صومالی صدر کا دورہ ء یورپ، اہم رہنماؤں سے ملاقاتیں

ابھی حال ہی میں امریکا نے ستمبر میں صومالیہ کے نئے صدر منتخب ہونے والے یونیورسٹی لیکچرر حسن شیخ محمد کی حکومت کو تسلیم کیا تھا۔ اس پیشرفت کے بعد وہ یورپ کا پہلا دورہ کر رہے ہیں۔ اس دوران حسن شیخ محمد برسلز میں یورپی یونین کے صدر ہیرمن فان رومپوئے، یورپی یونین کے خارجہ امور کی سربراہ کیتھرین ایشٹن، یورپی کمیشن کے صدر یوزے مانوئل باروسو اور دیگر اعلیٰ رہنماؤں سے ملیں گے۔

یورپی یونین کے ایک اعلیٰ عہدیدار نے اپنا نام مخفی رکھنے کی شرط پر خبر رساں ادارے اے ایف پی کو بتایا ہے کہ حسن شیخ محمد کا یہ مخصوص دورہ انتہائی اہمیت کا حامل ہے، ’’یہ نااُمیدی کی طرف سے اُمید کی طرف کی طرف ایک قدم ہے۔‘‘

اس یورپی عہدیدار کا مزید کہنا ہےکہ صومالی صدر کا یہ دورہ علامتی طور پر اس لیے بھی اہم ہے کیونکہ اس سے پرانے تاثرات ختم ہو سکیں گے اور ایک ایسی نئی سوچ پیدا ہو سکے گی کہ دنیا صومالیہ کو کیسے دیکھتی ہے اور صومالی عوام دنیا کو کیسے دیکھتے ہیں۔ انہوں نے مزید کہا، ’’ہم صومالیہ کی حوصلہ افزائی کرنا چاہتے ہیں کہ ہم اس کے ساتھ ہیں اور ہم اس معاملے پر سنجیدہ ہیں۔‘‘

صومالیہ میں مؤثر وفاقی حکومت کی امید

حسن شیخ محمد نے گزشتہ برس ستمبر میں ایک ایسے وقت میں صومالیہ کے صدر کا عہدہ سنبھالا تھا، جب وہاں گزشتہ آٹھ برس سے عبوری حکومت بدعنوانی کا شکار رہی۔ کہا جا رہا ہے کہ حسن شیخ محمد کے اقتدار میں آنے کے باعث اب یہ امید پیدا ہوئی ہے کہ صومالیہ میں ایک مؤثر وفاقی حکومت قائم ہو سکتی ہے۔ یہ امر اہم ہے کہ اس افریقی ملک میں گزشتہ دو عشروں سے خانہ جنگی اور افراتفری کے نتیجے میں کوئی مؤثر وفاقی حکومت قیام نہیں ہو سکی ہے۔

حالیہ مہینوں میں افریقی یونین کے مضبوط سترہ ہزار فوجی دستے دارالحکومت اور متعدد اہم شہروں سے جنگجو اسلامی تنظیم الشباب کو پسپا کر نے میں کامیاب ہوئے ہیں۔ حکومتی فوجیوں کے ہمراہ الشباب کے خلاف نبردآزما ان فوجیوں میں سے متعدد کی تربیت یورپی یونین نے کی ہے۔

یورپی یونین کی طرف سے صومالیہ کو فراہم کی جانے والی مدد تین نکات پر مبنی ہے، جس میں دفاع، سفارتکاری اور ترقیاتی منصوبہ جات شامل ہیں۔ ابھی گزشتہ ہفتے ہی یورپی یونین کے وزراء اس بات پر متفق ہو گئے تھے کہ صومالی فوجیوں کو تربیت فراہم کرنے والے ای یو مشن کی مدت میں دو برس کی توسیع کر دی جائے۔ اس دو سالہ منصوبے پر گیارہ ملین یورو کی لاگت آئے گی۔

(ab/at (AFP