عالمی بینک کی عہدیدار آئی ایم ایف کی سربراہی کی امیدوار

جیورجیوا کا تعلق بلغاریہ سے ہے اور وہ بین الاقوامی مالیاتی فنڈ کی موجودہ سربراہ کرسٹین لاگارڈ کی جگہ لینے کی امیدوار ہوں گی۔ جمعے کے روز یورپی کمیشن کے صدر ژاں کلود ینکر اور فرانسیسی وزیرخزایہ برونو لے ماری نے اپنے ٹوئٹر پیغامات میں لکھا کہ اس حوالے سے ہالینڈ کے سابق وزیرخارجہ جیرون ڈائسیل بلوم اور جیورجیوا کے نام زیربحث تھے، تاہم یورپی یونین کے رہنماؤں نے ووٹنگ کے ذریعے گیورگیورا کے نام کی منظوری دی۔

پاکستان کے لیے ٹیکس ریونیو میں اضافہ اشد ضروری، آئی ایم ایف

مزید ٹیکس جمع کیے بغیر کوئی چارہ نہیں، آئی ایم ایف

یہ بات اہم ہے کہ روایتی طور پر بین الاقوامی مالیاتی فنڈ کے سربراہ کی نامزدگی یورپ اور عالمی بینک کے سربراہ کی نام زدگی امریکا کی جانب سےہوتی ہے۔

لاگارڈ کو یورپی مرکزی بینک کی سربراہی کے لیے نام زد کیا گیا ہے۔ وہ بین الاقوامی مالیاتی فنڈ کی سربراہی سے مستعفی ہو چکی ہیں اور بارہ ستمبر کو وہ یہ عہدہ چھوڑ دیں گی۔ بین الاقوامی مالیاتی فنڈ جو دنیا کے اہم ترین مالیاتی اداروں میں شمار کیا جاتا ہے اپنے 189 رکن ممالک کو مالیاتی مشاورت فراہم کرتا ہے۔

عالمی بینک کے صدر ڈیوڈ مالپاس کی جانب جاری کردہ ایک بیان میں کہا گیا ہے کہ نام زدگی کے عمل کے دوران عالمی بینک میں چیف ایگزیکٹیو آفیسر کے بہ طور کام کرنے والی جیورجیوا چھٹیاں لیں گے۔ انہوں نے اپنے بیان میں جیورجیوا کو بین الاقوامی مالیاتی بینک کی سربراہی کے لیے نام زدگی پر مبارک باد بھی دی۔ اپنے بیان میں مالپاس نے کہا، ''اس سے واضح ہوتا ہے کہ وہ اقتصادیات ، معیشت اور ترقی کے حوالے سے بین الاقوامی سطح پر قائدانہ کردار کی حامل ہیں۔‘‘

یہ بات اہم ہے کہ جیورجیوا ماضی میں یورپی یونین کی کمشنر برائے بین الاقوامی تعاون اور ہیومینیٹیرین امداد کا شعبہ دیکھ چکی ہیں، جب کہ بعد میں انہوں نے یورپی بجٹ کے شعبے کی نگرانی بھی کی۔

تاہم بین الاقوامی مالیاتی فنڈ کے ضوابط کے مطابق اس ادارے کا سربراہ 65 برس سے کم عمر کا ہونا چاہیے، جب کہ جیورجیوا 65 برس کی ہیں۔ اس کا مطلب ہے کہ ان کے انتخاب سے قبل بین الاقوامی مالیاتی فنڈ کے بنیادی ضوابط میں تبدیلی بھی کرنا ہو گی۔

ع ت، ع ح (اے پی، روئٹرز)