بھارت: چیف آف ڈیفنس اسٹاف جنرل بپن راوت ہلاک

ایئر فورس نے ٹوئٹر پر جاری کیے گئے بیان میں بتایا ہے کہ جنرل بپن، ان کی اہلیہ اور دیگر گیارہ مسافر ہیلی کاپٹر حادثے میں زخموں کی تاب نہ لاتے ہوئے انتقال کرگئے۔ 
حکام کے مطابق حادثے کا شکار ہونے والے ملٹری ہیلی کاپٹر Mi-17V5 میں کل چودہ افراد سوار تھے۔ ریسکیو رضاکار چودہ میں سے صرف ایک کی جان بچانے میں کامیاب ہوسکے۔ 

تامل ناڈو میں یہ ہیلی کاپٹر اس وقت حادثے کا شکار ہوا، جب وہ ایئر فورس بیس سے آرمی ڈیفینس سروس کالج کی جانب پرواز کر رہا تھا۔حادثے کی وجوہات فی الحال نہیں بتائی گئی ہیں۔

بھارتی ایئر فورس کے مطابق آٹھ دسمبر بدھ کے روز بھارت کی جنوبی ریاست تامل ناڈو کے ایک ہل اسٹیشن کونور کے قریب بھارتی ملٹری چیف کا ہیلی کاپٹر ایک حادثے کے دوران گر کر تباہ ہوگیا۔ 

قبل ازیں ٹیلی وژن پر نشر کی گئی ویڈیو میں کریش ہونے والے ہیلی کاپٹر سے شعلے اٹھتے دیکھے جا سکتے تھے۔ مقامی افراد اور ریسکیو عملے کی جانب سے فوری طور پر آگ بھجانے کی کوشش کی جارہی تھیں۔

قبل ازیں ایک مقامی نیوز چینل نے بتایا تھا کہ ہیلی کاپٹر میں نو افراد سوار تھے، جن میں راوت کی اہلیہ اور دیگر سینئر دفاعی عہدیدار شامل ہیں۔

بھارتی ایئر فورس  نے ایک ٹویٹ میں کہا ہے کہ اس واقعے کی تحقیقات کے احکامات جاری کر دیے گئے ہیں۔

چیف آف ڈیفنس اسٹاف بپن راوت بھارتی فوج کے سب سے سینئر افسر تھے۔ وہ وزارت دفاع کے مشیر کے فرائض بھی سرانجام دے رہے تھے۔ انہوں نے گزشتہ برس بطور آرمی چیف ریٹائرمنٹ کے بعد یہ نیا عہدہ سنبھالا تھا۔

بھارتی نیوز ایجنسی پریس ٹرسٹ آف انڈیا کے مطابق Mi-17V5 ہیلی کاپٹر تامل ناڈو میں اس وقت حادثے کا شکار ہوا، جب وہ ایئر فورس بیس سے آرمی ڈیفینس سروس کالج کی جانب پرواز کر رہا تھا۔

ع آ / ا ا (اے پی، اے ایف پی)