بنڈس لیگا، فرینفکرٹ مسلسل پانچویں فتح حاصل کرنے میں ناکام رہا

اتوار کے روز ہونے والے اس میچ میں کوئی بھی ٹیم گول کرنے میں کامیاب نہ ہو سکی۔ ہفتے کے روز دفاعی چیمپیئن ڈورٹمنڈ کو شکست دینے والی شالکے کی ٹیم بہتر گول اوسط کی وجہ سے اس میچ ڈے میں فرینکفرٹ سے چوتھی پوزیشن چھیننے میں کامیاب ہو گئی ہے۔ ہیننوور کی ٹیم اس میچ کو برابر کرنے پر بنڈس لیگا کے پوائنٹس ٹیبل پر بدستور دسویں پوزیشن پر ہے۔ میچ برابر ہو جانے کی وجہ سے فرینکفرٹ کا اپنی پانچویں مسلسل فتح کا خواب شرمندہ تعبیر نہ ہو سکا۔

اس میچ ڈے کے سلسلے میں ہفتے کے روز کھیلے گئے ایک اہم میچ میں بائرن میونخ نے ڈوسلڈورف کو دو کے مقابلے میں تین گول سے شکست دے کر لیگ میں اپنی پوزیشن کو مزید بہتر بنا لیا۔ اس میچ میں فتح کے ساتھ ہی بائرن میونخ نے اس برس اب تک کھیلے گئے دس میچز میں تمام میں کامیاب کا سلسلہ برقرار رکھا۔ اب بائرن میونخ کو بنڈس لیگا کے باقی مانندہ نو میچوں میں سے اگر مزید تین مقابلوں میں کامیابی حاصل ہو گئی، تو رواں برس کا بنڈس لیگا کا تاج بائرن میونخ کے سر سج جائے گا۔ ہفتے کے روز اس فتح کے بعد بائرن میونخ نے پوائنٹس ٹیبل پر دوسرے نمبر پر موجود دفاعی چیمپیئن ڈورٹمنڈ سے 20 پوائنٹس کا فرق بنا لیا ہے۔

ہفتے کے روز کھیلے جانے والے دیگر میچوں میں شالکے نے ڈورٹمنڈ کو ایک کے مقابلے میں دو گول سے شکست دی۔ مائنز نے لیورکوزن کے صفر کے مقابلے میں ایک گول سے ہرایا۔ فرائی برگ کو وولفس برگ کے ہاتھوں دو کے مقابلے میں پانچ گول کے واضح فرق سے شکست ہوئی۔ہوفن ہائم نے فؤرتھ کی ٹیم کے صفر تین سے مات دی۔ جب کہ میونشن گلاڈباخ اور بریمن کے درمیان کھیلا گیا میچ ایک ایک گول سے برابر رہا۔

(at/zb (dpa