تحریک طالبان پاکستان میں پھوُٹ، نتائج کیا ہو سکتے ہیں؟

قبائلی علاقے وزیرستان کے ایک انتہائی بااثر محسود قبیلے کے جنگجوؤں کے کمانڈر خان سید سجنا نے دو روز قبل مختلف امور پر اختلافات کی وجہ سے ٹی ٹی پی سے علیحدگی کا اعلان کیا تھا۔

کمانڈر سجنا کے گروپ کی جانب سے یہ اعلان ایک ایسے موقع پر کیا گیا ہے جب آپس میں اختلافات کی وجہ سے طالبان دھڑوں میں مسلح جھڑپوں میں درجنوں شدت پسند مارے جارہے تھے۔ اس کے علاوہ پاکستانی فضائیہ کے جیٹ طیاروں اور آرمی کے گن شپ ہیلی کاپٹروں نے قبائلی علاقے شمالی وزیرستان میں شدت پسندوں کے مشتبہ ٹھکانوں کو نشانہ بنایا تھا۔

حکومت اور طالبان کے درمیان امن مذاکرات کاعمل مارچ کے مہینے سے تعطل کا شکار ہے اور اب بھی اس کی بحالی کا امکان نظر نہیں آرہا تاہم حکومت کی مذاکراتی کمیٹی کے ایک رکن رستم شاہ مہمند کا کہنا ہے کہ اگر ان سے مشورہ مانگا گیا تو وہ حکومت کو سجنا گروپ سے بات چیت کا کہیں گے۔ ڈی ڈبلیو سے بات کرتے ہوئے انہوں نے کہا کہ تحریک طالبان پاکستان میں تقسیم کا حکوت کو فائدہ بھی ہے اور نقصان بھی ۔ اس کی وضاحت کرتے ہوئے رستم شاہ نے کہا،"بعض لوگ(طالبان) مایوس ہو جائیں گے اور وہ اس وقت سے فائدہ اٹھاتے ہوئے حکومت پر حملے کرنا شروع کر دیں گے لیکن یہ تھوڑی دیر کے لئے ہوگا اور پائیدار نہیں ہو گا کیونکہ عوام بہت تھک گئے ہیں۔ ہر قیمت پر امن چاہتے ہیں تو جو محسود قوم ہے وہ سجنا کی حمایت کرے گی کہ حکومت کے ساتھ معاہدہ کر لیں تاکہ جو لوگ ہجرت کر کہ ایجنسی سے باہر گئے ہیں وہ واپس آجا ئیں"۔

رستم شاہ کا مزید کہنا تھا کہ اگر سجنا گروپ سے حکومت کا کوئی معاہدہ ہو جاتا ہے تو پھر طالبان کے چند دیگر دھڑے بھی اس کی پیروی کر سکتے ہیں۔

دفاعی تجزیہ کار ائیر مارشل (ر) شاہد لطیف کا کہنا ہے کہ حکومت کو چاہیے کہ وہ طالبان کی اس تقسیم کے موقع سے فائدہ اٹھاتے ہوئے فورا ناراض گروپ سے رابطہ کرے ۔ انہوں نے کہا ،"ان لو گوں کے ساتھ رابطہ قائم کر کہ ان کی مدد لی جائے۔ ایک تو یہ کہ ان کو ساتھ ملائیں دوسرا ان سے مخالف گروپ کے بارے میں انفارمیشن لیں اب میں نہیں سمھجتا کہ اس میں مزید دیر کی گنجائش ہے"۔

دوسری جانب پاکستان میں شدت پسند تنظیموں کی سرگرمیوں پر نظر رکھنے والے تجزیہ کار عامر رانا اس تاثر کو رد کرتے ہیں کہ سجنا گروپ کی علیحدگی کالعدم تحریک طالبان کی دہشتگردانہ کاروائیوں کے لئے بڑا دھچکا ہے۔ ان کے مطابق سجنا گروپ کا اثرورسوخ جنوبی وزیرستان اور کسی حد تک کراچی میں ہے جسے زیادہ فرق نہیں پڑتا۔ انہوں نے کہا،"جو مرکزی ٹی ٹی پی ہے اس کی پہنچ اور آپریشنل صلاحیتیں وہ پشاور ویلی اورنارتھ پنجاب کے اندر ہیں اور ابھی تک قائم ہیں۔ ہاں کراچی میں اس کا تھوڑا اثر پڑے گا لیکن مجموعی طور پر ٹی ٹی پی کے جوحملے رہے ہین اس میں کوئی کمی نظر نہیں آرہی"۔

عامر رانا کے مطابق سجنا کی ٹی ٹی پی سے علیحدگی عارضی بھی ثابت ہو سکتی ہے۔ انہوں نے کہا کہ پاکستان اور افغانستان میں موجود طالبان قیادت کے بعض اہم راہنما ؤں کی کوشش ہو گی کہ وہ موجودہ صورتحال پر قابو پا کر متحارب گروہوں کو اکٹھا کر دیں۔