جنوبی افریقہ پاکستان کے خلاف ٹی ٹوئنٹی سیریز جیت گیا

پاکستان کی بیٹنگ لائن کے لیے یہ مزید ایک ناکامی رہی ہے۔ اسے جیت کے لیے 151رنز کا ہدف ملا تھا۔ چودھویں اوور تک سب ٹھیک چل رہا تھا۔ چار کھلاڑیوں کے نقصان پر 101رنز بن چکے تھے۔

تاہم 20 ویں اوور کے اختتام پر جنوبی افریقہ کے بولر پاکستان کی نو وکٹیں لے چکے تھے جبکہ اسکور 144تھا۔ جنوبی افریقہ کے فاسٹ بولر وائن پرنل نے 25 رنز دے کر تین وکٹیں لی، لیگ اسپنر عمران طاہر نے 21 رنز کے عوض دو وکٹیں حاصل کیں۔ ڈیل اسٹائن نے 20 رنز دے کر پاکستان کے دو کھلاڑیوں کو پویلین کا راستہ دکھایا۔

کھیل کے آخری حصے میں جس تیزی سے پاکستان کی وکٹیں گریں، رنز بننے کی رفتار اتنی ہی سست رہی۔ سات وکٹیں گرنے تک صرف 43 رنز بنے۔

پاکستان کے ٹاپ اسکورر شعیب مقصود رہے۔ انہوں نے 37 رنز بنائے۔ شاہد آفریدی نے پرجوش آغاز کیا لیکن 14رنز ہی بنا سکے۔ پاکستان نے احمد شہزاد (21) اور محمد حفیظ (صفر) کی وکٹیں تواتر سے گنوا دیں۔ اس کے بعد مقصود نے کھیل میں کچھ جان ڈالی۔ انہوں نے 26 گیندوں کا سامنا کرتے ہوئے دو چوکے اور ایک چھکا لگایا۔ اس کے بعد 112رنز تک پہنچتے پہنچتے پاکستان نے مزید تین وکٹیں کھو دیں۔

طاہر نے شعیب ملک(15) اور عبدالرزاق (صفر) کو یکے بعد دیگرے آؤٹ کیا۔ کوئنٹن ڈی کوک نے پرنل کی گیند پر مقصود کو شکار کیا۔ اس دوران پاکستان کے اسکور کارڈ میں ایک بھی رن کا اضافہ نہ ہو سکا۔

میچ کے بعد جنوبی افریقہ کی ٹیم کے کپتان فف ڈوپلیسی کا کہنا تھا: ’’یہ ہماری ٹیم کی ایک بڑی کامیابی ہے۔ ہم دباؤ کے باوجود بہت اچھا کھیلے اور پاکستان جیتنے کی پوزیشن میں تھا لیکن ہم نے حیرت انگیز طور پر اسے پیچھے دھکیل دیا۔‘‘

انہوں نے مزید کہا: ’’ہم نے کہا تھا کہ ہم یہاں آنا چاہتے ہیں اور یہ سیریز دو صفر سے جیتنا چاہتے ہیں۔ ہم نے یہ کر دکھایا۔ گزشتہ کچھ مہینوں میں بولنگ کے یونٹ کے طور پر ہم یقینی طور پر آگے بڑھے ہیں۔ انہیں (بولرز کو) اس بات کا کریڈیٹ جاتا ہے کہ انہوں نے اس مقام تک پہنچنے میں وقت لگایا اور بھرپور کوشش کی۔ بہتری کی گنجائش ہمیشہ رہتی ہے‘‘

پاکستان اور جنوبی افریقہ کے درمیان ٹی ٹوئنٹی سیریز کا پہلا میچ بدھ کو کھیلا گیا تھا جو جنوبی افریقہ نے نو وکٹوں سے جیت لیا تھا۔