لوئس ہملٹن نے کینیڈین گراں پری جیت لی

یہ ریس اتوار کو مونٹریال میں ہوئی، جس میں لوٹس کے لیے فرانس کے Romain Grosjean دوسرے نمبر پر رہے اور Sauber کے Sergio Perez تیسرے نمبر پر رہے۔

ہملٹن نے آخری مرحلے پر عالمی چیمپیئن جرمن ڈرائیور سیباستیان فیٹل اور فرنانڈو الانسو کو پچھاڑتے ہوئے اُسی کورس پر یہ ٹائٹل اپنے نام کیا ہے، جہاں 2007ء میں انہیں اپنے کیریئر کی پہلی جیت ملی تھی۔

خبر رساں ادارے ڈی پی اے کے مطابق فیٹل اور الانسو نے ٹائروں کی وجہ سے اپنی اپنی گاڑیوں کی رفتار کم کی تھی اور یہ وَن اسٹاپ حکمت عملی ان کے لیے جوا ثابت ہوئی اور وہ پہلی تین پوزیشنوں میں سے کوئی بھی حاصل نہ کر پائے۔

فیٹل چوتھے نمبر پر تھے جبکہ الانسو پانچویں پر۔ چھٹے پر مرسڈیز کے جرمن ڈرائیور نِکو روز بیرگ تھے اور ساتویں نمبر پر آسٹریلیا کے مارک ویبر۔

بعدازاں ہملٹن کا کہنا تھا: ’’کیا ہی زبردست احساس ہے۔ یہ وہ جگہ ہے جہاں میں نے اپنی پہلی گراں پری ریس جیتی تھی اور میں جانتا تھا کہ آج کی ریس مشکل ہو گی لیکن مجھے اس کا لمحہ لمحہ اچھا لگا ہے۔‘‘

یہ ان کے کیریئر کی اٹھارھویں جیت ہے جبکہ مونٹریال میں یہ ان کی تیسری فتح ہے۔

کینیڈین گراں پری رواں سیزن کی ساتویں فارمولا وَن ریس تھی اور اٹھائیس سالہ ہملٹن کی جیت کے ساتھ یہ ریکارڈ سامنے آیا ہے کہ ان تمام مقابلوں میں کامیابی سات مختلف ڈرائیوروں کو حاصل ہوئی ہے۔

خیال رہے کہ مونٹریال میں طالب علم ٹیوشن فیس کے مسئلے کو منظر عام پر لانے کے لیے اس ریس میں خلل ڈالنا چاہتے تھی، جس کی وجہ سے یہ مقابلہ سخت سکیورٹی میں منعقد کروایا گیا۔

قبل ازیں پولیس ترجمان مارک ڈیوڈ نے شہر میں اضافی سکیورٹی انتظامات کے حوالے سے کہا کہ منظم انداز سے لوگوں کی تلاشی نہیں لی جا رہی۔ انہوں نے کہا: ’’ہم صرف ایسی صورت میں کسی بیگ کی تلاشی کے لیے کہیں گے اگر ہمیں لگے کہ اس میں کسی طرح کا کوئی ہتھیار ہو سکتا ہے۔‘‘

اتوار کو مقامی وقت کے مطابق صبح آٹھ بجے میٹرو سسٹم میں بم کی افواہ بھی سامنے آئی، جس کی وجہ سے ٹریفک کچھ دیر کے لیے رُک گیا۔ اس حوالے سے پچاس برس سے زائد عمر کے ایک شخص کو گرفتار بھی کیا گیا۔

ng/ia (AFP, Reuters, dpa)