بنڈس لیگا: ہیمبرگ نے ڈورٹمنڈ کو پچھاڑ دیا

بنڈس لیگا کے اکیسویں میچ ڈے میں ہیمبرگ اور ڈورٹمنڈ کے درمیان میچ نے شائقین کو حیرت زدہ کر دیا۔ ڈورٹمنڈ نے ابھی گزشتہ میچ ڈے میں نہ صرف لیورکوزن کو شکست دی تھی بلکہ پوائنٹس ٹیبل پر اس سے دوسری پوزیشن بھی چھین لی تھی۔

ہیمبرگ کے ہاتھوں ڈورٹمنڈ کی شکست سے لیور کوزن کے پاس اپنی کھوئی ہوئی پوزیشن حاصل کرنے کا واضح موقع تھا، جس کا وہ فائدہ نہیں اٹھا سکی۔ اس کی وجہ یہ رہی کہ ہفتے کو ہی لیور کوزن کا سامنا مؤنشن گلاڈ باخ سے ہوا۔ یہ میچ تین تین گول سے برابر رہا۔ یوں لیورکوزن کو صرف ایک پوائنٹ مل سکا ہے اور اس کے پوائنٹس 38 ہو گئے ہیں اور اب یہ ڈورٹمنڈ (39) سے ایک پوائنٹ پیچھے رہ گئی ہے۔

دوسری جانب بائرن میونخ کی کامیابیوں کا سلسلہ بدستور جاری ہے۔ ہفتے کے ایک مقابلے میں اس نے شالکے کو چار صفر سے شکست دے کر پوائنٹس ٹیبل پر اپنی سرفہرست پوزیشن کو اور بھی مضبوط کر لیا ہے۔

ہفتے کے دیگر مقابلوں میں ہینوور نے ہوفن ہائیم کو صفر کے مقابلے میں ایک گول سے شکست دی۔ وولفس برگ نے بھی گروئتھر فیورتھ کو ایک صفر سے مات دی۔ بریمن نے اشٹٹ گارٹ کو ایک کے مقابلے میں چار گول سے شکست دی۔ نیورمبرگ اور آئنتراخت فرینکفرت کا میچ صفر صفر سے برابر رہا ہے۔

پوائنٹس ٹیبل

بنڈس لیگا کے پوائنٹس ٹیبل پر بائرن میونخ بدستور سر فہرست ہے۔ اس ہفتے کی جیت کے بعد اس کے پوائنٹس 54 ہو گئے ہیں۔ یوں اسے دوسرے اور تیسرے نمبر کی ٹیموں پر واضح برتری حاصل ہے۔

آئنتراخت فرینکفرٹ 37 پوائنٹس کے ساتھ چوتھے نمبر پر ہے۔ ہیمبرگ کی ٹیم اس ہفتے کی جیت سے پانچویں نمبر پر پہنچ گئی ہے اور اس کے پوائنٹس 31 ہو گئے ہیں۔ اس پیش رفت سے مائنز چھٹے نمبر پر لڑھک گئی ہے اور اس کے پوائنٹس 30 ہیں۔

اس میچ ڈے میں مائنز کا مقابلہ ابھی باقی ہے جو آج فرائی برگ کے خلاف میدان میں اترے گی۔ اس میچ کا نتیجہ مائنز کے حق میں رہا تو یہ پھر سے پانچویں نمبر پر پہنچ جائے گی۔ اس کے برعکس میچ فرائی برگ کے حق میں رہا تو وہ دسویں سے پانچویں نمبر پر پہنچ سکتی ہے۔

مؤنشن گلاڈ باخ بھی 30 ہی پوائنٹس کے ساتھ ساتویں نمبر پر ہے۔ اس ہفتے کی جیت کے ساتھ ہینوور آٹھویں نمبر پر پہنچ گئی ہے اور اس کے پوائنٹس 29 ہو گئے ہیں۔

رپورٹ: ندیم گِل

ادارت: عاصم سلیم