بنڈس لیگا: بائرن میونخ اب ٹائٹل سے دو فتوحات کے فاصلے پر

ہفتے کے روز لیورکوزن کو شکست دینے والی ٹیم بائرن میونخ نے اب تک اس سیزن میں 26 میچ کھیلے ہیں، جس میں سے اسے 21 میں فتح حاصل ہوئی ہے جبکہ وہ پوائنٹس ٹیبل پر موجود دوسری ٹیم سے 20 پوائنٹس کا فرق بنانے میں کامیاب رہی ہے۔ اگلے ہفتے میونخ کا مقابلہ ہیمبرگ اور 6 اپریل کو فرینکفرٹ سے ہو گا۔ ان دونوں ہی مقابلوں کے لیے بائرن میونخ کو فیورٹ قرار دیا جا رہا ہے۔ اگر بائرن میونخ کی ٹیم یہ دونوں میچ جیت گئی، تو یہ 23 واں موقع ہو گا جب وہ بنڈس لیگا ٹائٹل حاصل کرنے میں کامیاب ہوگی۔ 

گزشتہ بدھ کو آرسنل  کلب سے دو صفر کی شکست کے باوجود بائرن میونخ چیمپیئنز لیگ ٹائٹل کے حصول کی کوششوں میں بھی مصروف ہے اور اُس ٹورنامنٹ کے کوارٹر فائنلز تک رسائی حاصل کرنے میں کامیاب ہو چکی ہے۔

ہفتے کے روز لیورکوزن کے ساتھ کھیلے جانے والے میچ میں میونخ کی جانب سے کھیل کے 37 ویں منٹ میں گول کر کے ٹیم کو برتری دلائی گئی۔ کھیل  کے 75 ویں منٹ میں لیورکوزن کی ٹیم کی طرف سے سیمون رولفیز نے گول کر کے میچ برابر کر دیا تاہم میونخ کے اسٹرائیکر شوائن شٹائیگر نے کھیل کے اختتام سے چند منٹ پہلے اپنی ٹیم کو ایک مرتبہ پھر برتری دلا دی، جو میچ کے اختتام تک برقرار رہی۔

ہفتے کے روز کھیلے جانے والے دیگر میچز میں نیورمبرگ نے شالکے کو صفر کے مقابلے میں تین گول سے شکست دی۔ بریمن اور فیورتھ کے درمیان ہونے والا میچ دو دو گول سے برابر رہا۔ مائنز اور ہوفن ہائم کا میچ بھی بغیر کسی گول کے برابری کی بنیاد پر ختم ہوا۔ ڈورٹمنڈ نے فرائی برگ کو ایک کے مقابلے میں پانچ گول سے شکست دی جبکہ آؤگس برگ نے ہیمبرگ کو ایک صفر سے ہرا دیا۔

رواں میچ ڈے کے سلسلے میں جمعے کے روز وولفس برگ اور ڈسلڈورف کے درمیان کھیلا گیا میچ ایک ایک گول سے برابر رہا تھا۔ آج اتوار کے روز دو میچ کھیلے جائیں گے۔ فرینکفرٹ کی ٹیم اشٹٹ گارٹ کے مدمقابل ہو گی جب کہ مؤنش گلاڈباخ کا مقابلہ ہینوور سے ہو گا۔

at/ng (dpa, AFP)