روس کی نظریں سوڈان میں سونے کے ذخائر پر لگی ہیں، امریکہ

واشنگٹن کی جانب سے پیر چھ جنوری کو اقوام متحدہ میں روس پر یہ الزام عائد کیا گیا کہ وہ سوڈان کے دونوں متحارب فریقوں کی فنڈنگ ​​کرتے ہوئے اس داخلی تنازعے کے دونوں دھڑوں کے ساتھ بیک وقت ساز باز کر رہا ہے تاکہ ماسکو سوڈان میں اپنے سیاسی مقاصد کو آگے بڑھا سکے۔

سوڈان میں اقتدار کی جنگ 2023 ء میں اپریل کے مہینے میں شروع ہوئی تھی۔ یہ جنگ سوڈان کی مسلح افواج اور نیم فوجی ریپڈ سپورٹ فورسز (RSF) کے مابین جاری ہے۔ افریقی ملک سوڈان کا یہ بحران دراصل دنیا کی سب سے بڑی نقل مکانی اور بھوک و افلاس کا سبب بھی بنا ہے۔

سوڈان میں لڑائی: دو دنوں میں ایک سو ستر سے زائد شہری ہلاک

2023 ء میں سوڈان میں کیا کچھ ہوا؟

اپریل 2023ء میں متحارب گروپوں یعنی سوڈانی مسلح افواج اور نیم فوجی ریپڈ سپورٹ فورسز (RSF) کے مابین جنگ کا سبب اقتدار کی سویلین حکمرانوں کو منتقلی کی منصوبہ بندی بنی۔ نومبر میں روس نے اقوام متحدہ کی سلامتی کونسل کی اس قرارداد کے مسودے کو ویٹو کر دیا تھا جس میں متحارب فریقین سے فوری طور پر دشمنی  ختم کر کے انسانی ہمدردی کی بنیادی پر امداد کی فراہمی کو یقینی بنانے کا مطالبہ کیا گیا تھا جبکہ سلامتی کونسل کے باقی 14 ارکان نے قرارداد کے حق میں ووٹ دیا تھا۔

پیر چھ جنوری کو اقوام متحدہ میں امریکی سفیر لنڈا ٹوماس گرین فیلڈ نے اقوام متحدہ کی اس کونسل کو مزید کوئی تفصیلات بتائے بغیر ایک بیان میں کہا، ''روس نے رکاوٹ کے راستے کا انتخاب کیا ہے اور وہ  اس وقت تنہا کھڑا ہے۔ روس تنازعے کے دونوں فریقوں کو مالی امداد فراہم کرتے ہوئے شہریوں کو خطرے میں ڈالنا چاہتا ہے۔‘‘ انہوں نے زور دیتے ہوئے مزید کہا، ''ہاں، میں نے یہی کہا، دونوں فریقوں کو۔‘‘

سوڈان: خرطوم پر فوج کے حملے میں بیس سے زائد افراد ہلاک

روس کے بارے میں امریکی سفیر کے اس بیان کی وضاحت سے متعلق استفسار کے جواب میں اقرام متحدہ میں امریکی سفارتی مشن کے ایک ترجمان کا کہنا تھا،''واشنگٹن سوڈان میں سونے کی تجارت میں روس کی مسلسل دلچسپی سے واقف ہے اور ماسکو کی طرف سے دونوں سوڈانی متحارب دھڑوں کی حمایت کی سخت مذمت کرتا ہے۔ چاہے وہ سونے کی غیر قانونی تجارت ہو یا سوڈان کو فوجی ساز و سامان کی فراہمی۔‘‘

امریکی مشن کے ترجمان کا مزید کہنا تھا، ''ہمیں سوڈانی حکام کے پابندی کے شکار روسی اداروں اور افراد کے ساتھ سونے کی کان کنی سے متعلق تعاون کے بارے میں کوئی شبہ نہیں۔‘‘

یہ سوڈان کے طویل المدتی مفادات اور سوڈانی عوام کی جنگ کے خاتمے کی خواہشات کے عین مخالف اور ان خواہشات کے لیے مضر ہے۔‘‘

2023ء امدادی کارکنوں کے لیے ہلاکت خیز ترین سال رہا، یو این

روس کا رد عمل

امریکہ کے ان الزامات کے بعد اقوام متحدہ میں متعین روس کے نائب سفیر دیمتری پولیانسکی کا کہنا تھا، ''ہمیں امریکہ کے اس رویے پر افسوس ہے کہ وہ دیگر عالمی قوتوں کے فیصلوں کو اپنے پیمانے پر پرکھنے کی کوشش کرتا ہے۔‘‘

ان کا مزید کہنا تھا، ''یہ ایک واضح حقیقت ہے کہ ہمارے امریکی ساتھی ہر قیمت پر اپنے نام نہاد وسیع تر امن کے تصور کو محفوظ رکھنا چاہتے ہیں جبکہ ان کے دیگر ممالک کے ساتھ تعلقات کی بنیاد دراصل استحصال اور مجرمانہ اسکیموں پر ہے، جو محض امریکی مفادات کی افزودگی کو مد نظر رکھتی ہیں۔‘‘

خبرر رساں ادارہ روئٹرز اس بارے میں سوڈانی متحارب دھڑوں سے فوری طور پر رابطہ کر کے ان کا ردعمل جاننے سے قاصر رہا۔

سوڈانی مہاجر کیمپوں میں چار ماہ میں بارہ سو سے زائد بچے ہلاک

یاد رہے کہ گزشتہ برس دسمبر میں اقوام متحدہ میں متعین روسی سفیر واسیلی نیبنزیا نے امریکی الزامات کو رد کرتے ہوئے امریکہ کے اس الزام کو کہ ماسکو سوڈان میں دونوں متحارب فریقوں کے ساتھ بیک وقت ساز باز کر رہا ہے، ''مغرب اور اس کے میڈیا کی طرف سے پھیلائی گئی من گھڑت افواہیں‘‘ قرار دیا تھا۔

ک م/ م م (روئٹرز)