بلوچستان میں حملے: سکیورٹی ادارے تنقید کی زَد میں

وزیر داخلہ نے گزشتہ روز اپنی تقریر میں کہا تھا کہ دہشت گردی کے یہ تازہ واقعات سکیورٹی اداروں اور خفیہ ایجنسیوں کے درمیان تعاون کی کمی کا نتیجہ ہیں۔

ان دہشت گردانہ حملوں میں کوئٹہ میں یونیورسٹی کی 14 طالبات سمیت 25 افراد ہلاک ہو گئے تھے جبکہ زیارت میں بانی پاکستان محمد علی جناح کی رہائش گاہ کو تباہ کر دیا گیا تھا۔ وزیر داخلہ نے ان حملوں کے بعد سکیورٹی اداروں کی کارکردگی پر سوال اٹھاتے ہوئے کہا کہ کوئٹہ میں قانون نافذ کرنے والے اداروں اور ایجنسیوں کا مکمل کنٹرول ہے، اس کے باوجود وہاں مسلسل دہشت گردی کیوں ہو رہی ہے؟ انہوں نے کہا کہ جگہ جگہ چیک پوسٹوں کے قیام کے باوجود دہشت گردوں نے کوئٹہ اور زیارت میں کیسے کارروائی کی؟ وزیر داخلہ کے اس بیان کے بعد پارلیمان میں پیپلز پارٹی اور دیگر اپوزیشن جماعتوں کے اراکین نے خفیہ ایجنسیوں کو سویلین کنٹرول میں لانے کا مطالبہ کیا ہے۔

حکمران جماعت مسلم لیگ ن کے وفاقی وزیر برجیس طاہر کا کہنا ہے کہ دہشت گردی پر قابو پانے کے لیے متعلقہ اداروں کی کارکردگی بہتر بنانا ناگزیر ہے۔ انہوں نے کہا کہ ''اگر ہم اپنے اداروں کو بہتر بنائیں گے، خفیہ معلومات کے تبادلے کا نظام بہتر ہو گا، وفاق اور صوبے کی حکومت میں رابطہ ہو گا، ایف سی، رینجرز اور دیگر تمام ایجنسیوں کا درست استعمال ہو گا تو مجھے امید ہے کہ حالات پر قابو پا لیا جائے گا۔''

دوسری جانب مسلم لیگ 'ضیاء' کے سربراہ اور رکن قومی اسمبلی اعجاز الحق کا کہنا ہے کہ مسلم لیگ ن کو پیپلز پارٹی حکومت کی طرح زبانی دعووں کی بجائے عملی اقدامات کرنا ہوں گے۔ انہوں نے کہا کہ ''ہم میں جرأت نہیں، آپ مشترکہ اجلاس بلائیں، صوبائی وزرائے اعلیٰ، گورنروں کو بلائیں، ان کو اسمبلی میں بلائیں، دیگر فریقین کو بلائیں، فوج کو، آئی ایس آئی، آئی بی اور وزارت داخلہ کو بلائیں اور پھر کوئی فیصلہ کرنے کے بعد امریکہ افغانستان اور ہندوستان سے دو ٹوک بات کریں۔''

بعض حلقوں کی جانب سے خفیہ ایجنسیوں کو سول حکومت کے کنٹرول میں لانے کے دیرینہ مطالبے کے ساتھ ساتھ ضروری قانون سازی پر بھی زور دیا جا رہا ہے۔ تاہم سپریم کورٹ کے وکیل نصیر بھٹہ کا کہنا ہے کہ اس بارے میں قوانین پہلے ہی سے موجود ہیں، معاملہ صرف ان کے مؤثر نفاذ کا ہے۔ انہوں نے کہا کہ ''جتنے ادارے ہیں، وہ سویلین حکومت کے دائرہ اختیار میں ہیں اور پارلیمنٹ سپریم ہے۔ اب جتنے ادارے ہیں، وہ سب پارلیمنٹ کے ماتحت کام کر رہے ہیں اور پارلیمنٹ کے پاس نگرانی کا ایک حق موجود ہے۔ اگر نگرانی کے حق کا باقاعدہ طور پر استعمال کیا جائے، اس کو نافذ کیا جائے، تو میں نہیں سمجھتا کہ مزید کسی قانون سازی کی ضروری ہے۔''

وفاقی حکومت نے کوئٹہ اور زیارت کے واقعات کے بعد 20 جون کو سول اور عسکری حکام کا ایک اجلاس طلب کر رکھا ہے۔ وزیر داخلہ چوہدری نثار کے مطابق حکومت اس اجلاس کے بعد جلد ہی اپنی نئی سیکورٹی پالیسی کا اعلان کرے گی۔

رپورٹ: شکور رحیم، اسلام آباد

ادارت: امجد علی