امریکی صدارتی مہم، ملکی معیشت کا موضوع غالب

ایسے میں اگر یہ بھی معلوم ہو کہ ری پبلکن امیدوار مِٹ رومنی خود کو امریکی ووٹروں کے سامنے ایک ایسے کامیاب بزنس مین اور کمپنیوں کو بچانے کی شہرت رکھنے والے شخص کی حیثیت سے پیش کر رہے ہیں، جو بنے ہی گویا اس طرح کے بحرانوں سے نمٹنے کے لیے ہیں تو کہا جا سکتا ہے کہ صدارتی انتخابات کا فیصلہ گویا ہو بھی چکا ہے۔

تاہم درحقیقت ایسا نہیں ہے۔ خراب معیشت کے باوجود رائے عامہ کے زیادہ تر امریکی جائزوں میں اوباما کو اپنے حریف رومنی پر برتری حاصل ہے۔ اس کا مطلب یہ ہے کہ یا تو رومنی ووٹروں کو زیادہ وضاحت کے ساتھ یہ بتا نہیں سکے ہیں کہ اُن کا پروگرام اوباما کے پروگرام سے بہتر ہے، جیسا کہ رومنی کے کچھ ناقدین کا خیال ہے۔ یا پھر وہ ڈیموکریٹس درست کہہ رہے ہیں، جن کے خیال میں ووٹر رومنی کے پروگرام کو اچھی طرح سے سمجھ تو گئے ہیں لیکن اُسے رَد کر رہے ہیں۔

پہلا بڑا معاملہ ٹیکسوں کا ہے۔ جہاں اوباما زیادہ آمدنی والے افراد پر ٹیکسوں کی شرح 35 سے بڑھا کر 39.4 فیصد کرنا چاہتے ہیں وہاں رومنی ٹیکسوں کی شرح میں 20 فیصد کمی کرنا چاہتےہیں تاہم فلاڈیلفیا میں یونیورسٹی آف پنسلوینیا کے پروفیسر رابرٹ پی اِن مَین کے خیال میں رومنی یہ نہیں بتا سکے ہیں کہ اپنے اس فیصلے پر عملدرآمد کے لیے وہ مالی وسائل کہاں سے لائیں گے۔

اپنے منصوبوں کو عملی شکل دینے کے لیے رومنی کو کئی ایک ایسی ٹیکس مراعات واپس لینا پڑیں گی، جو امریکی ٹیکس دہندگان کو کئی دیگر حوالوں سے حاصل ہیں تاہم انتخابی مہم کے دوران رومنی جان بوجھ کر اس نکتے پر زور دینے سے گریز کر رہے ہیں۔

دوسرا بڑا شعبہ صحت کا ہے۔ امریکا اس شعبے پر دیگر ملکوں کے مقابلے میں کہیں زیادہ یعنی اپنے بجٹ کا تقریباً بیس فیصد خرچ کرتا ہے، اس کے باوجود لاکھوں امریکی ہیلتھ انشورنس سے محروم ہیں۔ رومنی اوباما کی متعارف کردہ اُن پالیسیوں کو منسوخ کرنا چاہتے ہیں، جن کے ذریعے اِن لاکھوں امریکیوں کی بھی ہیلتھ انشورنس تک رسائی ہوئی ہے۔

تیسرے بڑے موضوع کا تعلق دفاع سے ہے۔ اِس پر امریکا اپنے بجٹ کا تقریباً بیس فیصد خرچ کرتا ہے، جو مثلاً چین کے دفاعی بجٹ سے پانچ گنا زیادہ بنتا ہے۔ اوباما یا رومنی دونوں میں سے کوئی بھی اس بجٹ میں قابل ذکر کمی کا ارادہ نہیں رکھتا کیونکہ نہ صرف زیادہ تر امریکی شہری ایک مضبوط فوج کے حامی ہیں بلکہ بڑی تعداد میں امریکیوں کو دفاعی شعبے میں روزگار کے مواقع بھی حاصل ہیں۔

پروفیسر اِن مَین کے خیال میں دونوں صدارتی امیدواروں میں بڑا فرق یہ ہے کہ اوباما کے خیال میں معاشی پالیسیوں کے ضمن میں حکومت کا کردار بہت اہم ہے جبکہ رومنی سمجھتے ہیں کہ منڈیاں حکومت کے مقابلے میں معیشت کا انتظام زیادہ بہتر طور پر سنبھال سکتی ہیں۔

M.Knigge/aa/km