فرانسیسی کھلاڑی سونگا پہلی بار فرنچ اوپن کے کوارٹر فائنل میں

جو ولفریڈ سونگا نے اس میچ میں سوئس کھلاڑی سٹانیسلاس واورینکا کو چھ چار ، سات چھ، تین چھ، تین چھ اور چھ چار سے شکست دی۔ ان دونوں کھلاڑیوں کے درمیان یہ میچ دراصل اتوار تین جون کو طے تھا، مگر دیر تک جاری رہنا والا یہ میچ روشنی کم ہو جانے کے باعث آج کے دن کے لیے ملتوی کر دیا گیا تھا۔

گزشتہ روز جب میچ ملتوی کیا گیا اس وقت سونگا پانچویں اور آخری سیٹ میں چار دو کے ساتھ برتری لیے ہوئے تھے۔ آج پیر کے روز میچ شروع ہونے کے بعد واورینکا اسے چار چار تک لانے میں کامیاب ہو گئے، مگر سونگا نے بھرپور محنت کے بعد بالآخر یہ سیٹ اور میچ اپنے نام کر لیا۔

آج پیر ہی کے روز کھیلے گئے ایک اور میچ میں ہسپانوی کھلاڑی نکولاس الماگرو نے سربیا کے یانکو ٹپساریوِچ کو چھ چار، چھ چار اور چھ چار سے شکست دے کر کوارٹر فائنل میں جگہ بنا لی۔ سیمی فائنل تک پہنچنے کے لیے الماگرو کا مقابلہ اب اپنے ہی ہم وطن اور دفاعی چیمپئن رافائل ندال سے یا پھر ارجنٹائن کے یوآن موناکو کے ساتھ ہوگا۔

26 سالہ الماگرو اس سے قبل 2008ء اور 2010ء میں بھی فرنچ اوپن کے کوارٹر فائنل تک جگہ بنا چکے ہیں، تاہم دونوں ہی مواقع پر انہیں رافائل نادال کے ہاتھوں شکست سے دو چار ہونا پڑا۔ گزشتہ برس وہ پہلے ہی مرحلے میں ٹورنامنٹ سے باہر ہو گئے تھے۔

کوارٹر فائنل مرحلے تک رسائی کے لیے آج پیر ہی کے روز کھیلے گئے ایک اور میچ میں ارجنٹائن کے کھلاڑی خوآن مارٹن ڈیل پوترو نے چیک ری پبلک سے تعلق رکھنے والے کھلاڑی تھوماس بیڈرِش کو سات چھ، چھ تین اور سات پانچ سے شکست دے دی۔ کوارٹر فائنل میں ڈیل پوترو کا مقابلہ اب راجر فیڈر سے ہوگا۔ ڈیل پوترو اور بیڈرش کے درمیان یہ میچ بھی اتوار کے روز روشنی کم ہونے کی وجہ سے روک دیا گیا تھا۔

aba/km (AFP, AP)