روسی ٹینکوں نے سرحد پار کی، یوکرائنی صدر کی اپنے روسی ہم منصب سے گفتگو

خبر رساں ادارے اے ایف پی کے مطابق جمعرات کے روز یہ اطلاعات سامنے آئی تھیں کہ تین روسی ٹینک سرحد عبور کر کے روس نواز علیحدگی پسندوں کے زیر قبضہ یوکرائنی علاقے میں داخل ہوئے۔ صدر پوروشینکو نے روسی صدر کے ساتھ ٹیلی فونک بات چیت میں روسی ٹینکوں کے یوکرائنی سرحد عبور کرنے کو ’ناقابل قبول‘ قرار دیا۔ تاہم کییف حکومت کے مطابق دونوں صدور کے درمیان یہ بات چیت ’مثبت اور تعمیری‘ رہی۔

گزشتہ اختتام ہفتہ پر یوکرائن کے نئے صدر کے بطور اپنے عہدے کا حلف اٹھانے والے پوروشینکو نے اپنے روسی ہم منصب پوٹن کو مشرقی یوکرائن میں کشیدگی میں کمی کے لیے حکومتی منصوبے سے بھی آگاہ کیا۔

یوکرائنی صدر کے ترجمان نے سماجی رابطے کی ویب سائٹ فیس بک پر تین روسی ٹینکوں کے سرحد عبور کرنے کے واقعے کے حوالے سے اپنے صفحے پر لکھا، ’پوروشینکو نے صورتحال کو ناقابل قبول قرار دیا۔‘

ماسکو حکومت نے ان الزامات کو مسترد کیا ہے۔ اس سے قبل یوکرائن کے وزیر داخلہ ارسن اواکوف نے اس واقعہ کا ذکر کیا، تاہم یہ نہیں کہا کہ ٹینکوں کے سرحد عبور کرنے کے اس واقعے میں ماسکو حکومت ملوث ہے۔ خیال رہے کہ جمعرات کے روز یہ اطلاعات سامنے آئی تھیں کہ سابقہ سوویت دور کے تین ٹینک مشرقی یوکرائن سرحد عبور کر کے یوکرائن میں داخل ہوئے۔

دوسری جانب ماسکو نے پوروشینکو پر الزام عائد کیا ہے کہ وہ انتخابی مہم کے دوران مشرقی یوکرائن میں قیام امن کے وعدے پورے کرنے میں ناکام دکھائی دے رہے ہیں۔ ماسکو حکومت نے ان دعووں کی تحقیقات کا بھی مطالبہ کیا، جن میں کہا جا رہا ہے کہ یوکرائنی فورسز روس نوازوں کے خلاف کارروائی میں ان بموں کا استعمال کر رہی ہیں، جن پر پابندی عائد ہے۔

یہ بات اہم ہے کہ چھ جون کو فرانس میں ڈی ڈے کی تقریبات کے موقع پر صدر پوٹن اور پوروشینکو نے مصافحہ کیا تھا۔ اس غیر رسمی بات چیت کے بعد یہ کہا جا رہا تھا کہ اس سے دونوں ممالک کے درمیان موجود کشیدگی میں کمی میں مدد ملے گی۔