بنڈس لیگا، نیورمبرگ نے آؤگس برگ کو شکست دے دی

کھیل کے 21 ویں منٹ میں نیورمبرگ کی جانب سے جاپان سے تعلق رکھنے والے کھلاڑی ہیروشی ہیوتاکے نے گول کر کے اپنی ٹیم کو برتری دلائی۔ آؤگس برگ کی طرف سے کھیل کے 36 ویں منٹ میں ٹوبیاس ویرنر نے یہ برتری ختم کر دی۔ پہلے ہاف کے اختتام تک دونوں ٹیموں کے مابین یہ میچ برابر رہا تاہم دوسرے ہاف کے آغاز کے بعد نیورمبرگ کی ٹیم نے آؤگس برگ کے گول پر حملےجاری رکھے۔ کھیل کے 54ویں منٹ میں ایسوائن نے نیورمبرگ کی جانب سے دوسرا گول کر کے اپنی ٹیم کو ایک مرتبہ پھر برتری دلا دی، جو میچ کے اختتام تک برقرار رہی۔

اس میچ میں فتح کے بعد نیورمبرگ کی ٹیم لیگ سے خارج ہونے کے خطرے سے دوچار دیگر ٹیموں کے مقابلے میں دس پوائنٹس کا فرق بنانے میں کامیاب ہو گئی ہے۔

آج ہفتے کے روز 25 ویں میچ ڈے کے سلسلے میں چھ میچز کھیلے جا رہے ہیں۔ لیگ میں سرفہرست ٹیم بائرن میونخ ڈوسلڈورف کے مدمقابل ہو گی جب کہ ایک اور میچ میں فرائی برگ اور وولفس برگ کی ٹیموں کے مابین مقابلہ ہو گا۔ آج ہی کے روز مائنز اور لیورکوزن کے ٹیموں کے درمیان بھی میچ کھیلا جائے گا جب کہ فؤرتھ اور ہوفن ہائیم کی ٹیمیں ایک دوسرے کے مدمقابل آئیں گی۔ ہفتے کے روز کھیلے جانے والے دیگر میچوں میں میونشن گلاڈباخ کی ٹیم بریمن کا سامنا کرے گی اور شالکے کا مقابلہ دفاعی چیمپیئن ڈورٹمنڈ سے ہو گا۔

اس میچ ڈے کے سلسلے میں کل اتوار کے روز دو میچز کھیلے جائیں گے، جن میں ہینوور کا مقابلہ فرینکفرٹ سے ہو گا جب کہ اشٹٹ گارٹ اور ہیمبرگ کی ٹیمیں آمنے سامنے ہوں گی۔

پوائنٹس ٹیبل پر اس وقت بائرن میونخ کی ٹیم 63 پوائنٹس کے ساتھ سرفہرست ہے جب کہ دوسری پوزیشن 46 پوائنٹس کے ساتھ ڈورٹمنڈ کے پاس ہے۔ لیورکوزن 45 پوائنٹس کے ساتھ تیسرے اور فرینکفرٹ کی ٹیم 38 پوائنٹس کے ساتھ چوتھی پوزیشن پر براجمان ہے۔

at/zb (AP, dpa)