اوباما جاپان کے بعد جنوبی کوریا میں

جنوبی کوریا کے دورے پر پہنچنے والے امریکی صدر باراک اوباما نے کہا ہے کہ شمالی کوریا محض دھمکیوں سے کچھ حاصل نہیں کر سکے گا۔ اس موقع پر انہوں نے شمالی کوریا کی حکومت کو متنبہ کیا کہ اگر اس کی طرف سے چوتھا جوہری تجربہ کیا گیا تو اسے مزید مشکلات کا سامنا کرنا پڑے گا۔

سیٹلائٹ سے حاصل ہونے والی تصاویر سے اندازہ ہوا ہے کہ شمالی کوریا ایک اور جوہری تجربے کی تیاریاں کر رہا ہے۔ امریکی صدر کا اس حوالے سے کہنا تھا کہ واشنگٹن اور سیئول جوہری شمالی کوریا کو برداشت کرنے کے معاملے میں ’کندھے سے کندھا‘ ملائے کھڑے ہیں۔

باراک اوباما کہنا تھا کہ شاید وقت آ گیا ہے کہ شمالی کوریا کے خلاف مزید سخت پابندیاں عائد کی جائیں۔ صدر اوباما نے یہ بات جنوبی کوریا کی اپنی ہم منصب پارک گُن شے سے ملاقات کے بعد ایک مشترکہ پیرس کانفرنس میں کہی۔

اوباما کا مزید کہنا تھا کہ یہاں تک چین بھی، جو شمالی کوریا کا واحد بڑا اتحادی ہے، اپنے اشتعال انگیز اقدامات کے باعث تنہا ہوتا جا رہا ہے۔

اس موقع پر پارک گُن شے نے کہا کہ اگر شمالی کوریا کی جانب سے کوئی نیا جوہری تجربہ کیا گیا، تو خطے میں ہتھیاروں کی ایک نئی دوڑ شروع ہو جائے گی۔ شمالی کوریا اس سے قبل 2006ء، 2009ء اور 2013ء میں جوہری تجربات کر چکا ہے۔

امریکی صدر سے جب سوال کیا گیا کہ نئے جوہری دھماکے کی صورت میں بین الاقوامی برادری کا کیا ردعمل ہو گا؟ ان کا کہنا تھا کہ ایسی صورت میں شمالی کوریا پر دباؤ بڑھانے کے لیے ’مزید طریقے‘ ڈھونڈنا ضروری ہو جائے گا، جن میں مزید ایسی پابندیاں بھی شامل ہیں جو زیادہ تکلیف دہ ثابت ہوں گے۔

امریکی صدر باراک اوباما نے جاپان کے دورے کے دوران وزیراعظم شینزو آبے کو یقین دلایا تھا کہ اگر چین جاپانی کنٹرول میں موجود جزیروں کے حوالے سے کسی قسم کی فوجی کارروائی کرتا ہے تو وہ ایسی صورت میں معاہدے کے مطابق وہ جاپان کا ساتھ دینے کا پابند ہے۔ انہوں نے فریقین سے اس طویل المدتی تنازعے کو پرامن طریقے سے حل کرنے کا کہا ہے۔

صدر اوباما نے ایسے بیانات کو بھی مسترد کر دیا ہے کہ ایشیا پیسفک تجارتی معاہدہ خطرناک ہے۔ ٹوکیو میں ان کا کہنا تھا کہ جاپان اور امریکا کو اختلافات پر قابو پانے کے لیے جرات مندانہ فیصلے کرنا ہوں گے۔ ٹرانس پیسفک پارٹنرشپ میں مجموعی طور پر 12 ممالک شامل ہیں اور یہ خطے میں امریکی اثرو رسوخ بڑھانے کے لیے صدر اوباما کی پالیسی کا حصہ ہے۔ اس معاہدے کا مقصد خطے میں چین کے بڑھتے ہوئے اثرو رسوخ کا مقابلہ کرنا بھی ہے۔ صدر اوباما نے متنازعہ جزائر کے معاملے میں چین کے خلاف اپنے اتحادی ملک جاپان کا دفاع کرنے کا بھی اعادہ کیا ہے۔

امریکی صدر باراک اوباما اپنے ایشیا کے ہفتہ بھر کے دورے کے دوران جنوبی کوریا کے بعد ملائیشیا اور فلپائن بھی جائیں گے۔