بنڈس لیگا، بائرن میونخ اور ڈورٹمنڈ کا میچ برابر

اس میچ کے ڈرا ہو جانے کے باوجود بائرن میونخ کی ٹیم پوائنٹس ٹیبل پر بدستور سر فہرست ہے۔ ہفتے کے روز کھیلے جانے والے اس میچ کی خاص بات ڈورٹمنڈ کے گول کیپر رومان وائڈن فیلر کا شاندار کھیل تھا، جنہوں نے کئی یقینی گول بچا کر فتح بائرن میونخ سے چھین لی۔

بائرن میونخ نے کھیل کے 67 ویں منٹ میں ٹونی کروز کی بندولت برتری حاصل کی تاہم اس کے سات ہی منٹ بعد مارکو روئز کے کارنر پر ماریو گوئٹسے نے گول کر کے میونخ کی اس برتری کو ختم کر دیا۔

میچ کے اختتام کے قریب بائرن میونخ کی جانب سے ڈورٹمنڈ کے گول پر کئی خطرناک حملے کیے گئے تاہم وائلڈن فیلر نے ان تمام حملوں کو اپنے شاندار کھیل کے ذریعے ناکام بنا دیا۔

میچ کے بعد صحافیوں سے بات چیت کرتے ہوئے بائرن میونخ کے کوچ ژُپ ہائنکیز نے کہا، ’مجھے نہیں پتا کہ بین الاقوامی فٹ بال کھیلنے کے لیے اس لڑکے (وائڈن فیلر) کو اور کس قسم کا کھیل دکھانا ہو گا۔‘

واضح رہے کہ 32 سالہ وائڈن فیلر آج تک جرمن قومی فٹ بال ٹیم کا حصہ نہیں بن پائے ہیں۔ گزشتہ کئی سیشنز میں شاندار کارکردگی کے باوجود جرمن قومی ٹیم کے کوچ یوآخم لو کی جانب سے وائڈن فیلر کو کبھی قومی ٹیم میں شامل نہیں کیا گیا ہے۔

ہفتے کے روز کھیلے جانے والے دیگر میچوں میں مائنز نے ہینوور کو ایک کے مقابلے میں دو گول سے شکست دی جبکہ آؤگس برگ اور فرائی برگ کا مقابلہ ایک ایک گول سے برابر رہا۔

ایک اور میچ میں لیورکوزن نے نیورمبرگ کو صفر کے مقابلے میں ایک گول سے ہرا دیا۔ ہفتے کے روز شالکے اور میونشن گلاڈباخ کے درمیان کھیلا گیا میچ ایک ایک گول سے برابر رہا۔ اسی طرح اشٹٹ گارٹ نے گرؤتھر فوئرتھ کو صفر کے مقابلے میں ایک گول سے شکست دی۔

اس سے قبل جمعے کے روز کھیلے گئے میچ میں ڈسلڈورف نے فرینکفرٹ کو صفر مقابلے چار گول سے ہرا دیا تھا۔ آج اتوار کے روز ہوفن ہائم اور بریمن کے درمیان مقابلہ ہو گا۔

at/sks (Reuters, dpa)