غزہ جنگ میں لوگ ’بہیمانہ ترین مرحلے‘ سے گزر رہے ہیں، گوٹیرش

ترک صدر رجب طیب ایردوآن اور شامی صدر احمد الشرع کے درمیان ہفتے کے روز استنبول میں ایک ملاقات ہوئی۔ سی این این ترک اور سرکاری میڈیا نے دونوں رہنماؤں کی ملاقات کی ویڈیو نشر کی، جس میں انہیں ایک دوسرے سے مصافحہ کرتے دیکھا جا سکتا تھا۔

یہ ملاقات ایک ایسے وقت پر ہوئی ہے، جب صرف ایک روز قبل ہی امریکی صدر ڈونلڈ ٹرمپ کی انتظامیہ نے شام کے خلاف عائد پابندیاں مؤثر طور پر ختم کرنے کے احکامات جاری کیے تھے۔ صدر ٹرمپ نے طویل خانہ جنگی سے تباہ حال شام کی تعمیر نو میں مدد کے لیے ان پابندیوں کو ختم کرنے کا وعدہ کیا تھا۔

ترک ٹی وی سے نشر کی گئی فوٹیج میں دکھایا گیا کہ صدر ایردوآن نے شامی ہم منصب الشرع کا اس وقت استقبال کیا، جب وہ اپنی گاڑی سے نکل کر آبنائے باسفورس کے کنارے واقع دولما باہچے محل پہنچے۔

ترکی کی سرکاری خبر ایجنسی انادولوکے مطابق اس ملاقات میں دونوں ممالک کے وزرائے خارجہ، ترک وزیر دفاع اور ترک انٹیلیجنس ایجنسی ایم آئی ٹی کے سربراہ بھی شریک تھے۔ شام کے سرکاری خبر رساں ادارے کے مطابق شامی وفد میں وزیر دفاع مرہف ابو قصرہ بھی شامل تھے۔

ترک سکیورٹی ذرائع کے مطابق ترک انٹیلیجنس چیف ابراہیم کالن اور صدر احمد الشرع کے درمیان اسی ہفتے شام میں کرد ملیشیا وائے پی جی کے ہتھیار ڈالنے اور شامی سکیورٹی فورسز میں ضم ہونے سے متعلق بھی بات چیت ہوئی تھی۔
 

غزہ پٹی میں حماس کے زیر انتظام سول ڈیفنس ایجنسی کے مطابق ہفتے کے روز کیے گئے نئے اسرائیلی حملوں میں اس فلسطینی علاقے کے مختلف حصوں میں مزید کم از کم 15 افراد ہلاک ہو گئے، جہاں حالیہ کئی دنوں سے اسرائیلی فوجی کارروائیوں میں واضح شدت آ چکی ہے۔

غزہ سول ڈیفنس ایجنسی کے ترجمان محمود باسل نے اے ایف پی کو بتایا کہ ہفتے کے روز مرنے والوں میں ایک فلسطینی جوڑا اور اس کے دو کمسن بچے بھی شامل ہیں، جو جنوبی شہر خان یونس کے علاقے اَمل میں علی الصبح ایک مکان پر کیے گئے فضائی حملے میں ہلاک ہوئے۔
ترجمان کے مطابق شہر کے مغربی علاقے میں امدادی ٹرکوں کے انتظار میں جمع ہجوم پر ڈرون حملے میں بھی کم از کم پانچ افراد مارے گئے۔
دوسری جانب اسرائیلی فوج نے کہا ہے کہ وہ علیحدہ علیحدہ کیے گئے مختلف حملوں پر اس وقت تک کوئی تبصرہ نہیں کر سکتی، جب تک کہ ان کے ’’درست جغرافیائی کوآرڈینیٹس‘‘ فراہم نہ کیے جائیں۔

امریکی حکومت نے شام پر عائد پابندیوں میں نرمی کا عمل شروع کر دیا ہے تاکہ وہاں سرمایہ کاری کو فروغ دیا جا سکے اور برسوں کی خانہ جنگی سے تباہ حال اس  ملک کو امن و استحکام کی راہ پر گامزن کیا جا سکے۔ یہ اعلان امریکی وزیر خزانہ اسکاٹ بیسنٹ نے جمعے کے روز کیا۔

انہوں نے کہا، ’’صدر ڈونلڈ ٹرمپ کے وعدے کے مطابق محکمہ خزانہ اور محکمہ خارجہ نے شام میں نئی سرمایہ کاری کی حوصلہ افزائی کے لیے اجازت نامے جاری کرنا شروع کر دیے ہیں۔‘‘

گزشتہ ہفتے صدر ٹرمپ نے شام پر عائد تمام امریکی پابندیاں اٹھانے کا اعلان کیا تھا۔ یہ پابندیاں سابق صدر بشار الاسد کے دور میں خانہ جنگی کے آغاز کے بعد لگائی گئی تھیں۔ اسد کا اقتدار دسمبر کے اوائل میں ایک اسلام پسند باغی اتحاد نے ختم کر دیا تھا۔

