بائیتھلون ایتھلیٹ نے میڈلز کا ریکارڈ برابر کر دیا

بیورندلین سے پہلے ونٹر اولمپکس میں سب سے زیادہ میڈل جیتنے کا ریکارڈ بھی ناروے کے ہی اسکیئنگ چیمپیئن بیورن ڈائیلی کے پاس تھا۔

بیورندلین دس کلومیٹر کی اس دوڑ میں اختتامی لائن پر پہنچے تو ڈائیلی بھی وہاں موجود تھے جنہوں نے آگے بڑھ کر انہیں گلے لگایا۔

اب بیورندلین کے میڈلز کی تعداد بارہ ہو گئی ہے۔ اب محض ایک مزید جیت انہیں ونٹر اولمپکس میں سب سے زیادہ میڈل جیتنے والا ایتھلیٹ بنا دے گی۔ ڈائیلی کے برابر پہنچنے پر انہوں نے کہا: ’’میرے خیال میں بیورن آج بھی ناروے کے سب سے بڑے ایتھلیٹ ہیں۔‘‘

اس جیت کے ساتھ بیورندلین 40 برس کی عمر میں ونٹر اولمپکس کے انفرادی مقابلوں میں گولڈ میڈل جیتنے والے سب سے زیادہ عمر کے ایتھلیٹ بھی بن گئے ہیں۔ اس سے قبل یہ ریکارڈ کینیڈا کے اسکیلٹن ریسر ڈف گبسن کے پاس تھا جنہوں نے انتالیس برس کی عمر میں 2006ء کے اولمپک مقابلوں میں سونے کا تمغہ جیتا تھا۔

ہفتے کی اس جیت کے بعد بیورندلین نے کہا: ’’میں ہمیشہ بھول جاتا ہوں کہ (میں چالیس سال کا ہوں)، مجھے لگتا ہے جیسے میں بیس برس کا ہوں۔ میں ایک زبردست عمر میں ہوں۔ میں انتہائی پرجوش ہوں۔ میں نے اس کی بہت اچھی تیاری کی تھی اور میں بہت اچھا محسوس کر رہا ہوں۔‘‘

انہوں نے کہا کہ اس جیت نے انہیں مطمئن کر دیا ہے۔ بیورندلین کا کہنا تھا: ’’اب میں مطمئن ہوں۔ یہ کافی ہے۔ اب سے ہر چیز بونس ہو گی۔ میں نے سونے کا تمغہ جیت لیا ہے اور یہ بہت اچھا ہے۔‘‘

بیورندلین کے کیریئر کا یہ ساتواں گولڈ میڈل ہے۔ انہوں نے ہفتے کو بائیتھلون کا مقابلہ چوبیس منٹ تینتیس اعشاریہ پانچ سیکنڈ میں مقررہ فاصلہ طے کرتے ہوئے جیتا۔

آسٹریا کے ڈومینیک لانڈیرٹِنگیر نے بیورندلین سے 1.3 سیکنڈ تاخیر سے حتمی لائن عبور کی اور یوں وہ دوسرے نمبر پر رہے۔ چیک جمہوریہ کے یاروسلاف سوکپ بیورندلین سے 5.7 سیکنڈ پیچھے رہے اور انہیں کانسی کا تمغہ دیا گیا۔

اس ریس کے ابتدائی حصے میں روس کے آنتون شپولین بیورندلین کے لیے مسلسل خطرہ بنے ہوئے تھے۔ تاہم ان کی ایک غلطی ناروے کے ایتھلیٹ کے کام آ گئی۔

ریس سے قبل ناروے کے ایمل ہیگلے سفندسن اور فرانس کے مارتاں فورکاد فیورٹ تھے تاہم وہ توقعات پر پورے نہ اتر سکے۔ وہ بالترتیب نویں اور چھٹے نمبر پر رہے۔