی تھی۔ تجزیہ کاروں کے خیال میں اندرون ملک ٹیکس کی شرح کو بلند کرنے کی وجہ سے مونٹی کی صلاحیتوں کی چمک معدوم ہونے لگی تھی کیونکہ عوامی حلقے ان سے شاکی ہونے لگے تھے۔ مونٹی کی پالیسیوں کے باعث ہی اطالوی حکومتی بانڈز کی قدر عالمی مالی منڈیوں میں بہتر ہوئی تھی۔

(ah / ng (Reuters