سویڈن: فائرنگ سے تین افراد ہلاک، مشتبہ نوجوان گرفتار

سویڈن کی پراسیکیوشن اتھارٹی نے آج بدھ 30 اپریل کو کہا ہے کہ اس نے اُپسالا شہر میں فائرنگ کے واقعے میں ملوث ہونے کے شبے میں ایک 16 سالہ نوجوان کو گرفتار کیا ہے۔

اس سے قبل پولیس نے تین افراد کی ہلاکت کی تصدیق کرتے ہوئے کہا تھا کہ یہ حملہ ایک نقاب پوش مسلح شخص نے کیا۔ میڈیا رپورٹس میں بتایا گیا کہ منگل کی شام پیش آنے والے فائرنگ کے اس واقعے کے بعد کم از کم ایک مشتبہ شخص ایک الیکٹرک اسکوٹر پر فرار ہوگیا۔

سویڈش وزیر انصاف گُنار اسٹرؤمر نے ہلاکتوں کو 'انتہائی سنگین‘ معاملہ قرار دیا ہے۔ پولیس نے تاہم یہ نہیں بتایا کہ آیا ہلاکتوں کا یہ معاملہ  گینگ وار کا تازہ ترین واقعہ ہے یا نہیں۔ سویڈن میں رواں برس فروری میں ایک اسکول پر فائرنگ کے نتیجے میں 11 افراد ہلاک ہو گئے تھے۔

پولیس کے ترجمان میگنس جانسن کلارین نے خبر رساں ادارے اے ایف پی کو بتایا، ''تین افراد کی ہلاکت کی تصدیق ہوئی ہے، تاہم ہم نے ان کی شناخت کی تصدیق نہیں کی ہے۔‘‘

ترجمان کا مزید کہنا تھا، ''ہمیں ایک الیکٹرک اسکوٹر پر ایک نقاب پوش شخص کی اطلاعات موصول ہوئی ہیں، ہم ان رپورٹس کی تحقیقات کر رہے ہیں۔‘‘

سویڈش میڈیا کا کہنا ہے کہ عینی شاہدین نے شہر کے وسط میں واقع ایک ہیئر سیلون میں کئی گولیاں چلنے کی آوازیں سنیں۔

سویڈن کے سرکاری نشریاتی ادارے ایس وی ٹی کا کہنا ہے کہ ہلاک ہونے والوں میں سے ایک شخص، ایک گینگ کے سرغنہ اسماعیل عبدو کے ایک رشتہ دار پر حملے کی منصوبہ بندی کے معاملے کی تحقیقات کے سلسلے میں مشتبہ تھا۔

فائرنگ اور ہلاکتوں پر عوام حیران

ایک مقامی یونیورسٹی کے ایک طالب علم الیاس سنڈگرین نے خبر رساں ادارے اے ایف پی کو بتایا، ’’یہ عام طور پر ایک پرسکون علاقہ ہے، میں یہاں روزانہ خریداری کرتا ہوں۔‘‘

اپسالا کے میئر ایرک پیلنگ نے خبر رساں ادارے اے ایف پی کو بتایا کہ وہ اس واقعے سے حیران اور مایوس ہیں۔ انہوں نے مزید کہا کہ مجھے اس بات پر بھی غصہ ہے کہ ایسا ہو سکتا ہے: ''ہم ان جرائم کے ساتھ جینے پر مجبور ہیں۔ میں مایوس ہوں کہ ہم اس مسئلے سے زیادہ مؤثر طریقے سے نمٹنے میں کامیاب نہیں ہو سکے ہیں۔‘‘

فائرنگ کا یہ واقعہ ایک ایسے وقت میں ہوا ہے جب آج 30 اپریل کو اپسالا میں موسم بہار کے آغاز کے موقع پر ویلبورگ فیسٹیول کا انعقاد ہو رہا ہے۔

پولیس ترجمان میگنس جانسن کلارین نے گزشتہ روز کہا کہ بقول لوگوں کو اس فیسٹیول میں شرکت سے خوفزدہ نہیں ہونا چاہیے۔ انہوں نے امید ظاہر کی کہ اس فیسٹیول میں ایک سے ڈیڑھ لاکھ تک لوگ شریک ہوں گے۔

سویڈن میں 'گینگ وار‘ سے جڑے واقعات

سویڈن گزشتہ کئی سالوں سے متحارب گروہوں کے درمیان فائرنگ اور بم دھماکوں پر قابو پانے کے لیے جدوجہد کر رہا ہے۔ اس ماہ کے اوائل میں گوتھن برگ میں مشتبہ طور پر گینگز کے درمیان لڑائی میں دو افراد ہلاک ہو گئے تھے۔ گزشتہ سال گوتھن برگ میں گینگ وار ہی کے سلسلے میں ایک مشہور ریپر کو گولی مار کر ہلاک کر دیا گیا تھا۔

اس طرح کے واقعات میں مجرم اکثر 15 برس سے کم عمر کے نوجوان ہوتے ہیں جنہیں کنٹریکٹ قاتلوں کے طور پر بھرتی کیا جاتا ہے۔ اس کی وجہ یہ کہ سویڈن میں مجرمانہ ذمہ داری کی عمر 15 سال ہے۔ تاہم 2024ء میں گینگ وار سے جڑی اس طرح کی ہلاکتوں کی تعداد میں کمی آئی ہے۔

سرکاری اعداد و شمار کے مطابق 10.6 ملین آبادی والے ملک میں سال 2024ء کے دوران مہلک تشدد کے 92 واقعات ریکارڈ کیے گئے جو 2023 کے مقابلے میں 29 کم تھے۔ 2014ء کے بعد سے یہ سب سے کم تعداد تھی۔

سویڈش نیشنل کونسل فار کرائم پریونشن (بی آر اے) کے مطابق 2024ء میں فائرنگ کے 296 واقعات رپورٹ ہوئے جو اس سے ایک سال قبل کے مقابلے میں 20 فیصد کم ہیں۔

ادارت: شکور خان