بلوچستان: شورش سے نمٹنے کے لیے نئی حکمت عملی

پاکستان کے شورش زدہ صوبے بلوچستان میں دہشت گردی کی حالیہ لہر کے بعد مرکزی حکومت نے صوبے میں سیکورٹی انتظامات کا ازسر نو جائزہ لیتے ہوئے نیا سیکورٹی پلان ترتیب دینے کا فیصلہ کیا ہے۔ اس نئے منصوبے سے صوبے میں قیام امن کے لیے جاری کوششوں کو کامیابی سے ہمکنار کیا جا سکے گا۔

محکمہ داخلہ کے ذرائع نے ڈی ڈبلیو کو بتایا کہ نئے پلان کے مطابق صوبائی دارالحکومت کوئٹہ سمیت بلوچستان کے تمام حساس علاقوں میں انٹیلی جنس نیٹ ورک کو مزید فعال بنایا جائےگا۔ اس کے علاوہ ہمسایہ ملک افغانستان کی سرحد سے ملحقہ پاکستانی علاقوں میں سیکورٹی فورسز کی اضافی نفری تعینات کی جائے گی۔ اس اقدام کا مقصد شدت پسندوں اور دہشت گردوں کے درمیان رابطے کے اس نیٹ ورک کو توڑنا ہے۔

ذرائع کے مطابق ملک کے ایک اہم خفیہ ادارے کی جانب سے مرکزی حکومت کو ایک رپورٹ پیش کی گئی ہے جس میں بلوچستان میں دہشت گردوں کے نئے حملوں کی منصوبہ بندی کا ذکر کیا گیا ہے۔ اس رپورٹ میں یہ انکشاف کیا گیا ہے کہ بلوچستان میں علیحدگی پسند کالعدم تنظیمیں اور فرقہ واریت میں ملوث عناصر صوبے میں بننے والی نئی حکومت کو کمزور کرنے کے لئے سرگرم عمل ہیں۔

صوبے میں حال ہی میں رونما ہونے والے دہشت گردی کے بعض واقعات ایسے بھی ہیں جن میں ان گروپوں نے مشترکہ طور پر حصہ لیا ہے اوران گروپو ں میں بعض کے تحریک طالبان پاکستان کے ساتھ بھی رابطے ہیں اور ہفتے کو کوئٹہ میں طالبات کی بس اور بی ایم سی ہسپتال پر ہونے والے دہشت گرد حملوں میں ملوث عسکریت پسندوں نے ان واقعات کی ذمہ داری قبول کرتے ہوئے انہیں سیکورٹی فورسز کی کوئٹہ کے علاقے خروٹ آباد میں ہونے والی اس کاروائی کا رد عمل قرار دیا ہے جس میں کالعدم تنظیم کے ایک کمانڈر سمیت سات افراد ہلاک ہو گئے تھے اور حکام نے اس کاروائی کے بعد واضح کیا تھا کہ اس کاروائی میں تحریک طالبان کے پانچ شدت پسند مارے گئے ہیں۔

مبصرین کا خیال ہے کہ پشتون اور بلوچ قوم پرست جماعتوں اور مسلم لیگ (ن ) کی اشتراک سے بننے والی بلوچستان کی مخلوط حکومت کو صوبے میں دہشت گردی کے بڑھتے ہوئے واقعات کی روک تھام کے لئے زمینی حقائق کو مدنظر رکھ کر اقدامات کرنا ہوں گے کیونکہ بد امنی میں ملوث عناصر باقاعدہ منصوبہ بندی کے تحت یہ ثابت کرنے کی کوشش کر رہے ہیں کہ بلوچستان میں جمہوری حکومت کامیاب نہیں ہو سکتی۔

بلوچستان کی بلوچ قوم پرست جماعت نیشنل پارٹی کے سربراہ ڈاکٹر عبدالمالک بلوچ کو بلوچستان میں متفقہ وزیراعلیٰ منتخب کیا گیا ہے اورایوان میں قائد ایوان کے لئے رائے شماری کے دوران 55 اراکین نے متفقہ طور پر ڈاکٹر عبدالمالک بلوچ کے حق میں ووٹ دیا تھا۔ اسمبلی اجلاس سے خطاب کے دوران وزیراعلٰی ڈاکٹر عبدالمالک بلوچ نے صوبے میں امن کے لیے تمام مسلح تنظیموں کو مذاکرات کی دعوت بھی دے دی ہے۔

اس حقیقت سے بھی انکار نہیں کیا جاسکتا کہ ڈاکٹر عبد المالک بارودی سرنگوں سے بچتے بچاتے اسمبلی کے فلور تک آئے ہیں،ان کے راستے میں کہیں کوئی کہکشاں نہیں بلکہ پتھروں کے ڈھیر ہیں اور انہیں بلوچستان کو امن اور ترقی کی راہ پر لانے کیلیے وزیراعظم میاں نواز شریف ، ملک کی عسکری قیادت او دیگر ساتھی سیاست دانوں کی معاونت، رہنمائی اور تعاون کی بے حد ضرورت ہے۔

پاکستان کے دفاعی امور کے سینئر تجزیہ کار جنرل(ر) طلعت مسعود کا کہنا ہے، ’’بلوچستان میں دہشت گردی کے واقعات کی روک تھام کے لئے نئی حکومت کو ایک موثر حکمت عملی وضع کرنی چاہیے جو کاونٹر ٹیرررازم کی جدید ترین بنیاد پر استوار ہو، تاکہ امن کے قیام کیلیے فورسز کے استعمال کے ساتھ ساتھ کرپشن کا خاتمہ بھی ممکن ہو سکے‘‘۔

ڈی ڈبلیوسے گفتگو کے دوران ان کا مذید کہنا تھا،’’سب سے بنیادی بات یہ ہے کہ معاملے کی سنگینی کو دیکھا جائے یہ ارباب سیاست اور عسکری قیادت سمیت تمام اسٹیک ہولڈرز کی مشترکہ ذمے داری ہے کہ وہ صوبے میں امن وامان کی بحالی کو یقینی بنائیں بلوچستان کے حالات میں خرابی کسی ایک فریق کے باعث نہیں بلکہ کثیرالجہتی جنگجو قوتوں، بلوچ مزاحمت کاروں اور اس سے برسرپیکار گروپوں سمیت، داخلی انتہا پسند، فرقہ وارانہ اورکالعدم تنظیموں نے بدامنی کی اس ہولناک صورتحال کو جنم دیا ہے اس لئے دور اندیشی پر مبنی اقدامات کی ضرورت ہے تاکہ ان عناصر کے منصوبے ناکام ہو سکیں‘‘۔

ادھر دوسری طرف وفاقی وزیر داخلہ چوہدری نثار احمد خان کا یہ بیان بھی غیر متوقع اور اہم ہے کہ بد امنی پھیلانے والے عناصر کے ساتھ مذاکرات نہیں بلکہ ان کی زبان میں بات کی جائے گی اتوار کو کوئٹہ اور زیارت کے دورے کے بعد میڈیا سے گفتگو کے دوران انہوں نے دوٹوک الفاظ میں یہ بات واضح کی ہے کہ مسلم لیگ ن ، مفاہمت کے ذرئعے تمام مسائل حل کرنا چاہتی ہے تاہم جو لوگ حکومت کی رٹ کوتسلیم نہیں کریں گے ان کے ساتھ آہنی ہاتھوں سے نمٹا جائےگا۔

رپورٹ: عبدالغنی کاکڑ

ادارت: زبیر بشیر