آسٹریلین اوپن: جوکووچ اور نادال کا فائنل اتوار کو

عالمی نمبر ایک ٹینس کھلاڑی نوواک جوکووچ اتوار کے روز سال کے پہلے گرینڈ سلیم آسٹریلین اوپن کا فائنل عالمی نمبر دو ہسپانوی کھلاڑی رافائل نادال کے خلاف کھیلیں گے۔ جمعے کے روز ایک سنسنی خیز مقابلے کے بعد جوکووچ نے اینڈی مرے کو چھ تین، تین چھ، چھ سات، چھ ایک اور سات پانچ سے ہرا دیا۔

فتح کے بعد میڈیا سے گفتگو کرتے ہوئے جوکووچ نے مرے کے کھیل کی تعریف کرتے ہوئےکہا کہ دونوں ہی یہ میچ جیت سکتے تھے۔ ’’میچ کسی بھی رخ جا سکتا تھا۔ مرے میچ جیتنے کے بہت قریب بھی تھے۔ میں خوش قسمت ہوں کہ میں یہ میچ جیت گیا۔‘‘

اینڈی مرے کا پہلا گرینڈ سلیم جیتنے کا خواب ایک مرتبہ پھر پورا نہ ہوسکا، تاہم ٹینس کے ماہرین اور شائقین نے ان کے کھیل کی تعریف کی۔ مرے میچ میں کسی طور بھی جوکووچ سے کم نہ تھے۔ ماہرین کا کہنا ہے کہ ٹینس کے لیجنڈ ایوان لینڈل کو کوچ رکھنے کے بعد مرے کے کھیل میں بہت بہتری آئی ہے۔

جووکوچ کے مطابق یہ میچ جسمانی اور جذباتی طور پر بہت سخت میچ تھا۔ میچ کے دوران جوکووچ کو سانس لینے میں مشکل کا سامنا بھی رہا۔

نادال کے ساتھ فائنل کے بارے میں جوکووچ کا کہنا تھا کہ نادال کے ساتھ فائنل کھیلنا ان کے لیے اعزاز کی بات ہے کیونکو نادال ٹینس کی تاریخ کے عظیم ترین کھلاڑیوں میں سے ایک ہیں۔

خیال رہے کہ جوکووچ کھیلے گئے گزشتہ چھ فائنل مقابلوں میں نادال کو شکست دے چکے ہیں۔ ان میں سے دو گرینڈ سلیم کے فائنل تھے۔ گزشتہ برس انہوں نے عالمی نمبر ایک کا درجہ بھی حاصل کر لیا، جو اس سے پہلے نادال کے پاس تھا۔ ٹینس کے شائقین کو اتوار کو کھیلے جانے والے فائنل کا بے صبری سے انتظار ہے۔

دوسری جانب خواتین کے مقابلوں کا فائنل آج ہفتے کے روز ماریہ شاراپووا اور ایزارینکا کے درمیان کھیلا جائے گا۔

رپورٹ: شامل شمس ⁄  خبر رساں ادارے

ادارت: عاطف بلوچ