خطرناک ہتھیاروں پر پابندی کے بل کا مسودہ جنوری تک، اوباما

امریکی ریاست کنیٹیکٹ کے علاقے نیوٹاؤن میں ایک اسکول پر ایک مسلح حملہ آور کی فائرنگ کے نتیجے میں 20 بچوں سمیت 26 افراد کی ہلاکت کے تناظر میں امریکی صدر باراک اوباما نے نائب صدر جوبائیڈن کو خطرناک ہتھیاروں پر پابندی اور ذہنی صحت سے متعلق انٹر ایجنسی اقدامات کا انچارج مقرر کیا ہے۔ امریکی صدر باراک اوباما نے کہا کہ اب امریکا پر لازم ہے کہ وہ اس سلسلے میں قطعی اقدامات کرے۔

خبر رساں ادارے AFP کے مطابق اس سے قبل قتل عام کے متعدد واقعات کے بعد حملے کی صلاحیت کے حامل اسلحے پر پابندی کے حوالے سے امریکی صدر باراک اوباما مؤثر اقدامات یا قانون سازی میں ناکام رہے ہیں۔ AFP کا کہنا ہےکہ اب بھی امریکا میں یہ سوالات اٹھائے جا رہے ہیں کہ واشنگٹن انتظامیہ اس سلسلے میں کس طرح کے ’زیادہ مؤثر‘ اقدامات کرنے میں کامیاب ہو گی۔

خبر رساں ادارے AFP کا یہ بھی کہنا ہے کہ امریکا میں کنیٹیکٹ کا واقعہ ایک بڑے سانحے کے طور پر دیکھا جا رہا ہے اور اس سلسلے میں ابتدائی دھچکا ختم ہو جانے کے بعد بھی، اس سفاکانہ واقعے کے اثرات کی وجہ سے قانون سازوں کے لیے اس سلسلے میں اقدامات کی گنجائش باقی رہے گی۔

امریکی صدر باراک اوباما کے مطابق، ’مجھے امید ہے کہ ہماری یادداشت اتنی کمزور نہیں کہ ہم نیوٹاؤن جیسے واقعے کو صرف ایک ہی ماہ میں بھول جائیں۔‘

انہوں نے اس قانونی مسودے پر کام کرنے والی ٹیم کے حوالے سے کہا، ’یہ وہ ٹیم ہے جسے یہ قطعی ذمہ داری سونپی گئی ہے کہ وہ اس سلسلے میں حقیقی اصلاحات کرے۔‘

اوباما نے کہا کہ ملک سے خطرناک ہتھیاروں کے ذریعے تشدد کے واقعات کی ’بیماری‘ میں کمی ضروری ہے کیونکہ اس خوف کا سامنا امریکا کو ہر روز کرنا پڑتا ہے۔

صدر اوباما نے کانگریس پر بھی زور دیا کہ وہ فوجی طرز کے اسلحے اور زیادہ گولیوں کے حامل میگزینز پر پابندی کی بابت سست روی کی بجائے سبک رفتاری سے کام لیتے ہوئے فوری اقدامات کرے۔

at/ab (AFP)