محکمہ خزانہ کے مطابق اس نرمی کے بعد شام میں مالیاتی سرگرمیوں، تیل اور تیل سے متعلقہ مصنوعات کے لین دین اور عبوری حکومت، مرکزی بینک اور دیگر مالیاتی اداروں کے ساتھ معاملات کی اجازت دی جائے گی۔

تاہم ایسا لین دین، جس کا فائدہ روس، ایران یا شمالی کوریا کو ہو، اس پر پابندیاں بدستور برقرار رہیں گی۔ امریکی وزیر خارجہ مارکو روبیو کے مطابق یہ پابندیاں عارضی طور پر 180 دن کے لیے معطل کی جا رہی ہیں تاکہ استحکام اور نئی سرمایہ کاری کی راہ میں کوئی رکاوٹ نہ آئے۔

روبیو نے کہا، ’’ان اقدامات سے بجلی، توانائی، پانی اور نکاسی آب کی سہولیات میں بہتری آئے گی اور شام میں انسانی ہمدردی کی بنیاد پر امداد کا دائرہ وسیع ہو سکے گا۔‘‘

بشار الاسد کے اقتدار کے خاتمے کے باوجود شام میں بدامنی جاری ہے، جہاں حالیہ دنوں میں دروز اقلیت اور سنی ملیشیاؤں کے درمیان جھڑپیں ہوئی ہیں، جب کہ مارچ کے اوائل میں عبوری حکومت نے اسد کے وفاداروں کے خلاف عسکری کارروائیاں شروع کر دی تھیں۔
 

لبنان میں مئی کے آغاز سے جاری بلدیاتی انتخابات آج چوبیس مئی بروز ہفتہ اپنے آخری مرحلے میں داخل ہو گئے، جو ایران نواز حزب اللہ اور اس کے اتحادیوں کے لیے ایک اہم آزمائش سمجھے جا رہے ہیں۔

آخری مرحلے میں ووٹنگ جنوبی لبنان میں ہو رہی ہے، جو حزب اللہ کا روایتی گڑھ مانا جاتا ہے۔ ملک کے دیگر علاقوں میں ووٹنگ پہلے ہی مکمل ہو چکی ہے۔

جنوبی لبنان کے شیعہ اکثریتی علاقوں میں ووٹروں کا ٹرن آؤٹ اور نتائج یہ ظاہر کریں گے کہ آیا حزب اللہ اب بھی عوامی حمایت اور اپنی سیاسی تحریک برقرار رکھے ہوئے ہے۔

یہ انتخابات دراصل 2022 میں ہونا تھے، مگر معاشی بحران، بیروت کی بندرگاہ پر دھماکے اور انتظامی رکاوٹوں کے باعث تاخیر کا شکار ہو گئے تھے۔

گزشتہ برس اسرائیل کے ساتھ جنگ کے بعد حزب اللہ کو عسکری لحاظ سے کمزور تصور کیا جا رہا ہے۔ اگرچہ نومبر سے جنگ بندی نافذ ہے، مگر فریقین ایک دوسرے پر اس کی خلاف ورزی کے الزامات عائد کرتے رہتے ہیں، اور اسرائیلی فضائی حملے بھی تقریباﹰ روزمرہ کا معمول بن چکے ہیں۔ لبنانی حکومت پر جنگ بندی کے مکمل نفاذ اور حزب اللہ کے غیر مسلح کیے جانے کے لیے دباؤ بڑھتا جا رہا ہے۔
 

غزہ پٹی میں حماس کے زیر انتظام کام کرنے والی سول ڈیفنس ایجنسی کے اہلکار محمد المغیر نے اے ایف پی کو بتایا کہ جمعہ کے روز اسرائیلی فضائی حملوں کے نتیجے میں مزید کم از کم 71 افراد ہلاک ہو گئے، جبکہ ان کے بقول ’’درجنوں افراد زخمی ہوئے اور ایک بڑی تعداد ملبے تلے لاپتہ ہے۔‘‘

دوسری جانب اسرائیلی فوج نے کہا ہے کہ گزشتہ 24 گھنٹوں کے دوران اس کے دستوں نے غزہ پٹی میں ’’عسکری احاطوں، اسلحہ ذخیرہ کرنے کی جگہوں اور سنائپر پوسٹوں‘‘ کو نشانہ بنایا۔ فوج نے مزید بتایا کہ ملکی ’’فضائیہ نے غزہ پٹی میں دہشت گردوں کے 75 سے زائد اہداف پر حملے کیے۔‘‘

