ارادہ بینک لوٹنے کا تھا مگر مشتبہ ملزم سرنگ میں پھنس گیا

روم سے جمعہ بارہ اگست کو ملنے والی رپورٹوں کے مطابق یہ واقعہ اطالوی دارالحکومت کے مغربی حصے میں ویٹیکن سٹی کے قریب پیش آیا۔ پولیس نے بتایا کہ یہ مشتبہ ملزم اور اس کے ساتھی روم شہر کے متعلقہ حصے میں ایک بڑی شاہراہ کے نیچے سرنگ کھود رہے تھے تاکہ ایک قریبی بینک کے اندر تک پہنچ کر اسے لوٹ سکیں۔

جاپانی یاکوزا مافیا باس کو سزائے موت: ’جج صاحب، آپ پچھتائیں گے‘

لیکن اس کھدائی کے دوران اس سرنگ کا ایک حصہ بیٹھ گیا اور اس گینگ کا کم از کم ایک رکن اس بیٹھی ہوئی سرنگ میں پھنس کر رہ گیا۔ اسے فائر بریگیڈ کے کارکنوں نے آٹھ گھنٹے کی مسلسل کوششوں کے بعد اس سرنگ سے زندہ نکالا، جس کے بعد علاج کے لیے اسے ایک قریبی ہسپتال منتقل کر دیا گیا۔

چار ملزمان گرفتار

روم پولیس کے ایک ترجمان نے بتایا کہ اس گینگ کا بینک لوٹنے کا ارادہ تو ان کا مشتبہ مجرمانہ منصوبہ تھا، جس سے وہ انکاری ہیں تاہم اس گینگ کے چار افراد کو حراست میں لے لیا گیا ہے۔ پولیس ترجمان کے مطابق، ''ان ملزمان میں سے دو شہر نیپلز کے رہنے والے ہیں جنہیں سرکاری اہلکاروں کے کام میں رکاوٹیں ڈالنے کے الزام میں گرفتار کیا گیا جبکہ روم شہر کے رہائشی دو دیگر ملزمان کو عوامی املاک کو نقصان پہنچانے کے الزام میں گرفتار کر لیا گیا ہے۔‘‘

اٹلی میں دائیں بازو کی نئی سیاسی مہم: پارک کا نام تبدیل کریں

جس ملزم کو پولیس اور فائر بریگیڈ کے کارکنوں نے منہدم ہو جانے والی سرنگ سے نکالا، وہ روم کے انہی دو شہریوں میں سے ایک ہے، جو قانونی طور پر اب پولیس کی حراست میں ہیں۔ پولیس نے مزید بتایا کہ ہسپتال میں زیر علاج ملزم بھی قانوناﹰ ہے تو پولیس کی حراست میں لیکن زخمی ہونے کی وجہ سے فی الحال اس کا علاج کرایا جا رہا ہے۔ پولیس نے یہ نہیں بتایا کہ یہ ملزم کتنا زخمی ہے۔

اطالوی اخبارات کی طنزیہ رپورٹنگ

متعدد اطالوی اخبارات میں اس واقعے کی جمعے کے روز شائع ہونے والی تفصیلات کے مطابق ملزمان سرنگ کھود کر ایک قریبی بینک لوٹنا چاہتے تھے، ان کا یہ ارادہ کسی بھی شبے سے بالا تر ہے۔ اس لیے کہ ایک تو جو سرنگ بیٹھ گئی، وہ مغربی روم میں ایک قریبی بینک تک پہنچنے کے لیے کھودی جا رہی تھی۔ دوسرے یہ کہ تیرہ سے پندرہ اگست تک اٹلی میں ایک ایسا طویل ویک اینڈ ہو گا، جس دوران مقامی باشندے عام طور پر چھٹیاں منانے کے لیے شہر سے باہر چلے جاتے ہیں اور روم شہر زیادہ تر خالی ہو جاتا ہے۔

ایسٹر ڈنر کے لیے اٹلی واپسی، سسلی کا مطلوب مافیا باس گرفتار

اس بارے میں اطالوی اخبارات کی سرخیاں بھی کافی دلچسپ تھیں۔ اخبار کوری ایرے دے لا سیرا نے اس گروہ کو 'زیر زمین سرنگ والا گینگ‘ لکھا تو اخبار لا سٹامپا نے لکھا، ''انہوں نے ایک بینک کو لوٹنے کے لیے سرنگ کھودی مگر ان میں سے ایک زیر زمین دفن ہو کر رہ گیا، جسے فائر بریگیڈ نے بچایا۔‘‘

سرنگ کھودنے کے لیے کرائے پر لی گئی دکان

اطالوی میڈیا کے مطابق ان ملزمان نے ایک قریبی بینک کی طرف جانے والی جو سرنگ کھودی، وہ اسی علاقے میں ایک ایسی دکان کے نیچے سے شروع ہوتی تھی، جسے حال ہی میں کرائے پر لیا گیا تھا۔

اطالوی مافیا کا انتقام، خاتون کو قتل کر کے لاش خنزیروں کو کھلا دی

جس عمارت میں یہ دکان  واقع ہے، اسی عمارت کے ایک رہائشی نے نیوز ایجنسی اے ایف پی کو بتایا، ''ہم سمجھے تھے کہ وہ اس دکان کی آرائش و مرمت کر رہے ہیں۔ ہمیں کوئی شبہ تک نہ ہوا۔ انہوں نے کبھی شور بھی نہیں کیا تھا۔ ہمیں کیا علم تھا کہ اس دکان کے نیچے سرنگ کھودی جا رہی تھی۔‘‘

دلچسپ بات یہ بھی ہے کہ سرنگ میں پھنس جانے والے مشتبہ ملزم  نے فوری مدد کے لیے پولیس کے ایمرجنسی نمبر پر فون بھی خود ہی کیا تھا۔

م م / ک م (اے ایف پی، ڈی پی اے)