اٹلی میں پارلیمان تحلیل، آئندہ انتخابات فروری میں

اطالوی صدر جارجیو ناپولیتانو نے ہفتے کے دن سیاسی رہنماؤں کے ساتھ مشاورت کے بعد اسمبلی تحلیل کرنے کا اعلان کیا۔ خبر رساں ادارے ڈی پی اے نے بتایا ہے کہ صدر نے سابق وزیر اعظم سیلویو بیرلسکونی کی پیپل آف فریڈم پارٹی PDL کے اعلیٰ رہنماؤں سے بھی مشاورت کی۔ توقع کی جا رہی ہے کہ بیرلسکونی آئندہ انتخابات میں حصہ لینے کا ارادہ رکھتے ہیں۔

کابینہ نے تصدیق کی ہے کہ اب آئندہ انتخابی عمل دو دنوں پر مشتمل ہو گا۔ پی ڈی ایل کی طرف سے حمایت واپس لیے جانے کے بعد 69 سالہ ماریو مونٹی نے وزارت عظمیٰ کے عہدے کو خیر باد کہہ دینے کا فیصلہ کیا تھا۔ تاہم انہوں نے کہا تھاکہ آئندہ مالی سال کے بجٹ کی منظوری کے بعد وہ اقتدار سے الگ ہوں گے۔ جمعے کو پارلیمان سے 2013ء کے مالی بجٹ کی منظوری کے بعد انہوں نے صدر کو استعفیٰ پیش کر دیا۔ یورپی یونین کے سابق کمشنر مونٹی نے اپنے تیرہ ماہ کے اس دور کو انتہائی مشکل اور دلچسپ قرار دیا ہے۔

عوامی جائزوں کے مطابق ڈیموکریٹک پارٹی آگے

ماہر اقتصادیات ماریو مونٹی نے ابھی تک واضح نہیں کیا ہے کہ وہ آئندہ انتخابات میں حصہ لینے کا ارادہ رکھتے ہیں یانہیں۔ وہ آج بروز اتوار ایک نیوز کانفرنس کے دوران اس حوالے سے معلومات فراہم کریں گے۔

ابھی تک عوامی جائزوں کے مطابق بائیں بازو کی طرف سے جھکاؤ رکھنے والی ڈیموکریٹک پارٹی کو دیگر سیاسی جماعتوں پر سبقت حاصل ہے۔ اس پارٹی نے ماریو مونٹی کی خدمات کا اعتراف کرتے ہوئے کہا ہے کہ اب اٹلی ایک نئے اور بہتر دور کا حقدار ہے۔

اس سیاسی گہما گمی میں بیرلسکونی کی سیاسی پارٹی پیپل آف فریڈم PDL کے ایک اعلیٰ ممبر فابرٹزیو چیکیٹو نے ٹیکنوکریٹ مونٹی کو دعوت دی ہے کہ وہ ان کی پارٹی میں شامل ہو جائیں۔ تاہم ناقدین کے بقول یہ ایک ایسی دعوت ہے، جو مونٹی قبول نہیں کریں گے۔

سخت کساد بازاری کا سامنا کرنے والے اس یورپی ملک اٹلی میں نوجوانوں کی بے روزگاری کی شرح 36.5 کی حد کو چھو رہی ہے۔ بیرلسکونی کی پارٹی کا مؤقف ہے کہ اس طرح کی سخت اقتصادی پالیسیوں کا ذمہ دار جرمنی ہے، جس نے یورو زون کی کمزور ریاستوں کے لیے ایسی پالیسیاں وضع کی ہیں۔ اس پارٹی کے بقول مونٹی اس حوالے سے جرمنی کو مزاحمت دکھانے میں ناکام ہو گئے تھے۔

(ab/ng (dpa,Reuters