خیال رہے کہ اسرائیل نے 18 مارچ کو غزہ میں اپنی فوجی کارروائیاں دوبارہ شروع کر دی تھیں، جس سے  اس تباہ شدہ ساحلی پٹی میں 19 جنوری سے جاری جنگ بندی کا خاتمہ ہوگیا تھا۔ 

جمعہ کے روز غزہ میں حماس کے زیر انتظام  وزارت صحت نے بتایا کہ جنگ بندی کے خاتمے کے بعد سے اب تک اسرائیلی حملوں میں کم از کم 3,673 افراد ہلاک ہو چکے ہیں، جس کے بعد سات اکتوبر 2023ء سے جاری اس جنگ میں غزہ پٹی میں انسانی ہلاکتوں کی مجموعی تعداد 53,822 تک پہنچ چکی ہے، جن میں اکثریت عام شہریوں کی تھی۔

نیوز ایجنسی اے ایف پی کی سرکاری اعداد و شمار پر مبنی گنتی کے مطابق، حماس کے اکتوبر 2023 کے حملے میں اسرائیل میں 1,218 افراد ہلاک ہوئے تھے، جن میں سے زیادہ تر عام شہری تھے۔

فلسطینی شدت پسندوں نے اس حملے کے دوران 251 افراد کو یرغمال بھی بنا لیا تھا، جن میں سے 57 اب بھی غزہ میں موجود ہیں۔ ان میں سے 34 کے بارے میں اسرائیلی فوج کا کہنا ہے کہ وہ غالباﹰ ہلاک ہو چکے ہیں۔

اقوام متحدہ کے سیکرٹری جنرل انٹونیو گوٹیرش نےکہا ہے کہ فلسطینی عوام غزہ پٹی میں جاری جنگ کے ’’ظالمانہ ترین مرحلے‘‘ سے گزر رہے ہیں۔ ان کا یہ بیان ایک ایسے وقت پر سامنے آیا ہے، جب اسرائیل کی جانب سے مکمل ناکہ بندی کے جزوی طور پر نرم کیے جانے کے بعد غزہ پٹی میں خوراک اور امداد لے جانے والے درجنوں ٹرکوں کو لوٹ لیا گیا۔

غزہ پٹی میں جاری اسرائیلی بمباری اور عسکری کارروائیوں کے باعث لاکھوں فلسطینی شدید غذائی قلت، پینے کے پانی کی کمی، اور بنیادی طبی سہولیات کی عدم دستیابی کا شکار ہیں۔ اقوام متحدہ کے مطابق جنوبی غزہ میں خان یونس اور رفح کے علاقوں سے لاکھوں افراد نقل مکانی پر مجبور ہو چکے ہیں اور کئی خاندان کھلے آسمان تلے زندگی گزارنے پر مجبور ہیں۔

اقوام متحدہ کے سربراہ کا مزید کہنا تھا، ’’غزہ میں فلسطینی اس ظالمانہ تنازع کے ممکنہ طور پر سب سے بے رحم مرحلے سے گزر رہے ہیں‘‘ اور یہ کہ اسرائیل کو ’’انسانی ہمدردی کی بنیاد پر امداد کی فراہمی کی اجازت دینا اور اس میں سہولت فراہم کرنا چاہیے۔‘‘

انہوں نے نشاندہی کی کہ حالیہ دنوں میں غزہ میں داخلے کے لیے کلیئر کیے گئے تقریباً 400 ٹرکوں میں سے صرف 115 کو ہی وصول کیا جا سکا۔ ان کا کہنا تھا، ’’بہرحال، اب تک جتنی امداد کی اجازت دی گئی ہے، وہ چمچ بھر امداد کے مترادف ہے جبکہ ضرورت اس سے کہیں زیادہ کی ہے ۔‘‘

گوٹیرش نے مزید کہا، ’’ادھر اسرائیلی فوجی کارروائی ہلاکتوں اور تباہی کی بھیانک سطح کے ساتھ شدت اختیار کرتی جا رہی ہے۔‘‘

عالمی خوراک پروگرام (ڈبلیو ایف پی)  کا کہنا ہے، ’’گزشتہ رات دیر گئے جنوبی غزہ میں ہمارے 15 ٹرک لوٹ لیے گئے، جو ڈبلیو ایف پی کی مدد سے چلنے والی بیکریوں کی جانب جا رہے تھے۔‘‘

اقوام متحدہ کے اس ادارے نے اپنے ایک بیان میں مزید کہا، ’’بھوک، مایوسی، اور اس بات کی بے یقینی کہ مزید خوراک آئے گی یا نہیں، بدامنی میں اضافے کا سبب بن رہی ہیں۔‘‘ اس ادارے نے  اسرائیلی حکام سے مطالبہ کرتے ہوئے کہا، ’’خوراک کی کہیں زیادہ بڑی مقدار تیزی سے غزہ پہنچنے دی جائے۔‘‘